Luka 4 - Tonga Bible 1986

Kweseka kwaku Yesu

¹ Ndipo Yesu, wakuzala ndi Mzimu Wakupaturika, wanguweko ku Yordane, ndipo warongozgekiyanga ndi Mzimu mu bozwa,

² mazuŵa machumi ghanayi (40) wakweseka ndi Diabolo. Ndipo kuti wangurgha kanthu cha mu mazuŵa ghenigha; ndipo ghachimara gho, wangufwa ndi nja.

³ Ndipo diabolo yo wanguti kwaku iyo, “Asani we Mwana waku Chiuta, unene mwa uwu kuti uŵe chiŵande.”

⁴ Ndipo Yesu wangwamuka kwaku iyo, “Kwalembeka, kuti, ‘Munthu wajariyenge wamoyo ndi chiŵande chija pe cha.’ ”

⁵ Ndipo wanguti wamkwezga, wangumrongo maufumu ghose gha uzengi mu kamphindi ka nyengo.

⁶ Ndipo diabolo yo wanguti kwaku iyo, “Kwaku iwe ndipaskenge mtufu uwu wose, ndi unkhankhu waku vyo: pakuti kwaku ine waninkhika; ndi kwaku mweniyo ndikhumba ndiupaska.

⁷ Viyo asani iwe ulambiyenge pa chisku changu, vyose viŵenge vyako.”

⁸ Ndipo wakwamuka Yesu wanguti kwaku iyo, “Kwalembeka, ‘Ulambiyenge Mbuya Chiuta wako, ndipo iyo pe yija umsopenge.’ ”

⁹ Ndipo wangumrongozge ku Yerusalemu, ndipo wangumumika pa kasongo ka kasopi, ndi wanguti kwaku iyo, “Asani we Mwana waku Chiuta, ujipong'e pasi:

¹⁰ pakuti kwalembeka, ‘Ŵangelo ŵake waŵalanguliyenge paku iwe, kwachikusungirizga’:

¹¹ ndipo, ‘Mu manja ŵakunyamuliyenge, vinu ungagunyuwa pa mwa phazi lako.’ ”

¹² Ndipo wakwamuka Yesu wanguti kwaku iyo, “Kwaneneka, ‘Ungesanga cha Mbuya Chiuta wako.’ ”

¹³ Ndipo penipo diabolo wangumara mesedu ghose wangutuwako kwaku iyo mpaka pa nyengo yakutemeka.

Yesu watamba nchitu yake mu Galile

¹⁴ Ndipo Yesu wanguwere mu Galile mu nthazi ya Mzimu Wakupaturika: ndipo mbiri yapaku iyo yinguwanda mu charu chose chakuzunguliya.

¹⁵ Ndipo mweneko wasambizganga mu masinagoge ghawo, wakukankhuskika ndi wose.

Yesu wakanika mu Galile

¹⁶ Ndipo wanguza ku Nazarete, kweniko wangulereka: ndipo wangusere mu sinagoge mwa karusu kake pa zuŵa la Sabata, ndipo wangusoka kwachiŵerenga.

¹⁷ Ndipo kungupaskika kwake buku la mchimi Yesaya. Ndipo wanguti wabanuwa buku lo, wangubowozga malo penipo pangulembeka,

¹⁸ “Mzimu wa Mbuya we paku ine, pakuti wangunditukutizgiya kutauliya ŵakavu ghakunozga. Wandituma kumemeze chifwatuwa ku ŵamikoli ndi kuŵachiburumutiya chiwona so, kuŵadomo ŵakuphwanyika,

¹⁹ kumemeza chirimika chamarondeka cha Mbuya.”

²⁰ Ndipo wanguti wajara buku lo, wangulipaska ku mumirizi, ndipo wanguja pasi: ndipo maso ghaku wose mu sinagoge ghaŵanga pake dodoli.

²¹ Ndipo wanguwanda kuŵakambiya kuti, “Le lafiskika lembo lenili mu makutu ghinu.”

²² Ndipo wose ŵangumsimikizgiya, ndipo ŵatondwanga pa mazu gha wezi ghakutuwa mu mlomo wake; ndipo ŵanenanga, “Asi uyu ndi mwana waku Yosefe?”

