Luka 2 - Tonga Bible 1986

Kawi kaku Yesu

¹ Ndipo kunguŵa mu mazuŵa ghenigho, kungutuwa kwaku Kaisare Augusto lamulu, lakuti, ulembeke uzengi wose.

² Chenichi chenga chilemba chakudanga weche Kureniyo nduna yaku Siriya.

³ Ndipo ŵanguruta wose kwachilembeka, yose ku muzi waku yija.

⁴ Ndipo Yosefe nayo, kutuwa ku Galile, ku muzi Nazarete, wangukwere ku Yuda, ku muzi waku Davidi, wo uzumbulika Betelehemu, chifukwa kuti wenga wamunyumba ndi wa mbumba yaku Davidi;

⁵ kwachilembeka pamoza ndi Mariya, wakujaririka ndi iyo, wakuŵa wa nthumbu yikuru.

⁶ Ndipo kunguŵa, ŵeche kweniko yiwo, ghangufiskika mazuŵa ghake ghakupapiya.

⁷ Ndipo wangupapa mwana-munthurumi wake wakudanga; ndipo wangumvungiya, ndi wangumlalika mu murgheru. Pakuti kwengavi kwaku wo malo mu nyumba wa ŵalendo.

Ŵaliska ndi ŵangelo

⁸ Ndipo kwenga ŵaliska mu charu chenichiya ŵakutandara mu dondu, ndi ŵakulindizga maulinda ghausiku pa mskambu wawo.

⁹ Ndipo mungelo wa Mbuya wanguma paku wo, ndi unkhankhu wa Mbuya wanguŵaŵaliya kwakuzunguliya: ndipo ŵangopa ndi chopu chikuru.

¹⁰ Ndipo wanguŵanene mungelo yo, “Mungopanga; chifukwa alereni, ndikutauliyani chimwemwe chikuru, chenicho chikaŵiyanga ŵanthu wose:

¹¹ pakuti wakuwiyani le, mu muzi waku Davidi, Mtaski mweniyo ndi Kristu Mbuya.

¹² Ndipo chenichi nchisimikizgu kwaku imwe; mwamsaniya litema lakurungika, lakugona mu murgheru.”

¹³ Ndipo kwamabuchibuchi kunguŵa pamoza ndi mungelo mzinda wa liŵanja lakuchanya, ŵakuthamika Chiuta, ndi ŵakuti,

¹⁴ “Unkhankhu kwaku Chiuta mu mdengwendi, ndi panupasi chimangu mu ŵanthu mwaku wo wakondwere.”

¹⁵ Ndipo kunguŵa, penipo ŵangelo ŵangutuwako kwaku wo ndi kuruta kuchanya, ŵaliska nawo ŵangunenerana, “Tiyeni mpaka ku Betelehemu, ndi tiwone nkhani yeniyi yakuŵapo, yo Ambuya ŵatiziŵiska.”

¹⁶ Ndipo ŵanguza ŵakutinthimika, ndipo ŵangusaniya wose Mariya ndi Yosefe, ndi litema lo lakugona mu murgheru wo.

¹⁷ Ndipo ŵachiwona, ŵanguwandiska vyapa nkhani yakuneneka kwaku wo yapa mwana yo.

¹⁸ Ndipo wose ŵakuvwa ŵangutondwa paku vyo vingukambika ndi ŵaliska kwaku wo.

¹⁹ Kweni Mariya wasungirizganga nkhani zenizi zose, kuziŵika mu mtima wake.

²⁰ Ndipo ŵaliska ŵanguwe, ŵakukankhuska ndi ŵakuthamika Chiuta paku vyose vyo ŵanguvwa ndi ŵanguwona, nge ndimo kungukambikiya kwaku wo.

²¹ Ndipo penipo ghangufiskika mazuŵa ghankhonde ndi ghatatu gha kumchinjiya, lingudanika zina lake Yesu, lo lingudanika ndi mungelo wenga wandazuuke iyo mu chibali.

Yesu watoreke ku kasopi

²² Ndipo penipo ghangufiskika mazuŵa gha chiphotoka chawo mwa dangu laku Mosese ŵangumtole ku Yerusalemu kwachimpereka ku Ambuya,

²³ (mo kwalembeke mu dangu la Mbuya, “Munthurumi yose wakubanuwa chibali wakadanikanga wakupaturikiya ku Ambuya”)

²⁴ ndi kwachipereka sembe, uli ndi cho chakulembeka mu dangu la Mbuya, “Njiŵa ziŵi, pamwenga viunda viŵi.”

Simeoni ndi Anna

²⁵ Ndipo awonani kwenga munthu mu Yerusalemu, zina lake Simeoni; ndipo munthu mweniyo wenga mrunji ndi wakusopa, wakulereze sangarusku laku Yisraele: ndipo Mzimu Wakupaturika wenga pake.

