Jobu 32 - Tonga Bible 1986

Elihu wasuska Jobu ndi mabwezi, ghatatu gho

¹ Viyo ŵanthu ŵatatu ŵangureka kumwamuka Jobu, chifukwa ŵangughanaghana kuti wenga murunji mu maso ghaku iyo mweneko.

² Elihu mwana waku Barakeli muBuzi, wa mbumba yaku Runi wangukaripa. Wangukaripiya Jobu chifukwa wangujirunjiska ukongwa kwakuruska Chiuta;

³ wangukaripiya so mabwezi gha ghatatu ghaku Jobu chifukwa ŵangutondeka kwamuka, nanga yiwo ŵangunena kuti Jobu ndi muheni.

⁴ Sono Elihu wangurindizga kukamba ndi Jobu chifukwa iwo ŵanguŵa ŵara kuruska iyo.

⁵ Ndipo penipo Elihu wanguwona kuti kwengavi kwamuka kutuwa ku milomo yaku ŵa ŵatatu wangufya mtima.

⁶ Ndipo Elihu mwana waku Barakeli muBuzi wangwamuka: “Nde mumana mu virimika, imwe mweŵara; muchifukwa ichi ndenga ndi mantha ndi wakopa, kurongo maghanaghano ghangu kwaku imwe.

⁷ Ndinguti, ‘Mwazuŵa ghakambe, unandi wa virimika usambizgi zeru.’

⁸ Kweni mzimu waku Chiuta wemu munthu, ndi mvuchi waku Wanthazi zose utumupaska zeru.

⁹ Kuti mbara pe cha wo ŵendi zeru, pamwenga ŵara ukongwa kuti ndiwo pe ŵawamo cho nchakurunjika cha.

¹⁰ Mu chifukwa ichi ndititi, ‘Tegherezgani kwangu; nane ndimurongoni maghanaghano ghangu.’

¹¹ “Wonani, ndingurindizga mazu ghinu, ndingutegherezga ku makambidu ghinu ghazeru, mweche kupenjapenja fundu zakukamba.

¹² Ndingutegherezga kwaku imwe, ndipo, ehe, pengavi yumoza wakuti wamutonde Jobu, pamwenga yo wangwamuka mazu ghake, mukati mwaku imwe.

¹³ Chenjeni vinu munganena kuti, ‘Tasaniya zeru; Chiuta ndiyo wangamutonda, munthu cha.’

¹⁴ Walivi kuratiska mazu ghake kwaku ine, ndipo kuti ndikamumukanga ndi makambidu ghinu cha.

¹⁵ “Iwo ŵatimbanizgika, kuti ŵamuka so cha; ŵalivi mazu ghakukamba.

¹⁶ Ndipo kumbi nkharindizganga chifukwa kuti ŵarongoro cha chifukwa ŵatuma ŵaka jo ndipo kuti ŵatamuka so cha?

¹⁷ Ine nane nkhamukanga fundu zangu nane nkharongoronga maghanoghano ghangu.

¹⁸ Pakuti ndendi mazu ghanandi, mzimu mukati mwangu utindichichizga.

¹⁹ Wonani, mtima wangu ulingana ndi vinyo yo walivi, pakupunguliya; nge ndi thumba lifya la vinyo lo likhumba kuphwatuka.

²⁰ Ndikambe, mwakuti chaku mtima chituwe; ndijure milomo yangu ndi ndimuke,

²¹ kuti nkhasankhanga chisku cha munthu cha, pamwenga kunyengere munthu we yose.

²² Chifukwa ndiziŵa cha kunyengere, asani ndachitanga viyo mphanyi Mlengi wangu wakundimarizga ruŵiruŵi.