Luka 23 - Tonga Bible 1986

Yesu watoreke kwaku Pilato

¹ Ndipo chingusoka chiuru chose chaku wo, chingumgumizgiya kwaku Pilato.

² Ndipo ŵangwanda kumsumuwa, ŵakuti, “Uyu tingumsaniya wakunyongo mtundu widu, ndi wakukanizga kupaska mthulu kwaku Kaisare, ndi wakujinena mwenecho kuŵa Kristu Karonga.”

³ Ndipo Pilato wangumfumba, wakuti, “Kumbi ndi we Karonga wa ŵaYuda?” Ndipo pakumwamuka watinge, “Iwe unena.”

⁴ Ndipo Pilato wanguti ku ŵazukuru ŵara ndi ku mizinda, “Kuti ndisaniya cha kafukwa mu munthu mwenuyu.”

⁵ Ndipo yiwo ŵangungangamika, wakuti, “Waliyuska khamu wakusambizga mu Yuda mose, kwamba ku Galile mpaka kuno.”

⁶ Ndipo Pilato wanguti wavwa, wangufumba asani munthu wenga muGalile.

⁷ Ndipo wachiziŵiska kuti wenga waku ukumu waku Herode, wangumtuma kwaku Herode, pakuŵa iyo nayo mu Yerusalemu mu mazuŵa yagha.

Yesu watumika kwaku Herode

⁸ Ndipo Herode, wachimuwona Yesu, wangukondwa ukongwa; chifukwa kwamba kali wakhumbanga kumwona, chifukwa cha kuvwa vinandi vyapaku iyo; ndipo wagomekezganga kwachiwona chisimikizgu chakuti, kuchitika ndi iyo.

⁹ Ndipo wangumfumba kwa nyengo yitali kweni iyo kuti wangumwamuka kanthu cha.

¹⁰ Ndipo ŵangumapo ŵazukuru ŵara ndi ŵalembi wo, ŵakumsumuwa kwakutazama.

¹¹ Herode nayo pamoza ndi ŵankhondo ŵake ŵati ŵamyeya ndi kumtombozga, ŵangumvwarika chivwaru charopa, ndipo wangumwezge kwaku Pilato.

¹² Ndipo ŵanguŵa ŵabwezi Herode ndi Pilato mu zuŵa leniliya: chifukwa kali ŵangupindikana mwaku ŵija.

Yesu wakomboreke ku nyifwa

¹³ Ndipo Pilato wangudaniya pamoza ŵazukuru ŵara ndi ŵara ndi khamu lo,

¹⁴ ndipo wanguŵanene, “Mungutole ine munthu mwenuyu nge ngwakulinyongo khamu: ndipo, onani, ine ndati ndamfumbiya paurongo pinu, ndengavi kusaniya kose mu munthu uyu kafukwa kaku vyenivyo mumsumuliya,

¹⁵ chingana ndi Herode; chifukwa wamwenge kwaku ifwe: ndipo, onani, palive kanthu kakwenere nyifwa kachitika ndi iyo.

¹⁶ Viyo nditakuti ndamkwechuwa, ndimfwatuwenge.” [

¹⁷ Pa dghera lose la phaska Pilato waŵafwatuliyanga wakumangika yumoza.]

¹⁸ “Kweni ŵangukambura wose pamoza, ŵakuti, ‘Mtuzgepo uyu, kweni tifwatuliye Baraba:’ ”

¹⁹ munthu mweniyo chifukwa cha chigaruka chakuti, chakuchitika mu msumba, ndi chifukwa cha umbanda, wanguŵikika mu ulinda.

²⁰ Viyo Pilato wangukamba nawo so, pakukhumba kumfwatuwa Yesu;

²¹ kweni ŵa ŵakamburanga, ŵakuti, “Payika, payika iyo.”

²² Ndipo kachitatu wanguti kwaku wo, “Chifukwa chine; wachita chiheni uli uyu? Ndirive kusaniya mwake kafukwa ka nyifwa: viyo nditakuti ndamkwechuwa, ndimfwatuwenge.”

²³ Kweni iwo ŵangukokomezgapo ndi makambuliru ghakuru, ŵakulembe kuti wapayikike iyo. Ndipo makambuliru ghawo ghanguruskako.

²⁴ Ndipo Pilato wangulangula kuti kuchitike uli ndi kukhumba kwawo.

²⁵ Ndipo wangumfwatuwa yo wangutayika mu ulinda chifukwa cha chigaruka ndi umbanda, mweniyo ŵangulembeze; kweni Yesu wangumkombole ku khumbo lawo.

Yesu wapayikika pa mphinjika

²⁶ Ndipo ŵachimgumizga, ŵanguko yumoza, Simoni waku Kurene, wakutuwa ku viŵera, ndipo ŵanguŵika pake mphinjika yo, kuyinyamuwa kuvuli kwaku Yesu.

²⁷ Ndipo kungumrondo mpingu ukuru wa khamu lo, ndi wa ŵanthukazi, ŵeniwo ŵamliriyanga ndi ŵamtenjerenga.

²⁸ Kweni Yesu wangung'anamukiya kwaku yiwo, wanguti, “Mwa ŵanthukazi ŵaku Yerusalemu, mungaliriyanga paku ine cha, kweni liriyani paku mwaŵeni ndi pa ŵana ŵinu.

