Jobu 42 - Tonga Bible 1986

Jobu wajichepeska pa maso paku Chiuta

¹ Ndipo Jobu wangwamuka Ambuya wanguti:

² “Ndiziŵa kuti muziŵa kuchita vinthu vyose, ndipo palivi kuti ghanaghano linu lingakanizgika.

³ ‘Ndiyani uyu wambura zeru, wabisafundu?’ Chifukwa ichi ndakamba vyo ndengavi kuviziŵa umampha, vinthu vyakuziziswa ukongwa kwaku ine, vyo ndengavi kuviziŵa.

⁴ ‘Vwani, nkhakambanga; nkhamufumbaninga, ndipo mundikonkhoske.’

⁵ Ndingumuvwani ndi makutu pe, ndipo sono maso ghangughamuwonani,

⁶ chifukwa ichi nditijisuska, ndipo ndajiwezga mu fuvu ndi mu choto.”

⁷ Ambuya anguti akamba mazu yagha kwaku Jobu, Ambuya anguti kwaku Elifazi muTemani, “Ukari wangu wakolere paku iwe ndi pa mabwezi ghako ghaŵi; chifukwa kuti mwakamba cho nchakurunjika cha paku ine, nge ndimo mteŵeti wangu Jobu wakambiya.

⁸ Sono muchifukwa ichi toni nkhuzi zinkhonde ndi ziŵi, ndi mberere zinthurumi nazo zinkhonde ndi ziŵi, ndi rutani ku mteŵeti wangu Jobu, ndipo kajiperekiyeni sembe yakocha yakumaŵeni, ndipo Jobu mteŵeti wangu wakakurombiyaninga. Nkharondiyanga rombo lake chifukwa kuti ndikhumba kuchita namwe kwakuyana ndi uheni winu cha, pakuti mulive kukamba chinthu chamampha cha paku ine nge ndimo mteŵeti wangu Jobu wachitiya.”

⁹ Viyo Elifazi muTemani, ndi Bildadi mu Shuhite, ndi Zophara mu Namati ŵanguruta ndi ŵanguchita chenicho Ambuya anguŵanene; ndipo Ambuya anguronde rombo laku Jobu.

Ambuya anguwerezgiyapo usambasi wose waku Jobu

¹⁰ Ndipo Ambuya angumuwezge Jobu mwaŵi wake penipo wangurombe mabwezi ghake, Ambuya angumpaska vinandi kuwerezga kaŵi kuruska vyo wanguŵa navyo pakudanga.

¹¹ Ndipo ŵabali ŵake ndi ŵazichi ŵake wose, ndi wose wo ŵangumziŵa kali ŵanguza kwaku iyo, ŵangurgha nayo chiŵande mu nyumba yake, ndi ŵangumurongo lisungu ndi ŵangumusangaruska chifukwa cha viheni vyose vyo Ambuya angusiskiya pake, ndipo we yose waku wo wangumpaska ndrama, ndi mphete ya golide.

¹² Ambuya angutumbika mazuŵa ghakumariya ghaku Jobu kuruska mazuŵa ghake ghakwamba. Wenga ndi mberere vikwi chumi pachanya vinaye (14,000) ndi ŵagamila vikwi vinkhonde ndi chimoza (6,000) ndi ng'ombe za magoŵa chikwi chimoza (1,000) ndi mbunda zinthukazi chikwi chimoza (1,000).

¹³ Wanguŵa so ndi ŵana ŵanthurumi, ŵankhonde ndi ŵaŵi, ndi ŵana ŵanthukazi ŵatatu.

¹⁴ Wangudana zina la wakudanga Jemima, ndi zina la wachiŵi Keziya, ndi zina la wachitatu Kerenihapuku.

¹⁵ Mu charu chose munguŵavi ŵanthukazi ŵamampha nge mbana ŵanthukazi ŵaku Jobu, ndipo uskeu wanguŵapaska chihara mukati mu ŵazichi ŵawo.

¹⁶ Pavuli paku ichi Jobu wanguja ndi umoyo virimika machumi pe chumi pachanya machumi ghanayi (140), wanguwona ŵana ŵake, ndi ŵana ŵa ŵana ŵake, ndiso fuku lake la chinayi.

¹⁷ Ndipo Jobu wangufwa pa ura ukongwa ndi wa mazuŵa ghanandi.