Luka 6 - Tonga Bible 1986

Fumba ndi za Sabata

¹ Ndipo kunguŵa kuti pa Sabata wadumuwanga mu minda; ndipo ŵasambizi ŵake ŵademphuwanga masoyu, ndipo pakufikinya mu manja ŵarghanga.

² Ndipo ŵangana ŵamu ŵaFarisi ŵanguti, “Uli mutuchita cho nchambura kuyamu kuchita pa Sabata?”

³ Ndipo wakuŵamuka Yesu wanguti, “Mundachiŵerenge cho wanguchita Davidi, penipo wangufwa msara, iyo ndi ŵapamoza nayo;

⁴ mo wanguserere mu nyumba yaku Chiuta, ndi mo wangutole ndi wangurghiya viŵande vyakujarika, ndi wangupaskiyako ŵapamoza nayo; vyenivyo kuti nchakuyamu cha kurgha kweni ku ŵazukuru pe ŵija?”

⁵ Ndipo wangunena nawo, “Mwana wa munthu ndi mweni sabata.”

Wachizga munthu wajanja lakumira

⁶ Ndipo kunguŵa pa Sabata linyake wangusere iyo mu sinagoge ndi wasambizganga; ndipo wengamo munthu, ndi janja lake lamarghe lakumira.

⁷ Ndipo ŵalembi ndi ŵaFarisi ŵamkhazganga, vinu wakamchizganga pa Sabata; kuti asaniye mo ŵamsumuliye.

⁸ Kweni mweneko waziŵanga marunguruku ghawo; ndipo wanguti ku munthu yo wakuŵa ndi janja lakumira, “Soka, ndi ume mukati mo.” Ndipo wangusoka, wanguma.

⁹ Ndipo Yesu wanguti kwaku wo, “Ndifumba imwe, kumbi chiyamu pa Sabata kuchita umampha, pamwenga kuchita uheni? Kutaska umoyo, pamwenga kwananga?”

¹⁰ Ndipo wanguti walereska kwakuzunguliya paku wo wose, wanguti kwaku iyo, “Tambasuwa janja lako.” Ndipo wanguchita viyo: ndipo janja lake linguwerezgekamu.

¹¹ Ndipo iwo ŵanguzazika ndi ukari ndipo ŵakambirananga cho ŵangamchitiya Yesu.

Ŵasambizi chumi ndi ŵaŵi (12)

¹² Ndipo kunguŵa mu mazuŵa yagha kuti wangutuliya ku phiri kwachiromba; ndipo wajariyanga usiku wose mu kuromba Chiuta.

¹³ Ndipo penipo kungucha, wangudana ŵasambizi ŵake: ndipo wangusankhamu mwaku wo chumi ndi ŵaŵi, ŵeniwo nawo wanguŵatamula ŵakutumika;

¹⁴ Simoni, mweniyo wangumdana so Petro, ndi Andreya mhurwa wake, ndi Yakobe ndi Yohane,

¹⁵ ndi Filipu ndi Bartolomeyu, ndi Mateyu ndi Tomase, ndi Yakobe mwana waku Alifeyu, ndi Simoni wakutamulika mZelote,

¹⁶ ndi Yuda mwana waku Yakobe, ndi Yuda mKeriote, yo wanguŵa mphachi.

Yesu wasambizga ndi wachizga

¹⁷ Ndipo wanguti wasikiya pamoza nawo, wanguma pa malo gha chidika ndi mzinda ukuru wa ŵasambizi ŵake, ndi urapasi ukuru wa khamu kutuliya ku Yuda yose ndi Yerusalemu ndi ku likumba laku Turo ndi Sidoni, wo ŵanguza kwachimuvwa ndi kwachichizgika ku nthenda zawo;

¹⁸ ndipo ŵakukoŵeskeka ndi mizimu yawiyu ŵachizgikanga.

¹⁹ Ndipo mzinda wose ungulembe kumkwaska; pakuti nthazi yatuwanga mwake, ndi yaŵachizganga wose.

Likondwa ndi chitima

²⁰ Ndipo iyo, pakuyinuskiya maso ghake pa ŵasambizi ŵake, wanguti, “Mwe ŵamwaŵi mwaŵakavu; pakuti ngwinu ufumu waku Chiuta.

²¹ “Mwe ŵamwaŵi mwaŵanja sono; pakuti mugutiskikenge. “Mwe ŵamwaŵi ŵakuliya sono; pakuti musekenge.

²² “Mwe ŵamwaŵi, penipo ŵanthu ŵatinkhenge imwe, ndi penipo ŵakupatuweninge, ndi ŵatozenge ndi ŵatayenge zina linu nge ndiheni, pa chifwa cha Mwana wa munthu.

²³ Kondwani mu zuŵa liya, ndi yangarani: chifukwa onani mphoto yinu njikuru kuchanya; chifukwa ndimu ŵauskeu ŵachitiyanga ndi ŵamchimi.

²⁴ “Kweni owe kwaku imwe mwaŵasambasi! Pakuti mwarondapo sangarusku linu.

²⁵ “Owe kwaku imwe mwaŵakuguta sono! Pakuti mufwenge ndi nja. “Owe, mwaŵakuseka sono! Pakuti mutenjenge ndi muliyenge.