²⁶ Ndipo kunguvumbulikiya iyo ndi Mzimu Wakupaturika, kuti wangawona nyifwa cha wandawone Kristu wa Mbuya.

²⁷ Ndipo mu Mzimu wanguza mu kasopi: ndipo ŵachiserezga ŵapapi wo ko kana Yesu, kuti wakachitiye mwa karusu ka dangu,

²⁸ sono Simeoni wangukaronde mu manja ghake, ndipo wangumtumbika Chiuta ndi wanguti,

²⁹ “Sono mfwatuweni muŵanda winu, Ambuya, mwa nkhani yinu, mu chimangu,

³⁰ pakuti ghawona maso ghangu utaski winu,

³¹ wo mwarongosole pa chisku cha makamu ghose;

³² ukweru wakuvumbuliya ŵaMitundu, ndi unkhankhu wa khamu linu Yisraele.”

³³ Ndipo wiske ndi nyina ŵazizwanga ndi vyo vingukambikiya paku iyo;

³⁴ ndipo Simeoni wanguŵatumbika, ndi wanguti kwaku Mariya nyina, “Awona mwenuyu wajarikikiya ku chibwanganduka ndi chiyuka vya ŵanandi mwaku Yisraele; ndi ku chisimikizgu chakususkika;

³⁵ ndipo lipanga liporotenge mu uzimu waku wamweni; alinga kuti ghavumbulike maghanaghano gha mitima yinandi.”

³⁶ Ndipo kwenga Anna, mchimikazi, mwana munthukazi waku Panuele, wamu fuku laku Ashere wenga wakugonera mazuŵa ghanandi, wakujaririya ndi mrumi virimika vinkhonde ndi viŵi kutuwa ku umwali wake,

³⁷ mweniyo so wenga choko cha virimika machumi ghankhonde ndi ghatatu pachanya vinayi, mweniyo kuti watuwangako ku kasopi cha, wakusopa ndi kufunga ndi maniniziku usiku ndi msana.

³⁸ Ndipo wanguti wafikapo pa ora lenilo, wawongiyanga Chiuta, ndipo wangukambiya vyaku iyo kwaku wose ŵakulereze uwombozi wa Yerusalemu.

³⁹ Ndipo penipo ŵangufiska vyose vya mwa dangu la Mbuya, ŵanguwere ku Galile, ku muzi wawo Nazarete.

⁴⁰ Ndipo kana ko kangukuwa, ndi kadimbanga, kakuzazika ndi zeru: ndipo wezi waku Chiuta wenga pake.

Yesu pa uhurwa wake we mu kasopi

⁴¹ Ndipo ŵarutanga ŵapapi ŵake chirimika ndi chirimika ku Yerusalemu ku njonesku ya Phaska.

⁴² Ndipo penipo wanguŵa wa virimika chumi ndi viŵi, wanguti wakweriyako ku Yerusalemu mwa karusu ka njonesku,

⁴³ ndipo po dghera lingumara ŵachiwe, Yesu, mhurwa yo, wangujariya vuli mu Yerusalemu; ndi kuti ŵanguziŵa cha ŵapapi wo;

⁴⁴ kweni, pakughanaghaniya iyo kuŵa mu mpingu, angwenda rwendo la zuŵa limoza; ndipo ŵampenjanga mu ŵabali ndi vinini:

⁴⁵ ndipo pakureka ku msaniya, ŵanguwere ku Yerusalemu, ŵakumpenjapenja.

⁴⁶ Ndipo kunguŵa pavuli pa mazuŵa ghatatu, ŵangumsaniya mu kasopi wakuja pasi mukati mu ŵasambizgi, ndi wakuŵavwa ndi wakuŵafumba:

⁴⁷ ndipo wose ŵakumuvwa ŵarwitanga pa uteska wake ndi mayankhu ghake.

⁴⁸ Ndipo ŵachiwona, ŵanguzizwa; ndipo ŵanyina ŵanguti, kwaku iyo, “Wamwana, watichitiyanji viyo? Awona, ausu ndi ine ŵachisungu takupenjanga.”

⁴⁹ Ndipo wanguŵanene, “Mwandipenjiyanganji? Asi mwaziŵanga kuti kutenere ine kuŵa mwaku vyo vya Ada?”

⁵⁰ Ndipo iwo kuti ŵanguwamo cha mu lineno lo wangukamba nawo.

⁵¹ Ndipo wangusikiya pamoza nawo, ndi ŵangufika ku Nazarete; ndipo wenga wakuthera kwaku wo: ndipo nyina wasungirizganga makani ghose gho mu mtima wake.

⁵² Ndipo Yesu wakuwanga mu zeru ndi mu msinkhu, ndi mu wezi kwaku Chiuta ndi ŵanthu.