Jobu 7 - Tonga Bible 1986

¹ “Kumbi munthu walive mlimu unonono pa charu? Kumbi mazuŵa ghake kuti ghayanacha ndi mazuŵa gha wanchitu wake?

² Nge ndi muŵanda yo wakhumba muduzi ndi nge ngwanchitu yo wapenja malipilo ghake.

³ Viyo so nane ndipaskika myezi yawaka ndi mausiku gha chitima ghamikikiya ine.

⁴ Pa ndagona pasi, ndititi, ‘Ndiyukenge zukwanji?’ Kweni usiku ngutali, ndipo nditukurukatukuruka mpaka ku matandakucha.

⁵ Liŵavu langu lakoreka ndi fusi ndi lisilu, khungu langu limira gwa, ndipo pavuli lituŵa so lakuwomba.

⁶ Mazuŵa ghangu ghatenda ruŵi kwakuruska chitungu cha wakusona, ndipo ghamara kwambura chigomezgu.

⁷ “Kumbukani kuti umoyo wangu ndi mvuchi, jiso langu kuti liwonenge so vyamampha cha.

⁸ Jiso laku yo watindiwona, kuti likandiwonanga so cha; penipo maso ghako gheche kulereska paku ine, ukawona nga kuti ndaruta.

⁹ Nge ndimo mtambo usandukiya ndi kuzirimitiya, viyo ndimo waliri yo wasere mu muunda kuti watuwamo so cha.

¹⁰ Kuti wawere so ku nyumba yake cha, nanga ndi malo ghake kuti ghamuziŵa so cha.

¹¹ “Viyo kuti ndikanizgenge mlomo wangu cha, nkhakambanga mu urwirwi wa mzimu wangu, ndidinginyikenge mu kuŵaŵa kwa umoyo wangu.

¹² Kumbi ndine nyanja, pamwenga chisomba, kuti mundiŵikiye ulonda?

¹³ Ndichikamba kuti, ‘Chita changu chikandisangaruskanga, chakugonapo changu chikachepeskanga kudinginika kwangu,’

¹⁴ viyo imwe mundichiruska ndi maloto ndi kunditenthemeska ndi viwona,

¹⁵ viyo mphanyi ndasankha kujikwintha ndi nyifwa kwakuruska viwanga vyangu.

¹⁶ Nditinkha umoyo wangu ndi kuti ndingakhumba kuja wamoyo muyaya cha. Ndirekeni chifukwa mazuŵa ghangu ndi mvuchi wa ŵaka.

¹⁷ Kambi munthu nkhane, kuti mumukuzgi ukongwa viyo, ndi kuŵika mtima winu paku iyo,

¹⁸ kuchezga nayo mlenji we wose, ndi ku mwesa nyengo yose?

¹⁹ Kumbi mukarekanga zuŵanji kundiphwere pamwenga, kundireka ndija mpaka ndimeze mata ghangu?

²⁰ Asani ndinanga ndichitenji kwaku imwe, mwaŵalonda ŵa ŵanthu? Kumbi chifukwa nchine mwandichita nge nchizindikiro chinu? Kumbi chifukwa nchine ndaŵa mphingu yizitu kwaku imwe?

²¹ Kumbi chifukwa nchine mureka kugowoke mamphuru ghangu ndi kutuzgapo ubudi wangu? Pakuti sono ndigonenge mu fuvu; mukandipenjanga kweni kuti nkhasanirikanga cha.”