Jobu 39 - Tonga Bible 1986

¹ “Kumbi uziŵa nyengo yo mbuzi zamu mapiri zibariya? Kumbi utiziwona mbaŵa pa zipapa ŵana?

² Kumbi ungaziŵa kuŵerenga myezi yo zifiska, kumbi uziŵa nyengo yo zipapiya,

³ kuti pa zikotama, zibara ŵana ŵawo, ndipo kuti zimarizga vyakuŵaŵa vyawo?

⁴ Ŵana ŵawo ŵatuŵa ŵanthazi, ŵakuwa pa charu; ŵaruta ndi kuti ŵawere so ku ŵapapi ŵawo cha.

⁵ “Ndiyani wazomerezga bore kuruta ko wakhumba kuya? Ndiyani yo wafwatuwa vimangiro vya bore mpusu,

⁶ mweniyo ndamupaska mapopa kuti ndigho ghaŵi muzi wake, ndi charu cha mche kuti chiŵe chakujamo chake?

⁷ Wayuyuwa chiwawa chamu msumba, watuvwa cha kukambura kwa wakwendeska.

⁸ Wanozga mapiri kuŵa malo ghake ghakurghamo, ndi wapenja viŵisi vyose.

⁹ “Kumbi njati yikhumba kukutakatakiya? Kumbi yikagonanga usiku wose mukhora lako?

¹⁰ Kumbi ungaziŵa kuyimanga njati mu khose mwake ndi luzi, kumbi yikawunganga migando mu dambo pavuli pako?

¹¹ Kumbi ukathamiyanga iyo chifukwa nthazi zake zikuru, ndi kureke mu manja ghake mlimu wako?

¹² Kumbi wendi chigomezgu mwaku iyo kuti wakawenga, ndikuza ndi trigu ku malo ghakupepete?

¹³ “Mapapa gha ngaro ghakupakupa kwakujikuzga; kumbi mapapa ghake gharongo chanju?

¹⁴ Pakuti yireka mazira pasi, ndipo ghafundiskika ndi dongo,

¹⁵ yiruwa kuti phazi lingaghatimbinyuwa, ndi kuti chinyama chamu dondo chingaghaswa;

¹⁶ yichitiya nkhaza ŵana ŵake, ulaka nge kuti mbana ŵake cha, chingana mlimu wake ngwaŵaka kweni yilivi mantha,

¹⁷ chifukwa Chiuta wakuyinora zeru, ndipo walive kuyipaska phande mu vinjeru.

¹⁸ Penipo yitijiyuska yeneko kuti yuphururuke, yiseka kavalo ndi wakukwerapo wake.

¹⁹ “Kumbi mumupaska kavalo mazaza ghake? Kumbi muvwarika khose lake ndi nthazi?

²⁰ Kumbi muti-mujwanthiska nge ndi zombe? Kufwenkha kwa mphuno zake nkhwakofya.

²¹ Waparasuwa mu dambo ndi wajitukumuwa mu nthazi zake, waruta kwachikumana ndi mahomwa.

²² Waseka mantha, ndipo kuti watenthemeskeka cha, kuti wathaŵa lipanga cha.

²³ Chipundulu cha lipanga chigwedukiya paku iyo mkondo wakuthwa ndi nguru navyo viyo.

²⁴ Ndi kofya kwake kukuru ndi ukari wake wameza dongo; po mbata yitumba waja cheti cha.

²⁵ Po mbata yitumba watiti, ‘Ehe!’ Wanuska nkhondo yake kutali, ndi kupoma kwaŵarongozgi, ndi kukambura.

²⁶ “Kumbi ndi vinjeru vinu vyo kabaŵi waphururukiya navyo, ndi watambasuliya mapapa ghake kuchiri ku mwera?

²⁷ Kumbi ndimwe mulanguliya nombo kukwera muchanya ndi kuzenga chivimbo chake muchanya?

²⁸ Yija pa jarawe penipo ndipo yigonera pachanya pa mutu wa jarawe pa malo ghakukho.

²⁹ Penipa ndipo yiwone chakurgha; maso ghake ghachiwone patali.

³⁰ Ŵana ŵake ŵatumwa ndopa, ndipo kose ko vyakubayika vili, nayo yekweniko.”