Luka 5 - Tonga Bible 1986

Yesu wadana ŵasambizi ŵake ŵakudankha

¹ Ndipo kunguŵa, uchinyekezgana pake mzinda wo kwachivwapo mazu ghaku Chiuta, mweneko nayo wamanga mu mphepete mu nyanja ya Genesarete;

² ndipo wanguwona vyombo viŵi vyamanga pa likumba: kweni ŵarovi ŵanguzuwuka mwaku vyo, ndipo ŵasukanga mikwau.

³ Ndipo wachisere mu chimoza cha vyombo vyo, cho chenga chaku Simoni, wangumpempha kukwerako kamanavi kutuwa ku mtunda. Ndipo wachija pasi mu chombo wasambizganga mizinda yo.

⁴ Ndipo wachimara kukamba, wanguti, kwaku Simoni, “Kweriyani ku ruji, ndi zingani somba ndi mikwau yinu.”

⁵ Ndipo Simoni wakwamuka wanguti, “Ambuya usiku wose tatakataka, ndipo kuti tatoko kanthu cha: kweni pa mazu ghinu ndithirenge mkwau.”

⁶ Ndipo wanguti wachita chenichi wanguzinga chivungu chikuru cha somba;

⁷ ndipo mikwau yawo yaparukanga; ndipo ŵangukonozga ku ŵamasanga mu chombo chinyake, ŵazichiŵawovya. Ndipo ŵanguza, ndi ŵanguzaza vyombo vyose viŵi, viyo kuti vyabiranga.

⁸ Kweni wachiwona, Simoni Petro wanguwa pa makongono ghaku Yesu, wakunena, “Tuwaniko kwangu, pakuti ndine munthu wakulakwa, Ambuya.”

⁹ Chifukwa chirwita chingumuko ndi wose ŵa pamoza nayo, pa chivungu cha somba zenizo wangutopo;

¹⁰ ndipo viyo so Yakobe ndi Yohane, ŵana ŵaku Zebediya, wo ŵenga ŵamasanga ndi Simoni. Ndipo Yesu wanguti kwaku Simoni, “Ungopanga, kwanda sono uŵenge murovi wa ŵanthu.”

¹¹ Ndipo ŵanguti ŵakwezga vyombo ku mtunda, ŵangusiya vyose, ndipo ŵangumrondo.

Yesu wachizga munthu wamakhati

¹² Ndipo kunguŵa, po wenga iyo mu umoza wa mizi yo, munthu wakuzala makhate: wanguti wawona Yesu, wanguwa kavunama, ndi wangumuŵeyere, wakuti, “Ambuya, asani mukhumba, mwe wanthazi kunditozga.”

¹³ Ndipo wanguti watambasuwa janja, wangumkwaska, wakuti, “Ndikhumba; utozgeke.” Ndipo sosonukweni makhate gho ghangutuwako kwake.

¹⁴ Ndipo mweneko wangumlanguliya kunene chingana njumoza cha; kweni kanga, “Kajirongo ku mzukuru, ndi upereke mpasku pa chiphotoka chako, uli ndimo wangulanguliya Mosese, nge nchisimikizgu kwaku wo.”

¹⁵ Kweni ukongwaku thenthe lawandiyanga paku iyo: ndipo mizinda yikuru yaungirananga kuvwa ndi kuchizgika matenda ghawo.

¹⁶ Kweni mweneko wabisamanga mu mabozwa, ndi warombanga.

Yesu wachizga munthu wavinjenje

¹⁷ Ndipo kunguŵa pa limoza la mazuŵa gho, kuti iyo wasambizganga; ndipo ŵajangapo ŵaFarisi ndi ŵasambizgi ŵa langulu wo ŵanguza kutuliya ku mizi yose yaku Galile ndi Yuda ndi Yerusalemu: ndipo nthazi ya Mbuya yenga nayo kwachichizga.

¹⁸ Ndipo awonani, ŵanthu, ŵakunyamuliya pamphasa munthu yo wenga wavinjenje, ŵapenjanga kumserezga ndi kumlarika paurongo pake.

