Luka 24 - Tonga Bible 1986

Chiyuka chaku Yesu

¹ Kweni pa zuŵa la chimoza la lisabata, pa chivivivi, ŵanguza ku muunda wo, ŵakupinga vyema vyenivyo ŵangurongoso.

² Ndipo ŵangusaniya mwa wakunkhuruskikako ku muunda wo.

³ Ndipo ŵachiseremo wengavi kusaniya thupi la Ambuya Yesu.

⁴ Ndipo kunguŵa ŵeche kuzizikikapo, onani so, ŵanthurumi ŵaŵi ŵangumapo pamoza nawo mu chivwaru chakugadima;

⁵ ndipo pakuŵa iwo ŵakofyeka ndi ŵakubwanthuskiya visku pasi, ŵanguŵafumba, “Chifukwa chine mutumpenja wamoyo pamoza ndi ŵakufwa?

⁶ Kuti we panu cha, kweni wayuka: kumbukani mo wangumuneniyani, weche mu Galile,

⁷ wakuti, kutenere Mwana wa munthu kupachirika mu manja gha ŵanthu ŵalakwi, ndi kupayikika, ndi pazuŵa lachitatu kuyuka so.”

⁸ Ndipo ŵangukumbuka maneno ghake;

⁹ ndipo, ŵati ŵaweko ku muunda, ŵangutauliya vyose vyenivi kwaku wo chumi ndi yumoza, ndi kwaku wose ŵakujapo.

¹⁰ Ndipo kwenga Mariya waku Magdala, ndi Joana, ndi Mariya nyina waku Yakobe: ndipo ŵanthukazi ŵakujapo ŵapamoza nawo ŵakonkhomiyanga vyenivi ku ŵakutumika.

¹¹ Ndipo makani yagha ghanguoneka pa maso pawo nge nkhawanawana; ndipo kuti ŵavwananga nawo cha.

¹² Kweni Petro wangusoka, wanguchimbiriya ku muunda wo; ndipo pakukotama wangulingirizgamo ndi kuwona zabafuta paku zija; ndipo wanguruta kwake, wakuzizwa pa chakuŵapo cho.

Ŵanthu ŵaŵi ŵatuwa ku Yerusalemu ŵatiya ku Emause

¹³ Ndipo alereni, ŵaŵi ŵaku wo ŵarutanga mu zuŵa leniliya ku muzi, zina lake Emause kutari ku Yerusalemu uli ndi miŵangu ya machumi ghankhonde ndi limoza.

¹⁴ Ndipo iwo ŵakambirananga vyakuŵapo vyenivyo vyose.

¹⁵ Ndipo kunguŵa ŵachikambirana ndi kufumbana yiwo, Yesu nayo mwenecho wanguŵandika, wangwende nawo pamoza.

¹⁶ Kweni maso ghawo ghangukoleka, mwakuti kuti ŵangamziŵiska cha.

¹⁷ Ndipo wanguti kwaku wo, “Ngane mazu yagha, ghenigho mukambirana muchenda?” Ndipo ŵanguma ŵaka jo, ŵakuzimbwa.

¹⁸ Ndipo yumoza, zina lake Kleopa, wangwamuka, wanguti kwaku iyo, “Kumbi iwe uja paku wijawija mu Yerusalemu, ndi ureka kuviziŵa vyakuŵapo mwake mu mazuŵa yegha?”

¹⁹ Ndipo wanguti kwaku wo, “Vinthu uli?” Ndipo iwo wangumunene, “Vyapaku Yesu waku Nazarete, mweniyo wenga munthu mchimi wanthazi mu nchitu ndi mu mazu paurongo paku Chiuta ndi khamu lo lose.

²⁰ Mo so ŵazukuru ŵara ndi ŵara ŵidu ŵangumkombole ku chisusa cha nyifwa, ndi mo ŵangumpayikiya.

²¹ Kweni ifwe tagomekezganga kuti ndiyo wakawombonga Yisraele, nadi, ndipo pachanya paku vyose le ndi zuŵa lachitatu kwanda penipo vinguŵiyapo vyenivi.

²² Kweni ŵanthukazi ŵangana ŵamwaku ifwe ŵangutirwitiska, ŵanguti ŵaŵapo ndi mlenjilenji pa muunda wo;

²³ ndipo ŵanguti ŵareka kusaniya thupi lake, ŵanguza, ŵakuti so ŵanguwona chiwona cha ŵangelo, ŵeniwo ŵangukamba kuti wenga wamoyo iyo.

²⁴ Ndipo ŵanyake ŵapamoza nafwe, ŵanguruta ku muunda wo, ndipo ŵangusaniya viyo uli ndimo ŵanthukazi wo ŵangunene: kweni mwenecho kuti ŵangumwona cha.”

²⁵ Ndipo iyo wanguti kwaku wo, “Mwaŵazira kuwamo ndi ŵachizita mu mtima, kuvwaniya mwaku vyose vyenivyo ŵangurongoro ŵamchimi wo!

