Luka 19 - Tonga Bible 1986

Yesu ndi Zakeyu

¹ Ndipo wanguti waseremu, waporotanga mu Yeriko.

² Ndipo awonani, munthu wakutamulika ndi zina Zakeyu; ndipo iyo wenga wamsonkho mura ndi wenga msambasi.

³ Ndipo wakhumbanga kuwona Yesu ndi yani; ndipo kuti wanguziŵa cha chifukwa cha mzinda wo, pakuti wenga wa msinkhu ufupi.

⁴ Ndipo wanguti wachimbiriya kuurongo, wangukwera mu chimkuyu, kuti wamuwone; pakuti warutanga kwenikuwa.

⁵ Ndipo po wangufika pa malo, Yesu wanguti walereska muchanya, wanguti kwaku iyo, “Zakeyu, tinthimika kusika; chifukwa le kutindenere kutandara mu nyumba yako.”

⁶ Ndipo wangutinthimika wangusika, ndipo wangumronde kwakukondwa.

⁷ Ndipo ŵanguti ŵawona wose ŵadinginikanga, ŵakuti, “Wamtandara ku munthurumi mulakwi.”

⁸ Kweni Zakeyu wanguma, wanguti ku Mbuya, “Awonani Ambuya, chigaŵa cha viŵetu vyangu ndiŵapaska ŵakavu; ndipo asani ndamuphanga yumoza kanthu, ndimwerezgiyapo kanayi.”

⁹ Ndipo Yesu wanguti iyo, “Le utaski wawiya nyumba yeniyi, pakuti iyo nayo ndi mwana waku Abrahamu.

¹⁰ Chifukwa Mwana wa munthu wakuziya kwachipenja ndi kwachitaska chakutayika cho.”

Ntharika ya ndrama chumi

¹¹ Ndipo iwo ŵachivwa ghenigho, wangukuskiyako ndipo wangukamba ntharika chifukwa wenga kufupi ku Yerusalemu, pakuti iwo ŵangughanaghana kuti ufumu waku Chiuta uwonekenge sosonukweni.

¹² Viyo wanguti, “Munthu mwanangwa ngana wanguya ku charu chakutari, kwachijironde ufumu, ndi kwachiwe.

¹³ Ndipo wati wadana chumi ŵa ŵaŵanda ŵake, wanguŵapaska ŵapaundi chumi ndi wanguti, ‘Kwaku wo, yanduwani nawo mpaka nthuza.’

¹⁴ Kweni ŵamumuzi wake ŵamtinkhanga ndipo ŵangutuma nthumi muvuli mwake, ŵakunena, ‘Kuti tikhumba uyu kuwusiya paku ifwe cha.’

¹⁵ Ndipo kunguŵa kuti, wanguti wawe iyo, wati waronde ufumu wo, wangulangula ŵadanikiye kwake ŵaŵanda yaŵa, ŵeniwo wangupaska zo ndrama, alinga waziŵe cho ŵangwanduwa.

¹⁶ Ndipo wachimoza yo wangufika, wali, ‘Mbuya, paundi wako wanduliyako ŵapaundi chumi.’

¹⁷ Ndipo wanguti kwaku iyo, ‘Umampha, muŵanda wamampha we: pakuti mu kamanavi unguŵa wamagomekezgeka, uŵe wamtufu pa mizi chumi.’

¹⁸ Ndipo wanguza wachiŵi, wali, ‘Paundi wako, Mbuya, wachita ŵapaundi ŵankhonde.’

¹⁹ Ndipo wanguti kwaku iyo nayo, ‘Uŵepo nawe pa mizi yinkhonde.’

²⁰ Ndipo munyake wanguza, wali, ‘Mbuya, awona paundi wako, yo ndenga nayo wakuŵikika mu mlembeza:

²¹ chifukwa ndakopanga, pakuti wemunononu, uto chenicho wengavi kuŵika, ndipo uvuna cho wengavi kupanda.’

²² Wamunene, ‘Ndikweruzgenge ndi mazu ghako, muŵanda muheni we. Waziŵanga kuti ine nde munthu munononu, wakuto chenicho ndengavi kuŵika, ndi wakuvuna chenicho ndengavi kupanda;

²³ na chifukwa chine wengavi kupazga ndrama yangu pa ŵasungi ndrama, ndipo ine pakuza mphanyi ndayisaniya pamoza ndi chipambi?’

²⁴ Ndipo wanguti ku ŵakumapo, ‘Kwamphuwani kwake paundi yo, ndipo paskani kwaku yo we ndi ŵapaundi chumi.’

