Luka 7 - Tonga Bible 1986

Yesu wachizga munyamata wa nduna ya ŵaRoma

¹ Ndipo penipo wangufiska ghose makani ghake mu chipulikizgu cha khamu lo, wangusere mu Kapernaumu.

² Ndipo mteŵeti waku kenturione ngana, mweniyo wenga wakuzirwa kwaku iyo, watamanga ndi wakhasangakufwa.

³ Ndipo wanguti wavwa vyapaku Yesu, wangutumizga kwaku iyo ŵara ŵa ŵaYuda, wakumpempha kuti wazichizge mteŵeti wake.

⁴ Ndipo ŵachiza iwo kwaku Yesu ŵangumuŵeyere ukongwa, ŵakunena kuti, “Ngwakwenere kuti umchitiye chenichi,

⁵ pakuti watanja mtundu widu, ndi wangutizenge sinagoge yo.”

⁶ Ndipo Yesu warutanga pamoza nawo. Ndipo sono wanguti wafika iyo kufupi ndi nyumba, kenturione yo wangutuma kwake mabwezi, ŵakumunene, “Ambuya, mungajisuzga: chifukwa kuti nde wambura kwene ine kuti musere pasi pa chindu langu;

⁷ chifukwa chenichi kuti ndingujipima wakwenere cha kuza kwinu: kweni kambani mazu, ndipo wachizgikenge mteŵeti wangu.

⁸ Chifukwa ine nda munthu nde wakuŵikika pasi pa mtufu, wakuŵa nawo pasi ŵankhondu: ndipo ndi munene uyu, ‘Rutanga,’ ndipo waruta; ndi ku munyake, ‘Zanga,’ ndipo watuza; ndi ku muŵanda wangu, ‘Chitanga chenichi,’ ndipo wachita.”

⁹ Ndipo wachivwa ghenigho, Yesu wanguzizwa nayo, ndipo wanguti wang'anamukiya ku mzinda wakumrondo, wanguti, “Ndikuneniyani, chingana ndi mu Yisraele kuti ndasaniya cha chivwanu chikuru chaviyo.”

¹⁰ Ndipo ŵachiwere kuvuli ku nyumba wo ŵangutumika, ŵangumsaniya mteŵeti wachira.

Yesu wayuska ku ŵakufwa mwana wachoko

¹¹ Ndipo kunguŵa pavuli pake wanguruta ku muzi wakuzumbulika Naini; ndipo ŵarutanga pamoza nayo ŵasambizi ŵake, ndi mzinda ukuru.

¹² Ndipo po wanguŵandika ku likomo la muzi wo, onani, wanyamulikiyanga kubwaro munthu wakufwa, mwana mhurwa wakuŵa yija ku nyina, ndi iyo wenga choko: ndipo mzinda ukuru wa muzi wenga pamoza nacho.

¹³ Ndipo wachichiona Mbuya, wanguchichitiya chifundu, ndipo wanguchinene, “ungaliyanga.”

¹⁴ Ndipo wanguza, wangukwaska thupi; ndipo ŵakunyamuwa ŵanguma jo. Ndipo wanguti, “Jaha we, ndikunene yuka.”

¹⁵ Ndipo wakufwa yo wanguja songa, ndipo wangwamba kurongoro. Ndipo wangumpaska ku ŵanyina.

¹⁶ Ndipo chopu chinguŵako wose, ndipo ŵakankhuskanga Chiuta, ŵakuti, “Mchimi mura wayuka mwidu: ndipo, Chiuta walingiyapo pa khamu lake.”

¹⁷ Ndipo mbiri yeniyi paku iyo yingutuliya mu Yuda yose, ndi mu charu chose chakuzunguliya.

Nthumi zakutuwa kwaku Yohane Mbatizi

¹⁸ Ndipo ŵasambizi ŵaku Yohane ŵangumtauliya ghaku vyose vyenivi.

¹⁹ Ndipo wakujidaniya ŵangana ŵaŵi ŵa ŵasambizi ŵake, Yohane wanguŵatuma ku Ambuya, wakuti, “Kumbi imwe ndimwe yo watuza, pamwenga tilereziyenge munyake?”

²⁰ Ndipo ŵanguti ŵafika kwake wo ŵanthu, ŵanguti, Yohane Mbatizi watituma kwaku imwe, wakuti, “Kumbi imwe ndimwe yo watuza, pamwenga tilereziyenge munyake?”

²¹ Mu ora lenilo wanguchizga ŵanandi ku matenda ndi masuzgu ndi mizimu yiheni; ndipo ku ŵachiburumutiya ŵanandi wangupaska kulereska.

²² Ndipo wakwamuka wanguŵanene, “Rutani, mtauliyeni Yohane vyo mwawona ndi mwavwa; ŵachiburumutiya ŵalereska, ŵakuganthiya ŵatenda, ŵamakhate ŵaphotoleka, ŵamgota ŵatuvwa, ŵakufwa ŵayuskika, ŵasokwa ŵataulikiya evangeli.

²³ Ndipo ngwamwaŵi yose yo walive kuguŵiskika mwaku ine.”

²⁴ Ndipo ghachiruta mathenga gho ghaku Yohane, wangwamba kunene mzinda gha paku Yohane, “Mungutuliya ku bozwa kwachiwona chine kumbi? Dete lakusukunika ndi mphepu?

