Jobu 38 - Tonga Bible 1986

Chiuta wawoneka kwaku Jobu, kuti watimususka cha. Kweni wamkumbuska ndi za ukuru waku Chiuta, Jobu wajipepuwa

¹ Viyo Ambuya angwamuka Jobu mu kanthenga anguti:

² “Ndiyani uyu wafipiska fundu yeneko ndi kakambidu kambura zeru?

³ Vwarani zikhomu chiwunu nge ndi munthu, nkhakufumbanga, ndipo ukandimukanga.

⁴ “Kumbi wenga pani penipo ndinguŵika chiŵanja cha charu? Undinene, asani wendi vinjeru.

⁵ Ndiyani yo wanguchita vipimu vyake? Asani uziŵa! Pamwenga ndiyani yo wangunyoroska chingwe chakupimiya pachanya pake?

⁶ Kumbi nchindamiro zake zikuma pa vine, pamwenga ndiyani yo wanguŵika mwa wake wapa chisongo,

⁷ penipo nyenyezi za mlenji zingumba pamoza, ndipo ŵana ŵaku Chiuta wose ŵangukambura ndi chimwemwe?

⁸ “Pamwenga ndiyani yo wangujara mitunda ya nyanja ndi visasa, penipo yingupongore utinge yituwa mu nthumbo;

⁹ penipo ndingulenga mitambo kuŵa chivwalo chake, ndi mdima wamunkhorwe kuŵa lamba wa saru yanguwu yake,

¹⁰ ndi kumika mphaka zake, ndi kuŵika mizati ndi visasa,

¹¹ ndi kuti, ‘Viyo upere mwenimo, ungarutiriyanga cha, penipano ndipo mayigha ghako ghakujikuzga ghakaperenga?’

¹² “Kumbi waulanguliya mlenji kutuwa po ukuwiya, ndi kuchita matandakucha kuziŵa malo ghake,

¹³ mwakuti uko vigoti vya charu, ndipo ŵaheni ŵatuzgikemo mwaku cho?

¹⁴ Chisinthika nge ndi dongo kuŵa chidikizgu, ndipo chizgangika nge ndi raya.

¹⁵ Kweni ukweru ubisika ku ŵaheni ndipo manja ghawo ghakutumphuskika ghafyoka,

¹⁶ “Kumbi ŵaseremo mukubwibwituka kwa nyanja, kumbi ŵayendayenda mu ndimba yikuru ya maji?

¹⁷ Kumbi malikomo gha nyifwa ghavumburika kwaku, kumbi mwaghawona malikomo gha mdima wa munkhorwe?

¹⁸ Kumbi wauziŵa usani wa charu? Kamba, asani uziŵa chose ichi.

¹⁹ “Kumbi nthowa yakuyiya ko ukweru uli ndiniye, ndipo malo gha mdima ghepani,

²⁰ mwakuti uwotore ku mphake yake, ndi uziŵe nthowa zakuya ku muzi wake?

²¹ Uziŵa, ndipo wawako kali pa nyengo yo, ndi unandi wa mazuŵa ghako ngukuru!

²² “Kumbi waseremo mu zinyumba zakusungiyamo nyankhuŵinda, pamwenga mu malo ghakusungiyamo matarara,

²³ gho ndaghasungiya nyengo za suzgu, zuŵa la mphindano ndi nkhondo?

²⁴ Nthowa ndi niye yakurata ku malo ko ukweru ugaŵika; pamwenga ko mphepo ya vuma yiparghang'ikiya pa charu?

²⁵ “Ndiyani yo wakugawuwa nthowa ya mphopomo ya vuwa, ndi nthowa ya limphezi lakugunda,

²⁶ kunyiska vuwa pa charu chambura munthu ndi mu dambo mo mulivi munthu,

²⁷ kunyeweska charu chiyumu ndi chamapopa, ndi kuchitiska charu kuti chime uteka?

²⁸ “Kumbi vuwa yendi wiske, pamwenga ndiyani yo wakubara manthonera gha dungwe?

²⁹ Kumbi nyankhuŵinda wakutuwa mu nthumbu yakuyani, ndipo ndiyani yo wakubara mphepo ya nyankhuŵinda wa kuchanya?

³⁰ Maji ghakoma gwa nge ndi mwa, ndipo chisku cha ndimba chikhoma.

³¹ “Kumbi ungaziŵa kumanga maunyoro gha chilimira, pamwenga kufwatuwa vingwe vya mauta?

³² Kumbi ungaziŵa kutuzga nyenyezi mu nyengo zawo, pamwenga ungaziŵa kurongozga Biyere ndi ŵana ŵake?

³³ Kumbi uziŵa marangu gho ghakumikika gha kuchanya? Kumbi ungaziŵa kumika muwusu waku gho pacharu?

³⁴ “Kumbi ungaziŵa kukwezga mazu ghako ku mitambo, mwakuti mphomo ya maji yikupungukiye?

³⁵ Kumbi ungaziŵa kutuma malimphezi kuti gharuti ndi kunena kwaku iwe, ‘Te pano’?

³⁶ Ndiyani waŵika zeru mu mitambo, pamwenga kupaska vinjeru ku dungwe?

³⁷ Ndiyani wangaziŵa kuŵerenga mitambo ndi zeru? Pamwenga ndiyani wangaziŵa kundandamika mathumba gha maji kuchanya,

³⁸ po fuvu likhoma kuŵa dongo ndipo mawolongomwa ghakaniriyana ruŵiruŵi?

³⁹ “Kumbi mungaziŵa kuyiŵingiya nyama nkharamu pamwenga kugutiska ŵana ŵake,

⁴⁰ penipo zigona mu mphanji zawo, pamwenga penipo zibisama kukhazga nyama?

⁴¹ Ndiyani yo wanozge chahore vyakurgha vyake, penipo ŵana ŵake ŵaliriya kwaku Chiuta, ndi ŵayingayinga chifukwa chakusauka kurgha?