²⁶ Asi kungumwenere Kristu yo kukomwa vyenivi, ndi kuseremu mu unkhankhu wake?”

²⁷ Ndipo pakwandiya paku Mosese ndi paku wose ŵamchimi wo, wanguŵang'anamuliya mu malembo ghose vyo vyapaku iyo yija.

²⁸ Ndipo ŵanguŵandikiya kumuzi kweniko ŵayanga: ndipo iyo wanguchita nge warutiriyapo.

²⁹ Ndipo ŵangumukakamizga, ŵakuti, “Tandarani nafwe, pakuti nkhu mazuro, ndipo zuŵa lapendama kali, ndipo wangusere kwachitandara nawo,”

³⁰ ndipo kunguŵa, wachija nawo pa kurgha, wanguti wato chiŵande, wanguchitumbika, ndipo wanguti wamenya, wapaskanga kwaku wo.

³¹ Ndipo maso ghawo ghangujurika, ndipo ŵangumziŵiska; ndipo iyo wanguŵangwarangwanduka.

³² Ndipo ŵangunenerana, “Asi mtima widu wakolenga mwidu, po wakambiyanga nafwe mu nthowa, po wabanuliyanga ifwe malembo gho?”

³³ Ndipo ŵangusoka mu ora lenilo pe, ŵanguwere ku Yerusalemu, ndipo ŵangusaniya ŵa ungana chumi ndi yumoza wo, ndi wo ŵapamoza nawo,

³⁴ wakuti, “Nadidi ŵayuka Ambuya, ndipo ŵawoneke Simoni.”

³⁵ Ndipo iwo ŵangukonkhoska vya mu nthowa yo, ndimo wanguziŵikwiya kwaku wo mu chimenya cha chiŵande cho.

Yesu wawoneka ku ŵasambizi ŵake

³⁶ Ndipo ŵachakonkhoma vyenivyo iwo, mweneko wanguma mukati mwawo ndipo waŵanene, “Chimangu kwaku imwe!”

³⁷ Kweni pakutenthemeskeka ndi kopa, ŵaghanaghananga kuti ŵanguwona mzimu.

³⁸ Ndipo wanguti kwaku wo, “Mumbwambwanthiyanji? Ndipo chifukwa chine marunguruku ghayukiya mu mtima winu?

³⁹ Ghalereskeni manja ghangu ndi marundi ghangu, kuti ndine ndamweni: nditoskeni, ndi onani; pakuti mzimu walive nyama ndi viwanga, nge ndi mo muwone ine kuŵa navyo.”

⁴⁰ Ndipo wanguti wanena chenichi, wanguŵarongo manja ndi marundi.

⁴¹ Ndipo ŵenga ŵeche ŵambura kuvwana iwo pa chifwa cha chimwemwe, ndipo ŵeche kurwita, wanguti kwaku wo, “Kumbi mwe nako kakurgha penipanu?”

⁴² Ndipo ŵangumpaska chipindi cha somba yakubika.

⁴³ Ndipo wanguchito ndi wangurghiya pa maso pawo.

⁴⁴ Ndipo wanguti kwaku wo, “Agha ndi mazu ghangu ghenigho ndingurongoro namwe, ndenga ndeche pamoza namwe, ghakuti, nkhwakwenere vifiskike vinthu vyose vyakulembeke paku ine mu langulu laku Mosese, ndi mu ŵamchimi ndi mubuku la Sumu.”

⁴⁵ Sono wangubanuwa chinjeru chawo kuwamo mu malembo gho;

⁴⁶ ndipo wanguti kwaku wo, “Viyo kwalembeka, kuti Kristu wakomwe, ndi wayuke so ku ŵakufwa pa zuŵa lachitatu;

⁴⁷ ndi kuti ching'anamuka ndi chireke cha vilakwa vimemezeke mu zina lake ku mitundu yose, kwanda ku Yerusalemu.

⁴⁸ Imwe mwe ŵakaboni ŵa vinthu ivi.

⁴⁹ Ndipo awonani, ine nditumiya paku imwe phanganu la Ada: kweni tandarani imwe mu msumba, mpaka mufukika ndi nthazi yakutuliya kuchanya.”

Yesu wakwera kuchanya

⁵⁰ Ndipo wanguŵarongozge kubwaro mpaka kuthoŵana ndi Betaniya: ndipo wanguti wasoska manja ghake, wanguŵatumbika.

⁵¹ Ndipo kunguŵa, weche kuŵatumbika iyo, wangupatukako kwaku wo, ndipo wanyamulikiyanga kuchanya.

⁵² Ndipo iwo, ŵanguti ŵamlambiya, ŵanguwere mu Yerusalemu ndi chimwemwe chikuru.

⁵³ Ndipo ŵajaririyanga viyo mu kasopi ŵakutumbika Chiuta.