Jobu 41 - Tonga Bible 1986

¹ “Kumbi ungaziŵa kuŵeja mung'ona ndi mbeja yakuŵeje somba, pamwenga kumangiya pasi lilime lake ndi chingwe?

² Kumbi ungaserezga ruzi mu mphunu zake, pamwenga kutoro mlomo wake ndi mbeja?

³ Kumbi wakakuŵeyerenga kaŵikaŵi? Kumbi wakakambanga nawe mazu ghayuyu?

⁴ Kumbi wakapangananga nawe phanganu, Kuti umuto waŵe mteŵeti wako muyaya?

⁵ Kumbi ukaseŵenga nayo nge nkhayuni, pamwenga kuti ŵateŵete ŵako ŵanthukazi ŵamuliske kurgha?

⁶ Kumbi ŵamaronda ŵakalimbananga pakumuguliska? Pamwenga kumugaŵanizga mukati mu ŵamaronda?

⁷ Kumbi ukazazanga chikumba chake ndi mikondo, pamwenga mutu wake ndi mikondo yakubayiya somba?

⁸ Wika manja ghako paku iyo, ghanaghana ndi nkhondo, kuti ukayichitanga so cha!

⁹ Wona, chigomezgu cha munthu cha paku iyo chaŵa chawaka; watopa pakumuwona.

¹⁰ Palivi wachiganga kuti wamusukuniske. Ndiyani nanga yo wangama pauronga pake?

¹¹ Ndiyani yo wandipaska, kuti nane ndimuwezge? Che chose cho chemu charu chapasi nchangu.

¹² “Kuti nkhajanga chisisi cha ndi viŵaro vya mung'ona, pamwenga ndi nthazi zake zikuru, ndi kaŵiro kake kakunozga.

¹³ Ndiyani yo wangaziŵa kumufuŵa chikopa chake? Ndiyani wangaziŵa kusere mukati mu mizeri yake yiŵi ya minyo?

¹⁴ Ndiyani wangaziŵa kujura vijaru vya chisku chake? Kuzingiriya kwa minyu ghake kutofya.

¹⁵ Msana wake ukupangika ndi mizere ya nguru, yikurungana pamoza ulaka nge yikuzighirika ndi chizighiriyo.

¹⁶ Zikurungana yimoza ndi yinyake, mphepo kuti yingaziŵa kusere pakuti paku zo cha.

¹⁷ Zikusereriyana yumoza ku yinyake, zikukorana yumoza ndi yinyake ndipo kuti zingapatukana cha.

¹⁸ Kuyethyemuwa kwake kutuzga ukweru, maso ghake ghayana ndi vikope vya mlenji.

¹⁹ Mu mlomo wake muturiya vyenji vyakukore, mlipu wa moto ukore mwenimo.

²⁰ Mu mphuno zake mutuwa usi, nge ndi mumphika wakubwata ndi moto wakunyeka.

²¹ Mvuchi wake upemba maka, ndi mlipu wa moto utuwa mu mlomo wake.

²² Mu khosi lake mwe nthazi, ndi chofyo chimwetuka paurongo pake.

²³ Nyama yo yining'ina kusi ku khosi lake yikukeniriyana ukongwa paku iyo ndipo kuti vingatuzgikapo cha.

²⁴ Mtima wake ngwakurama nge ndi mwa, ukurama nge ndi mwa wa mphe.

²⁵ Po wabukiya pachanya, nanga vinkhara vitenthema; chifukwa cha chofyo chake, ŵamara zeru.

²⁶ Chingana lipanga litumufika, kuti lichita kanthu cha; nanga ndi mkondo, pamwenga muvwi, pamwenga chimayi.

²⁷ Wasanduska chisulo nge mbuteka, ndipo mkuŵa nge ndi muti wakuvunda.

²⁸ Mkondo kuti ungaziŵa kumuthaŵiska cha, mya yakupong'a wayisanduska chiputu.

²⁹ Nthonga zisanduskika chiputu, waseka pakuvininika kwa mikondo.

³⁰ Kusi kwake kwe nge ndi mazinga ghakuthwa watijitambaruwa nge ndi vipando vyakuŵetuka pa urambwe.

³¹ Wachitiska ndimba kubwata nge ndi mumphika; wachitiska nyanja nge ndi mumphika wa mafuta.

³² Kusi kwake wasiyako nthowa yakutowa, munthu wangati ndimba yendi nyivu.

³³ Pa charu palivi chakukozgana nayo, chakulengeka, chambura mantha.

³⁴ Wawona chinthu che chose cho che pachanya, ndi karonga wa ŵana wose ŵakujikuzga.”