Jobu 9 - Tonga Bible 1986

Jobu wazomerezga ukuru wa Ambuya, kweni ŵarunji ndi ŵaheni ŵalangika kwakuyana-yana. Masuzgu ghake ghamukhumbiska kufwa

¹ Penipo Jobu wangwamuka:

² “Nadi, ndiziŵa kuti kwe viyo. Kweni munthu wangaziŵa uli kuŵa murunji pa maso paku Chiuta?

³ Asani yumoza wangakhumba kupindana nayo kuti wangaziŵa kumwamuka chingana nkhamoza cha mu zinyengo chikwi chimoza.

⁴ Ngwazeru mu mtima ndi wakurimba mu nthazi. Njani wajingangamiska kumikana nayo ndi wapunda?

⁵ Iyo wanderezga mapiri, yiwo kuti ŵaziŵa cha penipo watighagadabuwa mu ukari wake;

⁶ mweniyo wasukuniska charu kuchituzga pa malo ghake, ndipo mizati yake yiyaghayika;

⁷ mweniyo walanguliya dazi ndipo lituwa, wajaliya nyenyezi ndi chizighiriyo;

⁸ ndipo yija wangutandazga mitambo ndi wangukanda pa mayigha gha nyanja;

⁹ wanguchita chipula-usiku ndi mauta, chimulambagombe, ndi vingodya vyaku mwera;

¹⁰ ndiyo wachita vinthu vikuru vyambura kuziŵikwa ndi vinjeru vidu, ndi vinthu vinandi vyakuziziswa vyambura maŵerengeka.

¹¹ Wonani wadumuwa paku ine kweni kuti ndimuwona cha. Wajumpha kweni ine ndilive kumziŵa.

¹² Wonani wapoka ndiyani wangamukanizga? Ndiyani wakanenanga kwaku iyo, ‘Nchine cho uchita?’

¹³ “Chiuta kuti wakawezgiyanga vuli cha ukari wake; pasi pake ŵakovya ŵaku Rahabi ŵasindama.

¹⁴ Nanga ndingaziŵa kumwamuka uli, kusankha mazu ghangu ndi iyo?

¹⁵ Chingana ndinguŵa wambura kalema, ndinguziŵa kumwamuka cha; nditenere kuŵeyere lisungu ku wakundipacha wangu.

¹⁶ Asani ndingumudana ndipo wangundamuka, kuti ndatinge ndivwani cha kuti wategherezganga ku mazu ghangu.

¹⁷ Pakuti wandifyo ndi mphepo ya lirondo, ndi watandaniska vironda vyangu kwambura kafukwa;

¹⁸ kuti wakandizomerezganga cha nditute, kweni wandisuzga ndi maurwirwi.

¹⁹ Asani tingakamba ndi za nthazi, iyo ndiyo wanthazi! Asani tinganena ndi za cheruzgu; ndiyani yo wangamudana?

²⁰ Chingana ndiŵe wambura chifukwa mlomo wangu ukandisuskanga, nanga ndiŵe wambura kalema wakandisaniyanga kuti nde wakwananga.

²¹ Chingana ndiŵe wambura kalema, kweni kuti ndingajiphwere ndamweni ndija cha; ndipepuwa umoyo wangu.

²² Nchimoza pe chose, chifukwa ichi ndititi waparghang'a wose ŵakurunjika ndi ŵaheni.

²³ Po urwani ubaya ruŵiruŵi, iyo waseka kukweŵeka kwa wambura kwananga.

²⁴ Charu chapasi chapereka mu janjala ŵaheni, wajara maso gha ŵeruzgi ŵake; asani kuti ndiyo cha, ndiyani nanga?

²⁵ “Mazuŵa ghangu ghatenda ruŵi kwakuruska wakuchimbiya; ghatenda ruŵi kuti ghawona umampha cha.

²⁶ Ghajumpha ruŵi nge ndi mphunga za mateti, nge ndi nombo yivwandamiya nyama.

²⁷ Asani ndititi, ‘Nkharuwanga dinginyiko langu, ndazamusintha kawonekedu kangu ka chitima, ndi kuŵa walikondwa lamampha,’

²⁸ nditopa kukomwa kwangu kose, chifukwa ndiziŵa kuti imwe kuti mundipimenge wambura kafukwa cha.

²⁹ Nkhasuskikanga; chifukwa nchine nanga nditakataka ŵaka kwambura kanthu?

³⁰ Nanga ndingajisambika ndi manthonera gha nyankhuŵinda, ndi kutozga manja ghangu ndi mafuta ghatuŵa,

³¹ ndipuuli mundipong'enge mu zenje, ndipo vivwalo vyangu vindikanenge.

³² Pakuti Iyo kuti ndi munthu ngendine cha kuti ndimumuke, kuti tose tize mu cheruzgu pamoza.

³³ Palivi yumoza yo wangateruzga pakati paku ifwe, yo wanguziŵa kuŵika janja lake paku ifwe taŵaŵi.

³⁴ Watuzgepo nthonga yake paku ine ndipo kofya kwake kureke kunditenthemeska ine.

³⁵ Viyo nkhakambanga kwambura kumpopa iyo, chifukwa kuti nde viyo cha mu mtima wangu.