Luka 11 - Tonga Bible 1986

Yesu wasambizga kuromba

¹ Ndipo kunguŵa, wachiromba mu malo ghakuti, po wangureka, yumoza wa ŵasambizi ŵake wanguti kwaku iyo, “Ambuya, tirunguchizgeni ifwe kuromba, uli ndimo Yohane nayo wanguŵa runguchizgiya ŵasambizi ŵake.”

² Ndipo wanguŵanene, “Penipo muromba, nenani, ‘Dada, Lipatulike zina linu, Uze ufumu winu.

³ Tipaskeni zuŵa ndi zuŵa chakurgha chidu cha zuŵa.

⁴ Ndipo tirekiyeni vilakwa vidu, chifukwa taŵeni nafwe tiŵareke ŵakutewuwa kwaku ifwe. Ndipo mungatitole mu kesedu.’ ”

⁵ Ndipo wangukamba nawo, “Njani waku imwe waŵenge ndi bwezi, ndi wakenge kwake ndi usiku pakati, ndi wanenege nalo, ‘Bwezi, ndilambiskeko viŵande vitatu,

⁶ pakuti bwezi langu lakutuwa kurwendo laza, ndipo ndirive keniko ndilijarikiyenge:’

⁷ ndipo yo wakukati pakwamuka wanenenge, ‘Ungandisuzganga cha: chisasa chajarika kali, ndipo twana twangu twe nane pa chita; kuti ndiziŵa cha kuyuka ndi kukupaska.’

⁸ Ndikuneniyani, chingana kuti watinge wayukenge ndi kumpaska cha, chifukwa cha kuŵa bwezi lake; kweni chifukwa cha chitatata chake wayukenge ndi kumpaska vyose vyo wakavuka.

⁹ Ndipo ine ndikuneniyani, pemphani, ndipo kupaskikenge kwaku imwe; penjani, ndipo mubowozgenge; gong'oskani, ndipo kujurikiyenge imwe.

¹⁰ Chifukwa yose wakupempha waronde; ndi wakupenja wabowozga; ndi ku wakugong'oska kumujurikiyenge.

¹¹ Kumbi wangaŵapo yumoza waku imwe uskeu yo wangapaska mwana wake njoka penipo watumupempha somba?

¹² Pamwenga wangampaska chipiriri penipo watumupempha zira?

¹³ Viyo asani imwe, mwaŵakuŵa ŵaheni, muziŵa kupaska mipasku yamampha ku ŵana ŵinu, uli ukongwaku Ada wo ŵakuchanya ŵapaskenge Mzimu Wakupaturika ku ŵakuŵapempha?”

Yesu ndi Belzebule

¹⁴ Ndipo watuzganga demone wambuwu. Ndipo kunguŵa, wanguti watuwa demone yo, wambuwu yo wangurongoro; ndipo yinguzizwa mizinda yo.

¹⁵ Kweni ŵanyake ŵamwaku wo ŵanguti, “Mwaku Belzebule, mura wa ŵademone, waŵatuzgiya ŵademone.”

¹⁶ Ndipo ŵamwenga pakumwesa ŵangupenja kwaku iyo chisimisimi chakutuwa kuchanya.

¹⁷ Kweni iyo, wakuziŵa maghanaghanu ghawo, wanguŵanene, “Ufumu wose wakugaukirana paku wija upopeskeka; ndi nyumba yakugaukiya pa nyumba, yituwa pasi.

¹⁸ Ndipo asani Satana nayo wajigauwa mweneko, ufumu wake umenge uli? Pakuti mukamba kuti ine mwaku Belzebule ndiŵatuzgiya ŵademone.

¹⁹ Kweni asani ine mwaku Belzebule ndituzgiya ŵademone, nanga ŵana ŵinu ŵaŵatuzgiya mwaku yani? Chifukwa chenichi iwo ŵaŵenge ŵeruzgi ŵinu.

²⁰ Kweni asani ndi munwi waku Chiuta ndituzgiya ŵademone wo, penipo ndipo wafikiya paku imwe ufumu waku Chiuta.

²¹ Penipo wanthazi yo wakuphatikiya limu walinda nyumba yake ya ufumu, viŵetu vyake vye mu chimangu.

²² Kweni asani wanthazi kwaku iyo waziya pake ndi kumgoda, waphanga vidya vyake mwaku vyo wagomezga ndipo miskowu yake wagaŵa.

²³ Yo kuti ngwa pamoza nane cha, ngwakumikana nane; ndipo yo walive kuunjika pamoza nane cha, waparghang'a.

Kuwe kwa mzimu wauyu

²⁴ “Penipo mzimu wawiyu utuwa mu munthu, uporotamu mu malo ghachi paramba, wakupenja chipumulu; ndipo wambura kuchibowozga, utiti, ‘Ndiwerenge ku nyumba yangu mwenimo ndingutuwa.’

²⁵ Ndipo wati waza wasaniya njakupeyeka ndi njakurulikika.

²⁶ Penipo uruta ndipo ujitole mizimu yamwenga yinkhonde ndi yiŵi yakuhenepa ku weneko; ndipo yiseremu ndipo yija mwenimo; ndipo vyaumari vya munthu yo vituŵa vyakuhenepa ku vyakudanga vyo.”

Likondwa leneko

²⁷ Ndipo kunguŵa wachikamba iyo vyenivi, munthukazi ngana wamu mzinda, wakusamphuska liyowozi, wanguti kwaku iyo, “Njamwaŵi mphapu yo yakupapa imwe, ndi maŵe ghenigho mungonkha.”

²⁸ Kweni iyo wanguti, “Viŵiviŵi kwari mbamwaŵi wo mbakuvwa mazu ghaku Chiuta ndi mbakughachita.”