²⁹ Pakuti awonani ghatuza mazuŵa mwaku ghenigho ŵanenenege, ‘Vyamwaŵi vyo vyumba, ndi vibali vyenivyo vyengavi kupapa, ndi maŵe ghenigho ghengavi konkheska!’

³⁰ Penipo ŵambenge kughanene mapiri, ‘Wiyanipo paku ifwe;’ ndi ku mitunthu, ‘Tivunikiriyeni!’

³¹ Pakuti, asani ku muti uŵisi ŵachita ivi nakuwakumira kukaŵanga chine?”

³² Ndipo ŵarongozgekanga ŵamwenga so, ŵakuchita uheni ŵaŵi, kwachibayika pamoza nayo.

³³ Ndipo penipo ŵangufika pa malo, gho ghatamulika Kalvare, po ndipo ŵangumpayika, ndi ŵakuchita uheni wo, uyu ku marghe, ndi uyu ku maze.

³⁴ Ndipo Yesu wanguti, “Ada, ŵarekeni chifukwa kuti ŵaziŵa cha cho ŵachita.” Ndipo pakugaŵana minjirira yake, ŵangupong'a mphenduzga.

³⁵ Ndipo lamanga khamu lo lakulereze. Ndipo ŵara nawo ŵamtozanga, ŵakuti, “Ŵanyake wanguŵataska; wajitaske mweneko, asani ndi Kristu waku Chiuta, wakusankhika wake.”

³⁶ Ndipo ŵankhondo nawo ŵangumyeya, ŵakumziya ndi ŵakusaska vinyo wakusasa,

³⁷ ndi ŵakuti, “Asani iwe ndiwe karonga wa ŵaYuda, ujitaske wamweni.”

³⁸ Ndipo kwenga so lembo pachanya pake, “UYU NDI KARONGA WA ŴAYUDA.”

³⁹ Ndipo yumoza wa ŵakuchita uheni wo ŵangupayikika, wamtukanga, wakuti, “Asi iwe ndiwe Kristu yo? Jitaske wamweni ndi ifwe.”

⁴⁰ Kweni munyake yo wangwamuka, wangumchenya, watinge, “Asi utopa chinganga ndi Chiuta? Pakuti we mu chisusa chenicho pe.

⁴¹ Ndipo ifwe nadi nchakutenere pakuti tironde vyakwenere vyenivyo tachita: kweni uyu walive kuchita kanthu kakusovya.”

⁴² Ndipo wangunena, “Yesu, undikumbuke, uchiza mu ufumu wako.”

⁴³ Ndipo wanguti kwaku iyo, “Nadi ndikunene, le uŵenge mu Paradiso pamoza nane.”

Nyifwa yaku Yesu

⁴⁴ Ndipo kwenga ulaka mpha ora lachinkhonde ndi chimoza, po mdima unguwiya pa charu chose mpaka ora lachinkhonde ndi chinayi;

⁴⁵ lati lafumphiya lumwi; ndipo chijaru cha kasopi chinguparuka pakatikati.

⁴⁶ Ndipo Yesu, wakubongo ndi mazu ghakuru, wanguti, “Ada, mu manja ghinu ndiŵika mzimu wangu!” Ndipo wanguti wanena chenichi wangumara mtima.

⁴⁷ Ndipo nduna yo, yichiona cho chinguŵapo, yamkankhuskanga Chiuta, yakuti, “Nadidi munthu mwenuyu wenga murunji.”

⁴⁸ Ndipo mizinda yose yo yingongerana pa chilereska chenichi, pakuona vyakuŵapo vyo, yawenga yakujipamantha pa vifuŵa.

⁴⁹ Ndipo wose wakuziŵiriyana nayo, ndi ŵanthukazi wo ŵangurongozgana nayo kutuliya ku Galile, ŵamanga kutaliko, ŵakulereska vyenivi.

Yesu waŵikika mu muunda

⁵⁰ Ndipo onani, munthu ndi zina Yosefe, waupu,

⁵¹ munthu wamampha ndi murunji (wengavi iyo kuzomerezgana ndi fundu ndi nchitu zawo), waku Arimataya, muzi wa ŵaYuda, mweniyo walerezenga ufumu waku Chiuta;

⁵² mweniyo wangwachifika kwaku Pilato, ndipo wangupempha thupi laku Yesu.

⁵³ Ndipo wanguti walipauwa, wangulifunga mu bafuta, ndipo wangumuŵika mu muunda wakuchongeka mu mwa. Mwenimo mwengavi kuŵikikamo yumoza kali.

⁵⁴ Ndipo zuŵa lenga la chirongoso, ndipo sabata laŵandikanga.

⁵⁵ Ndipo ŵanthukazi, ŵeniwo ŵanguza pamoza nayo kutuwa ku Galile, ŵangurondo pavuli, ndipo ŵanguwona muunda ndi mo linguŵikikiya thupi lake.

⁵⁶ Ndipo ŵanguwe, ndipo ŵangurongoso vyema ndi mafuta ghakumtukutizga. Ndipo pa Sabata ŵangupumuwa kwakulingana ndi langulu lo.