¹⁹ Ndipo ŵachiura kusaniya mo ŵamserezgiyenge chifukwa cha mzinda wo, ŵangukwera pa bagha, ndi ŵangumsiskiya porotu mu ncherwa zo pamoza ndi mphasa zake mukati paurongo paku Yesu.

²⁰ Ndipo wachiona chivwanu chawo wanguti, “Wamunthu, vyarekeke iwe vyakulakwa vyako.”

²¹ Ndipo ŵangwamba ŵalembi ndi ŵaFarisi kukambirana, kuti “Ndiyani mwenuyu yo warongoro matuka? Njani wanthazi kureke vyakulakwa, kweni Chiuta pe yija?”

²² Kweni Yesu, wakuziŵa makambiranu ghawo, wangwamuka, wanguti kwaku wo, “Mukambirana chine mu mitima yinu?

²³ Nichi chiyuyu, kunena, ‘Vyarekeke iwe vyakulakwa vyako;’ pamwenga kunena, ‘Yuka ndi yendanga?’

²⁴ Kweni alinga kuti muziŵe kuti mwana wa munthu we nawo mtufu panupasi kureke vyakulakwa;” (wangumunene wavinjenje yo), “kwaku iwe ndinena, yuka, ndi to mphasa zako, ndipo rutanga ku nyumba yako.”

²⁵ Ndipo sosonukweni, pakuyuka paurongo pawo ndi pakuto cho warangapo, wanguruta ku nyumba yake, wakukankhuska Chiuta.

²⁶ Ndipo chirwita chinguŵako wose, ndipo ŵakankhuskanga Chiuta; ndipo ŵanguzazika chopu, ŵakukamba kuti, “Tawona vyakutondweska le.”

Yesu wadana Levi

²⁷ Ndipo pavuli paku vyenivi wangutuwa, ndipo wanguona wamthulu, zina lake Levi, wakuja pa malo gha mthulu, ndipo wangumunene, “Rondo ine.”

²⁸ Ndipo wakusiya vyose wangusoka, wangumrondo.

²⁹ Ndipo Levi wangumchitiya dghera likuru mu nyumba yake; ndipo wangapo mzinda ukuru wa ŵamthulu ndi ŵanyake wo ŵajanga nawo pa kurgha.

³⁰ Ndipo ŵaFarisi ndi ŵalembi ŵawo ŵadandauliyanga pa ŵasambizi ŵake, ŵakuti, “Chifukwa chine muturgha ndi mutumwa ndi ŵamthulu ndi ŵakulakwa?”

³¹ Ndipo wakwamuka Yesu wanguti kwaku wo, “Azima ŵalive usiwa wa ng'anga, kweni ŵakutama ndiwo.

³² Kuti ndikuziya cha kwachidana ŵarunji, kweni ŵakulakwa ku chipe.”

Fumbu ndi kufunga

³³ Ndipo ŵanguti kwaku iyo, “Ŵasambizi ŵaku Yohane ŵafunga panandi, ndipo ŵachita maniniziku; viyo so wo ŵa ŵaFarisi; kweni ŵako ŵaturgha ndi ŵatumwa.”

³⁴ Ndipo Yesu wanguti kwaku wo, “Kumbi mungafungiska ŵana ŵa nkhole, po mweneko wa nthengwa weche pamoza nawo?

³⁵ Kweni ghazenge mazuŵa; ndipo penipo mweneko wa nthengwa watuzgikenge kwaku wo, po ndipo ŵafungenge mu mazuŵa gha.”

³⁶ Ndipo so waŵakambiyanga ntharika, kuti, “Palive munthu wagambika chigamba cha munjirira ufya pa munjirira wakuvumuka; iku nadi waparuwenge wo ufya, ndipo kuti chigamba cho cha ku ufya wo chiyanenge cha ndi wakuvumuka wo.

³⁷ Ndipo palive munthu wapunguliya vinyo mufya mu vikopa vyakuguga; iku vinyo mufya yo waphwatuwenge vikopa vyo, ndi iyo wadikenge, ndi vikopa vyo vinangikenge.

³⁸ Kweni vinyo mufya watenere kupungulikiya mu vikopa vifya.

³⁹ Ndipo palive munthu wati wamwa vinyo wakali, wakhumba mufya: chifukwa watiti, ‘Wakali ndiyo wamampha.’ ”