Luka 20 - Tonga Bible 1986

Fumba ndi mtufu waku Yesu

¹ Ndipo kunguŵa pa limoza la mazuŵa gho, wachisambizga iyo khamu lo mu kasopi ndi wachimemeza evangeli, ŵangumziya ŵazukuru ŵara ndi ŵalembi pamoza ndi ŵara,

² ndipo ŵangunena nayo, kuti, “Tineniyenge uchitiya vyenivi mu mtufu wakutinji, pamwenga ndi yani yo wakupaska mtufu wenuwu?”

³ Ndipo wangwamuka, wanguti kwaku wo, “Nane so ndikufumbeninge fumbo; ndipo ndineniyeni:

⁴ Kumbi ubatizo waku Yohane wenga wakutuwa kuchanya, pamwenga wakutuwa ku ŵanthu?”

⁵ Ndipo iwo ŵangususkana kwaku ŵija, ŵakuti, “Asani tingati, ‘Kutuwa kuchanya’, wanenenge, ‘Na chifukwa chine mungureka kuvwana nayo?’

⁶ Kweni asani tingati ‘Kutuwa ku ŵanthu,’ khamu lose lo litipong'enge mya; chifukwa ndakukhorwa kuti Yohane wenga mchimi.”

⁷ Ndipo ŵangwamuka kuti ŵengavi kuziŵa kweniko ungutuliya.

⁸ Ndipo Yesu wanguti kwaku iwo, “Chingana ndine kuti ndikuneniyeninge cha ndi mtufu wakutinji ndichitiya vyenivi.”

Ntharika ya ŵalimi ŵa munda wa mphereska

⁹ Ndipo wangwamba kukambiya khamu lo ntharika yeniyi: “Munthu wangupanda munda wamphereska, ndipo wanguwupazgiya ku ŵalimi, ndipo wangutuwapo nyengo yitali.

¹⁰ Ndipo pa nyengo wangutuma muŵanda ku ŵalimi wo, alinga kuti ŵampaskeko chipasi cha munda wamphereska: kweni ŵalimi, ŵati ŵamkwechuwa, ŵangumwezga wambughuya.

¹¹ Ndipo wanguwerezgapo kutuma muŵanda munyake: ndipo yiwo, ŵati ŵamkwechuwa iyo nayo, ndi ŵati ŵamlengeska, ŵangumwezga wambughuya.

¹² Ndipo wanguwerezgapo kutuma wachitatu: ndipo yiwo, ŵati ŵamlasa uyu nayo, ŵangumbwefuliya kubwaro.

¹³ Sono wanguti mweni-munda wamphereska, ‘Ndichitenge chine? Nditumenge mwana wangu wakwanjiwa; kokuli wamphwerenge.’

¹⁴ Kweni ŵati ŵamuwona ŵalimi wo ŵangupangirana kwaku ŵija ŵakuti, ‘Mwenuyu ndi mhara: tibaye, alinga kuti chihara cho chiŵenge chidu.’

¹⁵ Ndipo ŵanguti ŵamumbwefuliya kubwaro ku munda wamphereska, ŵangumbaya. Na, mwenimunda yo waŵachitiyenge chine?

¹⁶ Wazenge ndi wanangenge ŵalimi yaŵa, ndipo wapaskenge munda wamphereska ku ŵamwenga.” Ndipo ŵanguti ŵavwa, ŵanguti, “Kungaŵa viyo cha.”

¹⁷ Kweni iyo wati walereska paku iwo, wanguti, “Nchine chakulembeka chenichi, ‘Mwa weniwo ŵanguwukana ŵazengi-nyumba, wenuwu waŵiya mutu wa nyondu’?

¹⁸ “Yose wakuwa pa mwa wuwa watikinyikenge; kweni paku mweniyo ungawiya, umuthibuskenge.”

Fumbu ndi zakusonkha msonkhu

¹⁹ Ndipo ŵalembi ndi ŵazukuru ŵara ŵangulembe kumko ku manja mu ora leniliya; ndipo ŵangopa khamu lo; chifukwa ŵanguziŵa kuti paku iwo wangutayiya ntharika yeniyi:

²⁰ ndipo ŵangumkhazga ndi ŵangutuma ŵaskoli wo ŵangujiŵikamo kuŵa ŵarunji, alinga kuti ŵamko ndi mazu ghake, viyo kuti ŵampereka ku cheruzgu ndi ku mtufu wa nduna.

²¹ Ndipo ŵangumfumba, ŵakuti, “Muwomba, tiziŵa kuti ukamba ndi usambizga kwakurunjika, ndipo kuti urumba chisku cha munthu cha, kweni mu uneneska usambizga nthowa yaku Chiuta.

