Luka 21 - Tonga Bible 1986

Kaperekedu ka choko mpasku

¹ Kweni wachiyinuka wanguwona ŵaromba ŵakupong'a mu mipasku yawo mu chija cho.

² Ndipo wanguwona choko chisauchi chakuti chakupong'amu tumatambala tuŵi.

³ Ndipo wanguti, “Ndikuneneskiyani, kuti choko chenichi chikavu chapong'amu kwakuruska wose.

⁴ Chifukwa wose yaŵa mu ufurwi wawo ŵapong'a mu mpasku yo: kweni icho mu kapereŵedu kake chapong'a vyenivyo vyose chaŵenga navyo, chijariyu chake chose.”

Yesu wakamba ndi kubwanganduka kwa kasopi

⁵ Ndipo po ŵakambanga ŵanyake vya kasopi, mo wakumatikiya ndi mya yakunozga ndi mpasku, wanguti,

⁶ “Vyose ivi muwona, ghazenge mazuŵa mwaku ghenigho kuti urekekenge po panu cha mwa pa mwa, weniwo urekenge kugadabulika.”

Visuzgu ndi viŵembu

⁷ Ndipo ŵangumfumba ŵanguti, “Muwomba, vyenivyo viŵengepo zuŵanji na? Ndipo nchine chisimikizgu cho, chakurongo kuti vyekufupi kuŵapo vyenivyo?”

⁸ Ndipo iyo wanguti, “Thoŵani, mungarandizgika: pakuti ŵanandi ŵaziyenge mu zina langu, wakuti ‘Ndine’; ndipo ‘Nyengo yaŵandika.’ Mungarutanga cha kuvuli kwawo.

⁹ Ndipo penipo mungavwiya zinkhondu ndi vibumuzi, mungachiruskika cha: chifukwa kutene vyenivyo kuŵapo danga; kweni umari wo kuti ngwa sosonukweni cha.”

¹⁰ Ndipo waŵeneniyanga, “Mtundu wamyukiya pa mtundu, ndi ufumu pa ufumu;

¹¹ ndipo viŵengepo vyeuyeu vikuru, ndi mu malo ndi malo vilala ndi videru; ndipo viŵengepo vyakofya, ndi visimikizgu vikuru vyakutuliya kuchanya.

¹² Kweni vindaŵepo vinthu vyenivyo vyose, mukamangikanga ndi kuŵembeka, mutorekiyenge ku cheruzgu mu masinagoge, ndi kuŵikika mu ulinda, mukatolekiyanga paurongo pa ŵakaronga ndi ŵeruzgi, chifukwa cha zina langu.

¹³ Vikaŵiyanga imwe nge mbukaboni.

¹⁴ Ŵikiyani limu viyo ku mitima yinu kujipimiya danga cha mo mwamukiyenge;

¹⁵ chifukwa ine ndimpaskeninge mlomo ndi zeru, yeniyo zose mphindikwa zinu kuti ziziŵenge cha kwamukako chingana nkhumikirana namwe.

¹⁶ Kweni mukombolekenge ndi ŵapapi nawo, ndi ŵabali, ndi vinini, ndi mabwezi; ndipo ŵabayengepo ŵanyake ŵaku imwe.

¹⁷ Ndipo muŵenge ŵakutinkhika ndi wose chifukwa cha zina langu.

¹⁸ Kweni chingana ndi sisi laku mutu winu kuti lamkwanangika cha.

¹⁹ Mu unkhunthiya winu mwanduliyenge mizimu yinu.

Kunangika kwa Yerusalemu

²⁰ “Kweni penipo mukawonanga Yerusalemu wazungurizgika ndi maugoŵi, ziŵani penipo kuti laŵandika phasulu lake.

²¹ Penipo ŵamu Yuda ŵathaŵiyenge ku mapiri; ndi ŵa mukati mwake ŵatuwengemo; ndi ŵamu minda ŵarekenge kusere mwake.

²² Pakuti yagha ndi mazuŵa gha thayu kuti vifiskike vyose vyakulembeka.

²³ Owe kwaku wo mbanthumbo ndi kwaku wo mbakonkheska mu mazuŵa gha! Chifukwa paŵenge kukweŵeka kukuru pa charu, ndi kandundu pa khamu lenili.

²⁴ Ndipo ŵanyake ŵabayikenge ndi uyi wa lipanga, ndi ŵanyake ŵakorekenge nge mbamagoŵa ku mitundu yose, ndipo Yerusalemu waŵenge wakuphwatika ndi Mitundu, mpaka zifiskikenge nyengu za Mitundu.

Kuza kwa Mwana wa munthu

²⁵ “Ndipo muŵenge visimikizgu mu dazi ndi mwezi ndi zinyenyezi: ndipo panupasi mtundu yose yikaŵanga yakuzizikika, ndi yakopa kuuruma kwa nyanja ndi maŵiriŵiri;

²⁶ ŵanthu ŵamkufwa chipoyo ndi ofi, mu chilereze chaku vyo vituza pa charu; chifukwa nthazi za kuchanya zisukunikenge.

²⁷ Ndipo sono ŵakamuwonanga Mwana wa munthu wakuza mu mtambo ndi nthazi ndi unkhankhu ukuru.

²⁸ Kweni vichamba kuŵapo vyenivyo, yinuskani ndi tumphuskani mitu yinu; pakuti uŵandika uwombozi winu.”

Chisambizgu cha mkuyu

²⁹ Ndipo wanguŵakambiya ntharika: “Alereni mkuyu wo, ndi miti yose;

³⁰ penipo yatunda, muziŵa mwakumwaŵeni pakulereska kuti sono chaŵandika chifuku.

³¹ Viyo imwe namwe, muchiwona vyenivi vyaŵapo, ziŵani kuti waŵandika ufumu waku Chiuta.

³² Nadi ndikuneniyani kuti yingaruta mphapu yeniyi cha mpaka vyose vyaŵapo.

³³ Kuchanya ndi panupasi virutenge; kweni mazu ghangu kuti gharutenge cha.

Nkhwakwenere kulindizga

³⁴ “Kweni jichenjeriyeni, vinu yingavimbirwa mitima yinu ndi mgutu, ndi vinyo mukari ndi maphuruputiro gha chijariyu chino, ndi zuŵa liya lingamuwiyani kwamabuchibuchi;

³⁵ chifukwa viyo liziyenge paku wose ŵakuja pa chisku chose cha charu.

³⁶ Kweni cherezgani ŵakuninizika nyengo zose, alinga kuti mupunde, kupozomoka ku kwaku vyenivi vyose vyakukhasa kuŵapo, ndi kumapo paurongo pa Mwana wa munthu.”

³⁷ Ndipo mu mazuŵa gho waŵanga mu kasopi wakusambizga; ndipo usiku ndi usiku watuliyanga ndi kutandara mu phiri lakutamulika Olivete.

³⁸ Ndipo khamu lo lose lachereriyanga kwaku iyo mu kasopi kwachimuvwa.