²⁶ “Owe, penipo ŵanthu wose ŵakambiyenge kwakunozga paku imwe! Pakuti kwakulinganalingana ŵauskeu ŵachitiyanga ŵamchimi ŵatesi.

Kwanja ŵamawongo

²⁷ “Kweni ndikuneniyani mwaŵakuvwa, muŵanje ŵamawongu ŵinu, chitiyani umampha wo ŵakukutinkhani,

²⁸ tumbikani wo ŵakutembani ŵarombiyeni wo ŵakuparamulani.

²⁹ Ku wakukupuma pa dakama, mpaske linyake so; ndipo ku wakupoka chivwinkhu chako ungakaniriya cha munjirira wo so.

³⁰ Paska kwaku yose wakukupempha, ndipo ku wakupoka vyako ungafumbako so cha.

³¹ Ndipo uli ndimo mukhumbiya kuti ŵanthu ŵachitiye imwe, namwe so chitiyani iwo kwakulingana.

³² “Ndipo asani mutanja ŵakukwanjani, mwe ndi chiwongu uli? Chifukwa ŵakulakwa nawo ŵatanja ŵakuŵanja.

³³ Ndipo asani muchitiya umampha ŵakukuchitiyani umampha, mwe ndi chiwongu uli? Chifukwa ŵakulakwa nawo ŵachita chenicho.

³⁴ Ndipo asani Mulambiska wo mugomekezga kurondako, mwe ndi chiwongu uli? Wakulakwa nawo ŵalambiska ŵakulakwa, kuti ŵarondengeko vyakulingana.

³⁵ Kweni muŵanje ŵamawongu ŵinu, ndipo ŵachitiyeni umampha ndi ŵalambiskeni kwambura kugomekezgako kanthu; ndipo mphoto yinu yiŵenge yikuru, ndipo mukaŵanga ŵana ŵa wamdengwendi: pakuti iyo ngwamampha ku ŵambura-kuwonga ndi ŵaheni.

³⁶ Muŵe ŵalisungu, ulaka nge mba Uskemwe mbalisingu.

Kweruzga kwakwenere

³⁷ “Mungeruzga cha, ndipo kuti mweruzgikenge awa, ndipo mungasuska cha, ndipo kuti mususkikenge awa; fwatuwani, ndipo mufwatulikenge;

³⁸ paskani, ndipo kupaskikenge kwaku imwe; mweso weneko, wakusindirika, ndi wakuyungunika, ndi wakufwapuka, ŵapaskenge mu chifuŵa chino chifukwa ndi mweso wo mutese, wesekiyenge so kwaku imwe.”

³⁹ Ndipo so wanguŵakambiya ntharika, “Kumbi wachiburumutiya wangorongozga wachiburumitiya? Asi wose ŵaŵi ŵawenge mu zenji?

⁴⁰ Kuti msambizi we pachanya pa msambizgi wake cha: kweni wakufiskika yose waŵenge nge ndi msambizgi wake.

⁴¹ Ndipo uli ulereska chipandi chamu jiso la mbali wako, kweni mthambi wamu jiso laku wamweni ureka kuteska?

⁴² Pamwenga unganene uli mbali wako, ‘Mbali, akha ndituzgi chipandi cha mujiso lako,’ penipo wamweni ulive kuona mthambi wamu jiso lako? Wakufuvya we, tuzgamu danga mthambi mu jiso lako, ndipo penipo wamwoneska kutuzga mu chipandi chamu jiso la mbali wako.

Chimuti ndi vipasi vyake

⁴³ “Chifukwa palive muti wamampha wakupasa chipasi chakuwo; chingana ndi muti wakuwo wakupasa chipasi chamampha.

⁴⁴ Chifukwa muti umoza ndi umoza uziŵikwa ndi chipasi cha weneko. Chifukwa ku minga kuti ŵayorako nkhuyu cha, chingana nkhuti ku kankhandi ŵakunkhako mphereska cha.

⁴⁵ Munthu wamampha mu mbiku yamampha ya mtima wake watomu cho nchamampha; ndi mheni nayo mu uheni watomu cho nchiheni: pakuti vyakutuwa mu ufurwi wamu mtima, mlomo wake urongoro.

Ŵazenge-nyumba ŵaŵi

⁴⁶ “Ndipo uli mutinditamula, ‘Ambuya, Ambuya,’ ndi mureka kuchita vyo ndinena?

⁴⁷ Yose yo watuza kwaku ine ndi ngwakuvwa mazu ghangu, ndi ngwakughachita, ndikurongoninge yo watumkozga.

⁴⁸ Wakozgana ndi munthu wakuzenga nyumba mweniyo wangukumba pasi ndi wangunyonyoska, ndi wanguŵika chiŵanja pa jarawe: ndipo pakuŵapo zandi, msinji ungukukurwiyapo pa nyumba yiya, ndipo yengavi nthazi kuyisukung'a: chifukwa yinguzengeka umampha.

⁴⁹ Kweni wakuvwa wambura kuchita wakozgana ndi munthu wakuzenga nyumba pa dongo kwambura chiŵanja; paku yeniyo msinji ungukukurwiya, ndipo sosonukweni yinguwa; ndipo phasulu la nyumba yiya lenga likuru.”