²² Kuyiyamu ifwe nthu kupaska mthulu kwaku Kaisare, pamwenga awa?”

²³ Kweni wanguziŵa urghargha wawo, wanguti kwaku iwo,

²⁴ “Ndirongoni tambala. Kumbi chikozgu ndi chakulembekapo vyo wenavyo vyakuyani?” Ndipo iwo ŵanguti, “Vyaku Kaisare.”

²⁵ Ndipo iyo wanguŵanene, “Wezgiyani viyo vyaku Kaisare kwaku Kaisare, ndi vyaku Chiuta kwaku Chiuta.”

²⁶ Ndipo kuti ŵanguziŵa cha kumko ndi kanenedu ko paurongo pa khamu lo: ndipo ŵanguzizwa ndi kwamuka kwake ŵanguchetama.

Fumbu ndi chiyuka cha kuŵakufwa

²⁷ Ndipo ŵanguza ŵanyake ŵamu ŵaSaduki, wo ŵatiti kulive chiyuka;

²⁸ ŵangumfumba, ŵakuti, “Msambizgi, Mosese wangulembe ifwe kuti, asani mbali wa munthu wakuŵa ndi muwoli wangafwa, ndi uyu wangaŵa wambura mwana, mbali wake yo wachito choko cho, ndi wayuskiyepo mbeu ku mbali wake.

²⁹ Kwenga viyo ŵabali ŵankhonde ndi ŵaŵi: ndipo wachimoza wati wato muwoli, wangufwa wambura mwana;

³⁰ ndipo wachiŵi yo;

³¹ ndipo wachitatu wangumto; ndipo kwakukozgana wo ŵankhonde ndi ŵaŵi nawo kuti ŵangusiyapo ŵana cha, ndipo wangufwa.

³² Pavuli pake wangufwa munthukazi nayo.

³³ Viyo muchiyuka cho waŵenge muwoli waku nunju waku wo? Chifukwa ŵankhonde ndi ŵaŵi wo ŵanguŵa nayo nge ndi muwoli.”

³⁴ Ndipo Yesu wanguŵanene, “Wana wo ŵa mgonezi uwu ŵato ndipo ŵatoreskeka;

³⁵ kweni wo ŵatenereskeke kwachifikako ku mgonezi wuwa ndi ku chiyuka cha ŵakufwa, kuti ŵato cha, chingana nkhuti ŵatoreskeka cha;

³⁶ chifukwa chingana nkhuti ŵaziŵa kufwa so cha; chifukwa ŵe nge mbangelo; ndipo mbana ŵaku Chiuta, pakuŵa ŵana ŵa chiyuka.

³⁷ Kweni kuti ŵakufwa wo ŵayuskika, Mosese nayo wangurongole, mu Chivwati, cho po watiti, Mbuya ndi Chiuta waku Abrahamu, ndi Chiuta waku Yisaki, ndi Chiuta waku Yakobe.

³⁸ Kweni kuti ndi Chiuta wa ŵakufwa cha, kweni wa ŵamoyo; chifukwa wose ŵajariya iyo umoyo.”

³⁹ Kweni ŵanyake ŵamu ŵalembi ŵangwamuka, ŵanguti, “Msambizgi, wakamba umampha.”

⁴⁰ Chifukwa kuti ŵangaganga kumfumba kanthu kanyake so cha.

Fumbu lapaku Mesiya

⁴¹ Ndipo wanguti kwaku iwo, “Wakamba uli kuti Kristu ndi mwana waku Davidi?

⁴² Chifukwa mweneko Davidi mu buku la Sumu watiti, ‘Mbuya wanguti ku mbuyangu, Ja ku marghe ghangu;

⁴³ mpaka ndiŵaŵikenge ŵamawongo ŵako chitambaliru cha marundi ghako.’

⁴⁴ Davidi viyo wamtamula Mbuya; na, ndi mwana wake uli?”

Yesu wachenjezga ndi ŵasambizgi ŵamarangu

⁴⁵ Ndipo penipo nkhamu lose lategherezganga, Yesu wanguti ku ŵasambizi ŵake,

⁴⁶ “Mucheŵe ndi ŵalembi wo ŵakhumba kwendayenda mu makhanju, ndi ŵatanja matauzgu mu maluluwa gha maronda, ndi vitengu vyachimoza mu masinagoge ndi malo ghachimoza mu madghera;

⁴⁷ wo ŵakampha nyumba za vyoko, ndipo mu munguni ŵarombe kwathaliku; yaŵa ŵarondenge chisusa chakuruska.”