²⁵ Ndipo wangumunene, ‘Ambuya, we nawo ŵapaundi chumi.

²⁶ Ndikuneniyani kuti kwaku yose yo we nako kupaskikenge; kweni kwaku yo walivi chingana nkheniko we nako kakwamphulikengeko kwake.

²⁷ Ndipo so ŵakupindikana nane yaŵa, wo ŵengavi kukhumba ine kuŵaŵusa ŵatoleni kuno, ndi ŵabayiyeni paurongo pangu.’ ”

Kasereredu ka ufumu kaku Yesu mu Yerusalemu

²⁸ Ndipo wati wakamba vyenivi, wanguruta kuurongo, wakukwere ku Yerusalemu.

²⁹ Ndipo kunguŵa wachiŵandika ku Betefage ndi Betaniya, ku phiri lo lakuzumbulika la Olivete, wangutumapo ŵaŵi ŵa ŵasambizi,

³⁰ wakuti, “Kaninga ku muzi wakuthyana namwe; mwenimo muchisere mwamsaniya mwanambunda wakumangika, paku mweniyo wandajepo munthu kale: mwati mwamfwatuwa, mtoleni kuno.

³¹ Ndipo asani ngana wangamfumbani, ‘Chifukwa chine mumfwatuwa?’ Mkambiyeni kuti, ‘Mbuya watumkhumba.’ ”

³² Ndipo ŵachiruta wo ŵangutumika, ŵangusaniya uli ndi mo wanguŵanene.

³³ Ndipo ŵachimfwatuwa iwo mwanambunda, ŵeneko ŵanguti, “Nchine cho mumfwatuliya mwanambunda?”

³⁴ Ndipo iwo ŵanguti, “Ambuya ŵatumkhumba.”

³⁵ Ndipo ŵangumrongozge kwaku Yesu, ndipo ŵati ŵapong'a minjirira yawo pa mwanambunda, ŵangumjarikapo Yesu.

³⁶ Ndipo wachiruta iyo, ŵatandikanga pasi minjirira yawo mu nthowa.

³⁷ Ndipo wachiŵandika iyo sono, ku sikiru la phiri la Olivete, ungwamba mzinda wose wa ŵasambizi kukondwere kuthamika Chiuta ndi liyowozi likuru pa chifwa chaku vyose vyanthazi vyo ŵanguwona;

³⁸ ŵakuti, “Ngwakutumbikika Karonga yo watuziya mu zina la Mbuya! Chimangu kuchanya, ndi unkhankhu mdengwendi.”

³⁹ Ndipo ŵanyake ŵa ŵaFarisi mu mzinda wo, ŵanguti, “Muwomba, chenya ŵasambizi ŵako.”

⁴⁰ Ndipo wakwamuka wanguti, “Ndikuneniyani kuti, asani ŵachetamenge aŵa, mya yo yikamburenge.”

Yesu waliriya pa Yerusalemu

⁴¹ Ndipo pakuŵandika, wati wawona msumba wo, wanguliriya pake,

⁴² wakuti, “Mphanyi unguziŵa mu zuŵa lenili, iwe nawe, vya ku chimangu! Kweni sono vyabisika ku maso ghako.

⁴³ Pakuti ghafikiyenge pako mazuŵa penipo ŵamawongo ŵako ŵakunjirinjiskiyenge nthembwe, ndi ŵakuzingirizgenge, ndi ŵakuvimbizgenge kosekose,

⁴⁴ ndi ŵakuskesketenge ndi twana twako mwako; ndipo kuti ŵasiyengemo mwako cha mwa pa mwa; chifukwa kuti unguziŵa cha nyengo yo ya chilereze chako.”

Watozga kasopi

⁴⁵ Ndipo wati wasere mu kasopi yo, wangwamba kupong'a ku bwaro ŵakusaska,

⁴⁶ wakuŵanene, “Kwalembeka, ‘Nyumba yangu yiŵenge nyumba ya rombo’ kweni imwe mwayisanduska mphanji ya ŵakupoka.”

⁴⁷ Ndipo wasambizganga zuŵa ndi zuŵa mu kasopi yo. Kweni ŵazukuru ŵara ndi ŵalembi ndi ŵara ŵa khamu lo ŵalembenga kumwananga:

⁴⁸ ndipo kuti ŵangusaniya cha cho ŵangachita; chifukwa khamu lo lose lingugomekezga mwake lakutegherezga.