²⁵ Kweni mungutuliya kwachiwona chine? Munthu kumbi wakuvwalikika ndi minjirira yakuworofoka? Awonani, wo ŵavwalikika mu chivwaru cha manyanda ndi wajariya mu uthenjere, mba muufumu wa ŵakaronga.

²⁶ Kweni mungutuliya kwachiwona chine? Mchimi kumbi? Inyadi, ndikuneniyani, ndi wakuruskako ukongwa mchimi.

²⁷ Mwenuyu ndiyo kwamlembeke, ‘Awona ndituma thenga langu paurongo pa chisku chako, yo wamrongosole nthowa yako paurongo pako.’

²⁸ Ndikuneniyani, mu ŵakupapika ndi ŵanthukazi, palive yumoza muraku kwaku Yohane, kweni mumanaku mu ufumu waku Chiuta ndi muraku kwaku iyo.”

²⁹ Ndipo khamu lose lati lavwa, ndi ŵamthulu, ŵanguzomera Chiuta, pakubatizika ndi ubatizo waku Yohane.

³⁰ Kweni ŵaFarisi ndi ŵamarangu ŵangujikaniya khumbu laku Chiuta, pakuŵavi kubatizika ndi iyo.

³¹ “Viyo ndiŵalinganizgenge ndi chine ŵanthu ŵa mphapu iyi, ndi mbakukozgana ndi chine?

³² Mbakukozgana ndi ŵana ŵakuteka mu mphara, ndi ŵakudanana ndi ŵanyawo ndi ŵakuti, ‘Tingufyororoske imwe, ndipo kuti munguvina cha; tingutenje, ndipo kuti munguliya cha.’

³³ Chifukwa Yohane Mbatizi waza wambura kurgha chiŵande chingana nkhumwa vinyo, ndipo mutiti, ‘We ndi demone.’

³⁴ Waza Mwana wa munthu wakurgha ndi wakumwa; ndipo mutiti, ‘Awonani munthu nkharghi ndi mumwa-vinyo, bwezi la ŵamthulu ndi ŵalakwi.’

³⁵ Ndipo zeru yarunjiskika mu ŵana ŵake wose.”

Yesu mu nyumba yaku Simoni mu Farisi

³⁶ Ndipo yumoza wa ŵaFarisi wangumkhumbiya kuti warghe pamoza nayo. Ndipo wangusere mu nyumba ya muFarisi yo, ndi wanguja pasi pa kurgha.

³⁷ Ndipo onani, mu muzi mwenga munthukazi, mlakwi; ndipo wachiziŵa kuti wajanga pa kurgha mu nyumba ya muFarisi yo, wanguto supa ya sangarawe ya muro,

³⁸ wakuma kuvuli ku marundi ghake, wakuliya, wangwanda kuzumbwiska marundi ghake ndi masozi, ndi waghaleskanga ndi sisi la mutu wake, ndipo wafyofyonthanga marundi ghake, ndi waghatukutizganga ndi muro.

³⁹ Kweni wachiwona vyenivyo muFarisi yo wangumdana, wangunena mwaku yija, kuti, “Mwenuyu, asani wenga mchimi, mphanyi wanguziŵa njani ndi ngwakutinji yo munthukazi mweniyo watumkwaska, kuti ngwakulakwa.”

⁴⁰ Ndipo wakwamuka Yesu wanguti kwaku iyo, “Simoni, nde nako kanthu kukukambiya.” Ndipo iyo wali, “Msambizgi, kambani.”

⁴¹ “Wakulambiska ngana wenga nawo ŵamateu ŵaŵi: yumoza yo wanguteuwa matambala machumi pe chumi ghankhonde, ndi munyake yo machumi ghankhonde.

⁴² Po ŵengavi iwo kakulipiyapo, wanguŵagowoke ŵaka wose ŵaŵi. Viyo nunju waku wo wamwanjiskenge ukongwaku?”

⁴³ Wakwamuka, wanguti Simoni, “Ndighanaghana kuti ndiyo kwaku mweniyo wangugowoke chinandi cho.” Ndipo iyo wanguti kwake, “Weruzga kwakurunjika.”

⁴⁴ Ndipo pakung'anamukiya ku munthukazi yo, wanguti kwaku Simoni, “Kumbi umwona munthukazi uyu? Ndinguza munyumba yako, maji gha pa marundi ghangu kuti ungundipaska cha: kweni iyo ndi masozi wazumbwiska marundi ghangu, ndipo ndi sisi la mutu wake waghaleska.

⁴⁵ Mfyofyonthu kuti ungundipaska cha: kweni iyo, kwanda po ndinguzamu, kuti warekezga cha kufyofyontha marundi ghangu.

⁴⁶ Mutu wangu kuti ungupaka ndi mafuta cha: kweni iyo watukutizga ndi muro marundi ghangu.

⁴⁷ Chifukwa chenichi ndikunene, vyarekeka vyakulakwa vyake vinandi; pakuti wangwanja ukongwa; kweni kwaku yo kamanavi karekeke, watanja kamanavi.”

⁴⁸ Ndipo wanguti kwaku iyo, “Vyarekeka vyakulakwa vyako.”

⁴⁹ Ndipo ŵakujapo pamoza nayo pa kurgha ŵangwamba kunena mwaku ŵija, “Njani uyu yo wareke vyakulakwa navyo?”

⁵⁰ Kweni wanguti ku munthukazi, “Chivwanu chako chakutaska; kanga mu chimangu.”