²³ Ndipo wanguti kwaku wo, “Posepose mundineniyenge ntharika yeniyi, ‘Ng'anga, ujichizge; vyenivyo vyose tavwa vyachitika mu Kapernaumu, chitanga muno so mu charu cha kwako.’ ”

²⁴ Ndipo wanguti, “Nadidi ndinene imwe, Palive mchimi wamarondeka mu charu cha kwake.

²⁵ Kweni kwakuneneska ndikuneniyani, mwenga vyoko vinandi mu Yisraele mu mazuŵa ghaku Eliya penipo kuchanya kungujarika virimika vitatu ndi myezi yinkhonde ndi umoza, po chinguŵiyapo chilala chikuru pa charu chose.

²⁶ Ndipo chingana nkhu yumoza kuti wangutumika Eliya cha, kweni ku munthukazi choko ku Sarepta waku Sidoni.

²⁷ Ndipo ŵamakhati ŵanandi ŵengamu Yisraele pa nyengo yaku Elisha mchimi yo: ndipo pengavi yumoza waku wo wanguphotoreka, kweni Namani mu Siriya yo.”

²⁸ Ndipo wose ŵanguzazika ndi chikwiya mu sinagoge, ŵachivwa yagha;

²⁹ ndipo ŵangusoka, ŵangumpong'a kubwaro ku muzi, ndipo ŵanguka nayo ku sendemu la phiri penipo muzi wawo unguzengeka, kwachimpong'a pasi kasindira mutu.

³⁰ Kweni wangusorota mukati mwawo wanguruta.

Munthurumi yo wenga ndi mzimu wauyu

³¹ Ndipo wangusikiya ku Kapernaumu, muzi waku Galile. Ndipo waŵasambizganga pa masabata:

³² ndipo ŵazizwanga pa chisambizgu chake; pakuti mazu ghake ghenga ndi mtufu.

³³ Ndipo mu sinagoge mwenga munthu wakuŵa ndi mzimu wa demone wawiyu; ndipo wangukambura ndi liu likuru,

³⁴ “Owe! Te ndi chine ndi iwe, Yesu waku Nazarete? Kumbi waziya kwachinanga ifwe? Ndikuziŵa mo uliri, Wakupaturika we waku Chiuta.”

³⁵ Ndipo Yesu wangumchenya, wakuti, “Sunama, ndi tuwamo mwake.” Ndipo demone yo, wanguti wampong'a pasi, wangutuwamo mwake kwambura kumpweteka kose.

³⁶ Ndipo munthondwi unguŵaŵiya wose, ndipo ŵakambirananga, ŵakuti, “Ngane mazu yagha, pakuti ndi mtufu ndi nthazi walanguliya mizimu yawiyu, ndipo yituwa?”

³⁷ Ndipo mbiri yapaku iyo yawandiyanga mu malo ghose gha charu chakuzunguliya.

Yesu wachizga ŵanthu ŵanandi

³⁸ Ndipo wanguti wasokako ku sinagoge lo, wanguza mu nyumba yaku Simoni. Ndipo mpongozi waku Simoni wakorekanga ndi muliŵavu mukuru; ndipo wangumpempha iyo.

³⁹ Ndipo wanguti wamiyapo pake, wanguchenya muliŵavu, ndipo mungumtaya: ndipo wanguti wayuka sosonukweni waŵateŵetiyanga.

⁴⁰ Ndipo lichisere dazi wose ŵeniwo ŵaŵanga ndi ŵakutama ndi matenda cha mitundumitundu, ŵanguza nawo kwaku iyo. Ndipo iyo wanguti waŵikapo manja paku wo yumoza ndi yumoza, wanguŵachizga.

⁴¹ Ndipo ŵademone nawo ŵatuwangamo mu ŵanandi, ŵakukambura ndi ŵakuti, “Iwe ndiwe Mwana waku Chiuta!” Ndipo wanguŵachenya, kuti waŵazomerezganga kurongoro cha, pakuti ŵamziŵanga kuti wenga Kristu.

Yesu wauza mu sinagogi

⁴² Ndipo kunguti kwacha, wangutuwako, wanguruta ku malo ghabozwa; ndipo mizinda yo yampenjanga ndi yinguza kwake, ndipo yamumikanga kuti wangatuwako kwaku wo cha.

⁴³ Kweni iyo wanguti kwaku wo, “Kutindenere kutaula makani ghakunozga gha ufumu waku Chiuta mu mizi yamwenga so: pakuti ndatumikiya chenichi.”

⁴⁴ Ndipo wamemezanga mu masinagoge ghaku Galile.