Luka 22 - Tonga Bible 1986

Ŵazukuru ndi ŵaFarisi wapangana kumuko Yesu

¹ Ndipo laŵandikanga dghera la vyambura mtupu, lakutamulika Phaska.

² Ndipo ŵapenjanga ŵazukuru ŵara ndi ŵalembi mo ŵambayiyenge; chifukwa wopanga khamu lo.

Yuda wapangana kumu kombo Yesu

³ Ndipo Satana wangusere mwaku Yuda, wakutamulika mKeriote, wakuŵa mu kupendeka kwa chumi ndi ŵaŵi wo.

⁴ Ndipo wanguruta, wangurongoro ndi ŵazukuru ŵara ndi zinduna, mo wangampereke kwaku iwo.

⁵ Ndipo ŵangukondwa, ndi ŵangupangana kumpaska ndrama.

⁶ Ndipo wanguzomera, ndi walembenga nyengo yakufwasa kwachimpereka kwaku iwo ku ubende ku mzinda.

Yesu warongoso kurgha dghera la phaska

⁷ Ndipo linguza lo zuŵa la vyambura mtupu, mwaku lenile kutenere kubayiya phaska.

⁸ Ndipo wangutuma Petro ndi Yohane, wakuti, “Rutani, tirongosoliyeni phaska, alinga tirghenge.”

⁹ Ndipo ŵanguti kwaku iyo, “Mukhumba tikarongosole pani?”

¹⁰ Ndipo iyo wanguŵanene, “Awonani, mwati mwasere mu msumba wo, wakumanenge namwe munthu wakupinga chiŵiya cha maji; mrondoni mu nyumba mwenimo wasere.

¹¹ Ndipo muneniyenge mweninyumba yo, ‘Muwomba watiti, Che pani chipinda cho cha ŵalendo, mwenimo ndirghenge phaska pamoza ndi ŵasambizi ŵangu?’

¹² Ndipo yuwa wamrongo imwe chamchanya chikuru chakuruliskika; kweniko rongosoni.”

¹³ Ndipo ŵanguruta, ŵangusaniya uli ndi mo wanguŵanene; ndipo ŵangulirongoso phaska.

Njonesku ya Ambuya

¹⁴ Ndipo penipo linguza ora lo, wanguja pasi, ndi ŵakutumika wo pamoza nayo.

¹⁵ Ndipo wanguti kwaku yiwo, “Ndi linweka ndanweka kurgha pamoza namwe phaska lenili, ndenga ndindakomwe:

¹⁶ chifukwa ndikuneniyani, kuti nkharghanga lo cha, mpaka lingafiskika mu ufumu waku Chiuta.”

¹⁷ Ndipo wanguronde jomera, ndipo wati wawonga wanguti, “Toni lenili, ndi gaŵanani:

¹⁸ chifukwa ndikuneniyani kuti kwanda sono kuti nkhamwangapo cha chipasi cha mphereska, mpaka ufumu waku Chiuta ukazanga.”

¹⁹ Ndipo wanguto chiŵande, ndipo wati wawonga wangumenya, ndi wangupaska kwaku wo, wakuti, “Chenichi ndi liŵavu langu, [lakupaskikiya chifukwa chaku imwe; chenichi chitiyani kwachikumbuka ine.”

²⁰ Viyo so jomera nalo pavuli pa koneska, wakuti, “Jomera lenili nchipanganu chifya mu ndopa zangu, zakudikiya pa chifwa chaku imwe.]

²¹ Kweni wonani, janja la wakundikombo le nane pamoza pa gome.

²² Pakuti nadi Mwana wa munthu waruta, kwakulingana ndi chakutemeka: kweni owe kwaku yo munthu, mwaku mweniyo wakomboleke!”

²³ Ndipo iwo ŵangwamba kufumbana mu ŵeneko, kuti, ndiyani mwaku wo wangukhasa kuchita chenichi.

Suskanu yakuti muraku njani

²⁴ Ndipo so kunguŵa suskanu mwaku wo, yakuti, njani waku wo wawoneka kuŵa mraku.

²⁵ Kweni wanguŵanene, “Ŵakaronga ŵa mitundu ŵatufuliya ŵanthu ŵawo, ndiŵakuŵatufuliya ŵatamulika akwene.

