Luka 16 - Tonga Bible 1986

Mteŵete wapachanya pa ŵanyake

¹ Ndipo wanguti ku ŵasambizi nawo, “Kwenga munthu yumoza msambasi, mweniyo wenga ndi mlinda-nyumba; ndipo mwenuyu wangusumulika kwake nge ngwakuparghang'a viŵetu vyake.

² Ndipo wanguti wamdana, wanguti kwaku iyo, ‘Nchine chenichi nditukuvwiya? Wezga makani gha ulinda wako; chifukwa kuti ungaziŵa kulinda nyumba so cha.’

³ Ndipo mlinda-nyumba yo wangunena mwaku yija, ‘Ndichitenge chine, pakuti mbuya wangu watuzgako kwangu ulinda wo? Kuti nde ndi nthazi cha kukumba mazenji; kupempha ndilenga soni.

⁴ Ndiziŵa cho ndichitenge, alinga kuti, penipo ndingatuzgika mu ulinda wo, ŵangandironde mu nyumba zawo.’

⁵ Ndipo pakujidaniya yumoza yumoza yose wamateu wa mbuyake, wangumunene wakudanga, ‘Wateuwako uli unandi ku mbuya wangu?’

⁶ Ndipo wanguti, ‘Myeso machumi pe chumi ya mafuta.’ Ndipo wangumnene, ‘Jitole ŵakalata ŵako, ndi ja pasi ruŵi, ndi lembapo machumi ghankhonde.’

⁷ Pavuli po wangumunene munyake, ‘Ndipo iwe wateuwako uli unandi?’ Ndipo iyo wanguti, ‘Myeso machumi pe chumi ya trigu.’ Wangumunene, ‘Jitole ŵakalata ŵako, ndi lembapo machumi ghankhonde ndi ghatatu.’

⁸ Ndipo mbuyake wangurumba mlindanyumba wambura-urunji mwakuti wanguchita kwakuchenje: pakuti ŵana ŵa magonezi uwu mbachenjezi kuchiri ku mphapu yawo kwakuruska ŵana ŵa ukweru.

⁹ Ndipo ine ndikuneniyani, jichitiyeni ŵabwezi ndi chuma cha uwura-urunji, alinga kuti, penipo chingapereŵe ŵangamrondeni mu mahema ghamuyaya gho.

¹⁰ “Yo ngwamagomekezgeka mu chimana, ngwamagomekezgeka mu chikuru so: ndipo yo ngwambura urunji mu chimana, mu chikuru nacho ngwambura urunji.

¹¹ Asani viyo kuti mwaŵa ŵakugomezgeka cha mukusunga usambasi wa mucharu, mungaziŵa kugomezgeka uli ndi usambasi wa urunji?

¹² Ndipo asani mu chaŵeni mulive kuŵa ŵamagomekezgeka, njani wampaskeninge chaku mwaŵeni?

¹³ Palive muŵanda yo ngwanthazi kuteŵete ŵambuya ŵaŵi: chifukwa pamwenga wamtinkhenge yumoza, ndi wanjenge munyake; pamwenga ku yumoza wamiziriyenge ndi wamyuyuwenge munyake. Kuti muziŵa kuteŵete Chiuta ndi so chuma cha.”

Makambidu ghanyake paku Yesu

¹⁴ Ndipo vyenivyo vyose ŵavwanga ŵaFarisi wo mbamwanja ndrama; ndipo ŵanyumbanga.

¹⁵ Ndipo wanguti kwaku iwo, “Imwe ndimwe ŵakujirunjiska pa maso gha ŵanthu; kweni Chiuta waziŵa mitima yinu: pakuti cho nchakutumphulika mu ŵanthu mbukazuzi pa maso ghaku Chiuta.

¹⁶ “Langulu lo ndi ŵamchimi wo ŵengako mpaka Yohane: kutuwa kweniko ufumu waku Chiuta umemezeka, ndipo yose waphatikizgamo nthowa zake.

¹⁷ Kweni nkhuyuyu kuti kuchanya ndi pasi virute, kwakuruska kuti kadonthu ka langulu lo kangapereŵe.

¹⁸ “Yose wakupata muwoli wake ndi wakuto munyake wachita ureŵi: ndipo yose wakuto wakudikika ndi mrumi wake wachita ureŵi.

Munthu musambasi ndi Lazaro wavironda

¹⁹ “Ndipo kwenga msambasi yumoza, yo wavwaranga vyakujeduka ndi bafuta wakuworofoka, wakukondwa zuŵa ndi zuŵa;

²⁰ ndipo kwengaso mukavu yumoza, ndi zina Lazaro, wakumatika vironda, mweniyo watolekiyanga pakhomo la msambasi,

²¹ wakukhumba kuhiŵika ndi marivuvu ghakumbotoka ku gome la msambasi yo; ndipo ŵagaru nawo ŵazanga, ŵamunyanganga vironda vyake.

²² Ndipo kunguŵa kuti mpempha yo wangufwa, ndipo wangunyamulikiya ndi ŵangelo ku chipakatu chaku Abrahamu, ndipo msambasi nayo wangufwa, ndipo wanguŵikika.

²³ Ndipo mu Hadesi wanguti wayinuska maso ghake, pakuŵa mu maurwirwi, wanguwona Abrahamu kutari, ndi Lazaro mu chipakatu chake.

²⁴ Ndipo iyo wangukuta, wanguti, ‘Ada Abrahamu, ndifwiyeni lisungu, tumani Lazaro, alinga kuti wabizge songu ya munwi wake mu maji, ndi waziziriske lilime langu; pakuti ndirumwiskika mu mlipu uwu.’

²⁵ Kweni Abrahamu wanguti, ‘Wamwana, kumbukanga kuti unguronde vyamampha vyako mu umoyo wako, ndi Lazaro nayo viheni: kweni sone panu wasangaruskika iyo, kweni iwe urumwiskika.

²⁶ Ndipo paku vyose vyenivi pakati pidu ndi pinu chinkhwau chikuru chajarikika, chakuti akukhumba panu kwambukiya kwinu ŵangaŵanga ŵanthazi cha, ndipo kutuwa kweniko ŵangambukiya kwaku ifwe cha.’

²⁷ Kweni wanguti, ‘Ndikuŵeyereni viyo, ada, kuti mumtumizge ku nyumba ya ada:

²⁸ chifukwa nde nawo ŵabali ŵankhonde; alinga kuti waŵasimikizgiye, vinu ŵangaza iwo nawo mu malo yagha gha urwirwi.’

²⁹ Kweni Abrahamu watinge, ‘Ŵe nawo Mosese ndi ŵamchimi wo; ŵavwenge iwo.’

³⁰ Kweni iyo wanguti, ‘Awa na, ada Abrahamu: kweni asani yumoza waku wakufwa wangaŵakiya, ŵang'anamukenge.’

³¹ Kweni wangumunene, ‘Asani ŵareka kuvwiya Mosese ndi ŵamchimi wo, kuti ŵakopekenge cha, chingana wangayuka yumoza waku ŵakufwa.’”