Luka 10 - Tonga Bible 1986

Yesu watuma ŵanthurumi machumi ghankhonde ndi ŵaŵi (72)

¹ Pavuli paku vyenivi Mbuya wangumika ŵanyake machumi ghankhonde ndi ghaŵi pachanya ŵaŵi, ndipo wanguŵatuma ŵaŵi ŵaŵi paurongo pa chisku mu muzi wose ndi malo, kweniko wakhumbanga kuza mweneko.

² Ndipo wanenanga kwaku wo, “Chivuna ndicho nchikuru, kweni ŵanchitu mbamanavi: viyo ŵeyereni Mbuya wa chivuna cho, kuti wapong'eko ŵanchitu ku chivuna chake cho.

³ Kaninga; onani, ine ndikutumani nge mbanamberere mukati mu zimphumphi.

⁴ Mungapinganga cha chikwama, chingana ndi katiri, chingana ndi viyatu: ndipo mungendamtauzga nanga njumoza cha mu nthowa.

⁵ Ndipo mu nyumba yose mwenimo mungasere, nenani danga, ‘Chimangu ku nyumba yeniyi!’

⁶ Ndipo asani walimo mwana wa chimangu, chipumuliyenge pake chimangu chinu: kweni asani viyo cha, chamuwere paku imwe.

⁷ Ndipo mwaku yeniyo pe nyumba jaririyani, ŵakurgha ndi ŵakumwa vya kwaku wo: chifukwa wanchitu ngwakwenere mphotu yake. Mungayingayinganga ku nyumba ndi nyumba.

⁸ Penipo musere mu mzinda we wose ndipo ŵamurondiyani, rghani vyose vyo ŵamurongosoliyani:

⁹ ndipo ŵachizgeni ŵarwali mwake, ndi nenani kwaku wo, ‘Waŵandikiya kwaku imwe ufumu waku Chiuta.’

¹⁰ Kweni mu muzi wose mwenimo mungasere, ndi kuti ŵakurondeni cha, mwati mwatuliya ku miseu yake, nenani,

¹¹ ‘Fuvu nalo lamu muzi winu, lakukaniriya kwaku ifwe, tikung'unthiya imwe, ziŵani mbwenu chenichi, kuti waŵandika ufumu waku Chiuta.’

¹² Ndinene imwe, mu zuŵa liya kuŵiyenge kwamakunthirikaku ku Sodomu kwakuruska ku muzi wuwa.

Mizi yitatu vambura kurapa

¹³ “Owe, nawe, Korazine! Owe nawe, Betesaida! Pakuti asani milimu yanthazi yo yachitika mwako yinguchitika mu Turo ndi Sidoni, mphanyi ŵangung'anamuka mwaka, ŵakuja mu chisusu ndi choto.

¹⁴ Kweni kuŵiyenge kwamakunthirikaku mu cheruzgu cho ku Turo ndi Sidoni, kwakuruska kwaku imwe.

¹⁵ Ndipo iwe Kapernaumu utumphulikenge mpaka kuchanya kumbi? Mpaka ku Hadesi upauskikiyenge.

¹⁶ “Yo ngwakuvwa imwe, watuvwa ine; ndi wakukana imwe wakana ine; ndi wakukana ine wakana wakundituma.”

Kuwe kwaku ŵa machumi ghankhonde ndi ŵaŵi (72)

¹⁷ Ndipo wo machumi ghankhonde ndi ghaŵi pachanya ŵaŵi ŵanguwe ndi chimwemwe, ŵakuti, “Ambuya, ŵademone nawo ŵathere ifwe mu zina linu.”

¹⁸ Kweni wanguti kwaku wo, “Ndawonanga Satana yo kumbotoka ulaka ndi limphezi la kuchanya.

¹⁹ Awonani ndakupaskani mtufu wakuphwatiya pa zinjoka ndi vipiriri, ndi pa nthazi yose ya mphindikwa: ndipo palive kanthu kose.

²⁰ Posepose napo mwaku chenichi mungakondwere cha, chakuti mizimu yo yithere imwe, kweni kondwani kuti mazina ghinu ghalembeka kuchanya.”

Yesu wakondwere

²¹ Mu ora leniliya Yesu wangukondwere mu Mzimu Wakupaturika, ndipo wanguti, “Ndikurumbani, Ada, Mbuya wa kuchanya ndi panupasi, kuti mungubisa vyenivi ku ŵazeru ndi ŵakawamo ndi munguvivumbuliya ku malitema: inya, Ada, pakuti viyo kunguŵa kwakukondweska paurongo pinu.