²⁶ Kweni imwe viyo cha; kweni mraku mwaku imwe waŵenge nge ndi mumanako; ndi chirongozgi nge ngwakuteŵeta.

²⁷ Chifukwa mraku njani, wakuja pa kurgha, pamwenga wakuteŵeta? Asi ndiyo waja pa kurgha? Kweni ine nde mukati mwinu uli ngwakuteŵeta.

²⁸ “Kweni imwe mwaŵa ŵakujaririya pamoza nane mu mesedu ghangu; ndipo ndimikiya imwe ufumu,

²⁹ uli ndimo Ada ŵakumikiya ine,

³⁰ alinga kuti murghenge ndi mumwenge pa gome langu mu ufumu wangu; ndipo mujenge pa vitengu, ŵakweruzga mafuku chumi ndi ghaŵi ghaku Yisraele.

Yesu wakamba ndi kumkana kwaku Petro

³¹ “Simoni, Simoni, awona Satana yo wangujifumbiya imwe kwachimpepetani uli ndi trigu:

³² kweni ine ndinguŵeyerere paku iwe, alinga kuti chingapereŵe cha chivwanu chako; ndipo iwe, utakuti wang'anamuka, khozganga ŵabali ŵako.”

³³ Ndipo iyo wangumunene, “Ambuya, pamoza ndi imwe ndi wakurongosoleka kuruta kosekose, ku ulinda ndi ku nyifwa.”

³⁴ Ndipo iyo wanguti, “Ndikunene, Petro, kuti tambala wenga wandakokoŵereke usiku uno undikanenge katatu, kuti ulive kundiziŵa.”

Chikwama, thumba ndi lipanga

³⁵ Ndipo wanguŵanene, “Penipo ndingumtumani ŵambura chikwama, katiri, viyatu, kumbi mungukavuka kanthu?” Ndipo iwo ŵanguti, “Kanthu nako cha.”

³⁶ Ndipo wanguŵanene, “Kweni sono wakuŵa ndi chikwama watonge, ndi katiri viyo: ndiyo walive, wasaske chirundu chake, ndi wagulenge lipanga.

³⁷ Chifukwa ndikuneniyani, kuti chakulembeka chenichi chitene kufiskikiya mwaku ine, ‘Wangupendeke pamoza ndi ŵaziradangu:’ chifukwa so cho cha paku ine che nawo umari.”

³⁸ Ndipo iwo ŵanguti, “Ambuya awonani, panu pe malipanga ghaŵi.” Ndipo wanguti kwaku wo, “Mbwenu.”

Yesu waromba mu phiri la Olivete

³⁹ Ndipo wangutuwako, wanguruta, mwa karusu, ku phiri la Olivete; ndipo ŵasambizi nawo ŵangumrondo.

⁴⁰ Ndipo wanguti waza pa malo, wanguti kwaku iwo, “Rombani kuti mungasere cha mu kusedu.”

⁴¹ Ndipo mwenecho wangupatukako kwaku wo uli nkhupong'a kwa mwa; ndipo wanguti wagwada pa makongonu, warombanga, wakuti,

⁴² “Ada, asani mukhumba, mutuzgeko kwangu nkhombo iyi: kweni khumbu langu cha, kweni linu, lichitike.” [

⁴³ Ndipo wangumwoneke mungelo wakutuliya kuchanya, wakumkhomeska.

⁴⁴ Ndipo pakuŵa mu mphirimbu warombanga kwakufwiririyapo: ndipo dukutira lake linguŵa nge ndi manthone gha ndopa ghakujirimiya pasi.]

⁴⁵ Ndipo wati wasokako ku rombo lo, wanguza ku ŵasambizi ndi wanguŵasaniya ŵakura tulo kwachisungu,

⁴⁶ ndipo wanguŵanene, “Chifukwa chine mura tulo? Yukani, rombani, alinga kuti mungasere mu kesedu cha.”

Kukoreka kwaku Yesu

⁴⁷ Wenga weche kurongoro iyo, awonani, mzinda, ndi yo watamulika Yuda, yumoza wa chumi ndi ŵaŵi, waŵadanjiriyanga; ndipo waŵandikanga kwaku Yesu kwachimfyofyontha.