Ŵapenja chisimikizgu

²⁹ Ndipo yati yawungana mizinda yo, wangwamba kunena, “Mphapu iyi ndi mphapu yiheni: yipenja chisimikizgu, ndipo kuti chisimikizgu chipaskikenge kwaku iyo cha, kweni chisimikizgu cho pe chaku Yona.

³⁰ Chifukwa uli ndimo Yona wanguŵiya ŵaku Nineve chisimikizgu viyo ndimo waŵiyenge Mwana wa munthu ku mphapu iyi.

³¹ Fumukazi yaku maraŵi yamyukiya mu cheruzgu cho pamoza ndi ŵanthurumi ŵamphapu iyi, ndipo yamkuŵasuska: pakuti yingutuliya ku vigoti vya panupasi kuzachivwa zeru yaku Solomoni; ndipo wonani, wakuzungura Solomoni we panu.

³² Ŵanthurumi ŵaku Nineve ŵasokiyenge mu cherezgu cho pamoza ndi mphapu iyi, ndipo ŵayisuskenge; pakuti ŵangung'anamuka chitaula chaku Yona; ndipo onani, wakuzungura Yona we panu.

Ukweru wa liŵavu

³³ “Palive yumoza wati wakozga nyali, wayiŵika mu chimphuli, chingana nkhusi ku mwesu wo, kweni pa chikoleru, alinga kuti ŵakuseremo ŵawonenge uŵali.

³⁴ Nyali ya liŵavu lako ndi jiso lako; penipo jiso lako lingaŵa leneko liŵavu lako lizirima nalo ndaukweru; kweni asani lingaŵa liheni, liŵavu lako nalo ndamdima.

³⁵ Viyo thoŵa alinga kuti ukweru wa mwako uŵe mdima cha.

³⁶ Asani viyo liŵavu lako lizirima ndakuŵala, lambura chigaŵa chimoza chamdima, liŵenge lakuŵala kosekose, uli mphenipo nyali ndi uŵali wake yikuŵaliya.”

Yesu wasimikizga uheni wa ŵaFarisi ndi ŵaSambizgi ŵa marangu

³⁷ Ndipo wachirongoro, ŵaFarisi yanimweni wampenjanga kuti warauke kwake: ndipo wati wasere wanguja pasi.

³⁸ Ndipo muFarisi yo, wanguti wawona wanguzizwa kuti wengavi kusamba danga paurongo pa mrauko.

³⁹ Ndipo Mbuya wagumunene, “Sono imwe mwaŵaFarisi muphoto kubwaro ko kwa jomera ndi kwa mbali; kweni mukati mwinu muzala kufyonkhonyo ndi uheni.

⁴⁰ Mwambura zeru, asi wakwata chakubwaro wanguwata chamkati so?

⁴¹ Posepose paskani vyamkati nge ndi vyawezi, ndipo onani, vyose vikuŵiyani vyakuphotoleka.

⁴² “Kweni owe kwaku imwe, mwaŵaFarisi! Pakuti mupereka vyachichumi, nthenderu ndi vyema ndi sungwi yose, ndipo mujumpha cheruzgu ndi chanju vyaku Chiuta: kweni kungwenere kuchita vyenivi, ndi viya kuvireka cha.

⁴³ Owe kwaku imwe, mwaŵaFarisi! Pakuti mutanja chitengu chachimoza mu masinagoge, ndi matauzgu mu mphara zo.

⁴⁴ Owe kwaku imwe! Pakuti mwe nge ndi miunda yambura kuwoneka, ndipo ŵanthu ŵakwendayenda pachanya kuti ŵayiziŵa cha.”

⁴⁵ Ndipo yumoza wa ŵachilangulu wakwamuka wamunene, “Muwomba, pakukamba vyenivi, muchenya ifwe nafwe.”

⁴⁶ Ndipo iyo wanguti, kwaku imwe namwe, ŵachilangulu, “Owe! Pakuti mupingizga ŵanthu mphingu zambura manyamulika, ndipo mwaŵeni kuti muzikwaska mphingu cha ndi umoza wa minwi yinu.

⁴⁷ Owe kwaku imwe! Pakuti mukumba miunda ya ŵamchimi, ndipo ŵambuyamwe ŵanguŵabaya.

⁴⁸ Viyo mwe ŵakaboni ndipo muzomerezgana ndi nchitu zo za ŵauskemwe; pakuti iwo ŵanguŵabaya, ndipo imwe muzenga miunda yawo.

⁴⁹ Chifukwa chaku chenichi zeru nayo yaku Chiuta yinguti, ‘Nditumizgiyenge kwaku wo ŵamchimi, ndi ŵakutumika; ndipo ŵabayengepo ndi ŵandondoloskengepo ŵaku wo;’

⁵⁰ alinga kuti zilembezeke ku mphapu iyi ndopa zo zaku wose ŵamchimi, zakudikiya kwanda ku chidika cha charu.

⁵¹ Kutuwa ku ndopa zo zaku Abelu mpaka ku ndopa zaku Zekariya, yo wangubayika pakati pa jochero lo ndi yo nyumba: inyadi, ndikuneniyani, zilembezekenge ku mphapu iyi.

⁵² Owe kwaku imwe, ŵachilangulu! Pakuti mwatuzgapo chakujuriya mziŵiru: mwaŵeni kuti munguseremu cha, ndi ŵakuseremu wo munguŵamika.”

⁵³ Wanguti watuwa kweniko iyo, ŵalembi ndi ŵaFarisi ŵangwamba kumfinyikizga ukongwa, ndi kufumbana nayo ndi vinandi,

⁵⁴ ŵakumuŵandamiya kwachikole kanthu kaku mlomo wake.