²² Vyose vyaperekeka ndi Ada kwaku ine: ndipo palive yumoza waziŵa yo ndi Mwana, kweni Dada pe; ndipo yo ndi Dada, kweni Mwana pe, ndi yose kwaku mweniyo Mwana wangakhumba kumvumbuliya.”

²³ Ndipo wanguti wang'anamukiya ku ŵasambizi wo, pa udeke wanguti, “Ngamwaŵi maso gho ghawona vyo muwona.

²⁴ Chifukwa ndikuneniyani, kuti ŵamchimi ŵanandi ndi ŵakaronga ŵangukhumba kuwona vyo muwona imwe ndipo kuti ŵanguviwona cha; ndi kuvwa vyenivyo mutuvwa, ndi kuti ŵanguvivwa cha.”

Ntharika ya muSamaria wamampha

²⁵ Ndipo onani, wamarangu ngana wangusoka, wakumwesa, wakuti, “Msambizgi, nkhachitanga chine kuti ndihare umoyo wamuyaya?”

²⁶ Ndipo iyo wanguti kwaku yo, “Mu langulu lo chalembeka chine? Uteska uli?”

²⁷ Ndipo wangwamuka wanguti, “Wanjenge Mbuya Chiuta wako ndi mtima wako wose, ndipo ndi mzimu wako wose, ndipo ndi nthazi yako yose, ndipo ndi chinjeru chako chose; ndi mwanasi wako uli ndiwe wamweni.”

²⁸ Ndipo wanguti kwaku iyo, “Wamuka kwakurunjika: chita chenichi, ndipo ukaŵanga ndi umoyo.”

²⁹ Kweni iyo, pakukhumba jujirunjiska, wanguti kwaku Yesu, “Ndipo ndi yani mwanase wangu?”

³⁰ Yesu wangwamuka wanguti, “Munthu ngana ku Yerusalemu wasikiyanga ku Yeriko; ndipo wanguwa mu ŵankhungu, wo ŵanguti ŵamzuwa ndi so ŵampuma ŵanguruta ŵakumleka pafupi kufwa.

³¹ Ndipo kunguŵa kuti mzukurungana wasikanga mu nthowa yiya: ndipo wanguti wamwona, wanguŵambalika.

³² Ndipo viyo muLevi nayo, wanguti wafikapo pa malo gho, ndi wanguti wamwona wanguŵambalika.

³³ Kweni muSamaria ngana pa rwendo wangufikapo paku yo: ndipo wanguti wamwona, wangumfwiya lisungu;

³⁴ ndipo, wanguti wazako, wangukurunga mabamba ghake wakupunguliyapo mafuta ndi vinyo; ndipo wanguti wamjarika pa chinyama chaku yija, wangumtole ku mphara, ndipo wangumpazga.

³⁵ Ndipo ku mlenji, wakutuzga matambala ghaŵi, wangughapaska ku wamphara, ndipo wanguti, ‘Umuphwere, ndipo chose cho chinyake ungamariyapo, ndichachiwe ine ndazamuwerezgiyapo.’

³⁶ Njani waku yaŵa ŵatatu watukuoneke waŵadi mwanase waku yo wanguwa mu ŵankhungu?”

³⁷ Ndipo iyo wanguti, “Yo wangumchitiya lisungu.” Ndipo Yesu wanguti kwaku iyo, “Kanga, kachitenge iwe kwakukozgana.”

Yesu wachezga ndi Marta ndi Mariya

³⁸ Ndipo ŵachiruta iwo, mweneko wangusere mu muzi wakuti: ndipo munthukazi ngana, ndi zina Marta, wangumronde mu nyumba yake.

³⁹ Ndipo iyo wenga nayo mhurwa wake wakutamulika Mariya, mweniyo so, wakuja pasi ku marundi ghaku Yesu, wavwanga mazu ghake.

⁴⁰ Ndipo Marta watangwamikanga ndi uteŵeti unandi; ndipo wakufika wanguti, “Ambuya, asi muphwere kuti mhurwa wangu wandisiya kuteŵeta ndija? Muneniyeni kuti wawovyani nane.”

⁴¹ Kweni wakwamuka Mbuya wanguti kwaku iyo, “Marta, Marta, ukweŵeke ndi usuzgikiya pa chifwa cha vinthu vinandi:

⁴² kweni kwe msowu wa chimoza: ndipo Mariya watondo chigaŵa chamampha cho, chenicho kuti chituzgikengeko kwaku iyo cha.”