⁴⁸ Ndipo Yesu wanguti kwaku iyo, “Yuda, kumbi upachiya Mwana wa munthu ndi mfyofyonthu?”

⁴⁹ Ndipo ŵachiona ŵakumzunguliya cho chikaŵangapo, ŵanguti, “Ambuya kumbi tinepuwenge ndi lipanga?”

⁵⁰ Ndipo yumoza waku wo wangumkoso muŵanda wa mzukuru mura, ndi wangudumuwa gutu lake lakumarghe,

⁵¹ kweni Yesu wangwamuka, wanguti, “Lekani penipo!” Ndipo wangulikwaska gutu, wangumchizga.

⁵² Ndipo Yesu wanguti kwaku wo ŵanguziya pake, ŵazukuru ŵara ndi nduna za kasopi ndi ŵara, “Kumbi mwaturiya nge mpha wakupoka, ndi malipanga ndi zinthonga?

⁵³ Ndenga ndeche pamoza namwe zuŵa ndi zuŵa mu kasopi yo, kuti mungutambaruliya manja pangu cha; kweni lenili ndi ora linu, ndi mtufu wa mdima.”

Petro wakana Yesu

⁵⁴ Ndipo ŵanguti ŵamko, ŵanguka nayo, ndipo ŵangumserezga mu nyumba ya mzukuru mura. Ndipo Petro warondongakutariko.

⁵⁵ Ndipo ŵanguti ŵakozga moto mukati mu luluwa, ndi ŵanguti ŵaja pasi pamoza, wanguja pasi Petro mukati mwawo.

⁵⁶ Ndipo msungwana wachimwona wakujariya kuchiri ku ukweru wa moto, ndi wakulereseska paku iyo, watinge, “Uyu nayo wenga pamoza ndi iyo.”

⁵⁷ Kweni iyo wangukana, wakuti, “Wamunthukazi, kuti ndimziŵa cha.”

⁵⁸ Ndipo pavuli pa kanyengo munyake wangumwona, watinge, “Iwe nawe we waku wo.” Ndipo Petro watinge, “Wamunthu, awa, ine cha.”

⁵⁹ Ndipo jepu nge ndi ora limoza munyake ngana wangurapa, wakuti, “Kwakuneneska uyu nayo wenga pamoza ndi iyo: chifukwa so ndi muGalile.”

⁶⁰ Kweni Petro wanguti, “Wamunthu, kuti ndiziŵa cha chenicho ukamba.” Ndipo sosonukweni wachirongoro iyo, tambala wangukokoŵereka.

⁶¹ Ndipo wangung'anamuka Mbuya, wangulereska Petro. Ndipo Petro wangukumbuka nenedu la Ambuya, mo wangumunene, “Weche wandakokoŵereke le tambala, undikanenge katatu.”

⁶² Ndipo wangutuliya kubwaro, wanguliya kwakuŵaŵa.

Yesu wawoyeka ndi kupumika

⁶³ Ndipo ŵanthurumi wo ŵamkonga Yesu, ŵamtombozganga ndi kumkwechuwa.

⁶⁴ Ndipo ŵati ŵamburumutizga, ŵamfumbanga, ŵakuti, “Loska; njani yo wakupuma?”

⁶⁵ Ndipo vinandi vinyake ŵanenanga paku iyo, ŵakumtuka.

Yesu wateruzgika ndi upu wa ŵaYuda

⁶⁶ Ndipo kuchicha unguutika ura wa khamu lo, ŵazukuru ŵara ndi so ŵalembi; ndipo ŵangumrongozge ku upu wawo, ŵakuti,

⁶⁷ “Asani ndiwe Kristu, tineniyenge.” Kweni wanguti kwaku wo, “Asani ndinganene imwe, kuti mungavwana cha:

⁶⁸ ndipo asani ndifumbenge imwe, kuti mungandamuka cha.

⁶⁹ Kweni kutuwa ku sono Mwana wa munthu wajariyenge pasi ku marghe gha nthazi yaku Chiuta.”

⁷⁰ Ndipo ŵanguti wose, “Iwe viyo we Mwana waku Chiuta kumbi?” Ndipo wanguŵanene, “Imwe mutiti kuti ndine.”

⁷¹ Ndipo ŵanguti, “Teche kusoŵa so ukaboni; chifukwa taŵeni tavwa ku mlomo wake.”