Luka 17 - Tonga Bible 1986

Mphurupuru

¹ Ndipo wanguti ku ŵasambizi ŵake, “Kungaŵa cha kuti virekenge kuza viguŵisku: kweni owe kwaku iyo mwaku mweniyo vituziya!

² Mphanyi kwenga kwamandulika kwaku iyo ne mphe yinganyekezgeka kweti ku khose lake, ndi wapong'eke mu nyanja, kwakuruska kuti waguŵiske yumoza wa ŵamana yaŵa.

³ Mujichenjere: asani mbali wako walakwa, muchenye; ndipo asani wape mgowoke.

⁴ Ndipo asani kankhonde ndi kaŵimu zuŵa wangakulakwiya, ndi kankhonde ndi kaŵi wanganyongoke kwako, wakuti, ‘Ndape’; umgowokiyenge.”

Chivwanu

⁵ Ndipo ŵakutumika ŵanguti ku Ambuya, “Tikuskiyeniko chivwanu.”

⁶ Kweni Ambuya ŵanguti, “Asani mwe nacho chivwanu uli ndi nje ya kamganji, munganene mkuyu uwu, ‘Jimphuka, ndi pandika mu nyanja yo;’ mphanyi watinge uvwiyenge imwe.

Nchitu ya mteŵete

⁷ “Kweni njani mwaku imwe, wakuŵa ndi muŵanda wakukusa pamwenga wakuliska, mweniyo wamuneniyenge, wachisere kutuwa ku munda, ‘Yiza ruŵi, ja pasi pa kurgha;’

⁸ kweni ukongwa asi wamuneniyenge, ‘Rongoso chenicho ndirghenge, ndipo, wati wajichinyiya, nditeŵete mpaka ndargha ndi ndamwa; ndipo pavuli po urghenge ndi umwenge iwe’?

⁹ Asi wawongeka muŵanda yuwa chifukwa wanguchita vyo vyakulangulikiya iyo?

¹⁰ Viyo so namwe, penipo mwachita vyose vyakulangulikiya imwe, mutinge, ‘Te ŵaŵanda ŵambura kwanduwa; kweni tachita cho tenerenga kuchita.’ ”

Yesu wachizga ŵamakhate chumi

¹¹ Ndipo kunguŵa mu kuruta kwake ku Yerusalemu kuti waporotanga iyo mukati mu Samaria ndi Galile.

¹² Ndipo wachisere iyo mu muzi wakuti, ŵangukumana nayo ŵanthurumi chumi, ŵamakhate, ŵeniwo ŵanguma kutari:

¹³ ndipo iwo ŵangusamphuska mdanu, ŵakuti, “A Yesu, Ambuya, tifwiyeni lisungu.”

¹⁴ Ndipo wachiwona wanguti kwaku wo, “Kaninga, kajirongoni ku ŵazukuru.” Ndipo kunguŵa ŵachiruta iwo, ŵangutozgeka.

¹⁵ Ndipo yumoza waku wo, wachiwona kuti wachizgika, wangunyongoka, wakukankhuska Chiuta ndi liyowozi likuru;

¹⁶ ndipo wanguwa kavunama pa marundi ghaku Yesu, wakumwonga: ndipo mweniyo wenga muSamaria.

¹⁷ Ndipo Yesu wangwamuka, wanguti, “Asi wo chumi ŵangutozgeka? Wankhonde ndi ŵanayi wo ŵepani?

¹⁸ Asi ŵangusanirika ŵakuwere kwachipaska unkhankhu kwaku Chiuta, kweni mlendo uyu pe?”

¹⁹ Ndipo wangumunene, “Soka, rutanga; chivwanu chako chakutaska.”

Kazidu ka ufumu

²⁰ Ndipo wachifumbika ndi ŵaFarisi nyengo penipo ungaziya ufumu waku Chiuta, wanguŵamuka, ndi wanguti, “Kuti utuza ufumu waku Chiuta ndi chithoŵa cha,

²¹ chingana nkhuti ŵanenenge cha, ‘Awonani, kuno!’ pamwenga ‘Kuwa!’ chifukwa onani, ufumu waku Chiuta we mukati mwinu.”

²² Ndipo wanguti ku ŵasambizi, “Ghazenge mazuŵa, penipo munwekiyenge kuona limoza la mazuŵa gha Mwana wa munthu, ndipo kuti mulionenge cha.

²³ Ndipo ŵanenenge namwe, ‘Onani, kuwa!’ ‘Onani, kuno!’ Mungaruta cha, chingana nkhurondo:

²⁴ chifukwa uli ndimo limphezi, pakumwetuka ku dera limoza lakusikuchanya, limbulikiya ku dera linyake lakusi kuchanya; viyo ndimo waŵiyenge Mwana wa munthu mu zuŵa lake.

²⁵ Kweni danga kutumwenere kukomwa vinandi, ndi kukanika ndi mphapu iyi.

²⁶ Ndipo mo kunguŵiya mu mazuŵa ghaku Nowa viyo ndimo kuŵiyenge mu mazuŵa gha Mwana wa munthu.

²⁷ Ŵarghanga, ŵamwanga, ŵatonga, ndi ŵaŵirwanga, mpaka zuŵa lenilo wanguserere Nowa mu chingaraŵa, ndi chinguziya chazandi, ndipo chinguŵananga wose.

²⁸ Uli ndimo kunguŵiya mu mazuŵa ghaku Lote; ŵarghanga, ŵamwanga, ŵagulanga, ŵasaskanga, ŵapandanga, ŵazenganga;

²⁹ kweni mu zuŵa lenilo Lote wangutuwiya mu Sodomu, moto ndi maka vingusolomoka kutuwa kuchanya, ndi vingwananga wose,

³⁰ viyo ndimo kuŵiyenge mu zuŵa lenilo Mwana wa munthu wavumbulikiyenge.

³¹ Mu zuŵa liya, yose yo waŵenge pa bagha pachanya, ndi viyaŵi vyake mu nyumba, wangasika cha kuvito: ndipo wamu munda kwakukozgana wangawere kuvuli cha.

³² Kumbukani muwoli yo waku Lote.

³³ Yose yo wapenja kwachitaska umoyo wake, wawutayenge: kweni yose yo wawutaya, wakausunganga wamoyo.

³⁴ Ndikuneniyani, mu usiku weniwo paŵenge ŵanthurumi ŵaŵi pa chita chimoza; yumoza watolekengepo, ndi munyake warekekenge.

³⁵ Ŵaŵengepo ŵanthukazi ŵaŵi ŵakupere pamoza; yumoza watolekengepo, ndi munyake warekekenge. [

³⁶ Ŵanthurumi ŵaŵi ŵaŵenge mu munda: yumoza watolekenge, munyake wasiyikenge.]”

³⁷ Ndipo pakwamuka wangumunene, “Pani, Ambuya?” Ndipo iyo wanguti kwaku wo, “Ko kwe thupi, kweniko ghaunganenge pamoza makuŵi.”