Jobu 30 - Tonga Bible 1986

Kasandidu kakumariya ka mrandu waku Jobu

¹ “Kweni sono ŵandiseka, ŵanthu wo mbanamana ndi ine, ŵauskeu ŵaku ŵeniwo mphanyi ndaŵapepuwa, ndi kuŵajarika pamoza ndi ŵagaru mskambu wangu.

² Nchine chanduwu cho ndatinge ndiŵenge nacho kutuwa ku manja ghawo, ŵanthu ŵeniwo nthazi zawo zamara.

³ Chifukwa cha kusauka ndi njayikuru ŵazuwa munkhawani wakumira ndi ŵananga nyata,

⁴ ŵathepuwa mani mu vivwati, ndi kujifundiska ndi misisi ya cheyo.

⁵ Ŵachimbizgikiya kutali kutuwa mukati mu ŵanthu, ŵati ŵawoya pavuli pawo nge mbankhungu.

⁶ Kwachija mu vinkhwawu vya misinji, mu mazenji gha mu charu ndi ghamu majarawi.

⁷ Ŵaliya mukati mu matundu nge ndi mbunda, kusi ku ukasi ndiku ŵabisama pamoza.

⁸ Ŵana ŵa vindere, ŵana ŵa mbiri yiheni, ŵathyapulika ndi kuchimbizgikiya kutali kutuwa mu charu.

⁹ “Ndipo ine sono ndasanduka sumu yawo, nde wakuwoyeka kwaku iwo.

¹⁰ Ŵatinditinkha, ŵatindichimbiya, kuti ŵatopa cha kufunya mata pa maso pangu.

¹¹ Chifukwa Chiuta wafwatuwa mkoŵa wangu ndi wandiyuyuwa, watijiko cha panthazi pango.

¹² Ku janja langu lamarghe, ŵanthu ŵawakawaka ŵatindiyukiya, ŵatindidikiskiya kutali, ŵapong'a nthowa zawo, zapharghaniko kumikana nani.

¹³ Ŵananga nthowa yangu, ŵakwezgekwezge soka langu; palivi yumoza yo wati ŵarekeska.

¹⁴ Ŵatuza nge ndi mphopomo ya maji mukati mu phasulu ŵalotoke ine,

¹⁵ Chofyo chandizgoke ine, ine, chindondoloska mzimu wangu nge ndi mphepu, ndipo usambasi wangu waruta nge ndi mtambo.

¹⁶ “Sono mzimu wangu wapungulika mwaku ine, mazuŵa gha suzgu ghandiko.

¹⁷ Viwanga vyangu vindilasa ndi usiku, ndipo kuŵaŵa kwandikwetere, kuti kugowoka cha.

¹⁸ Chakuvwara changu chanangika ndi nthenda yangu, yitindimanga zingirizgi nge ndi ramba wa raya langu la chiuniku.

¹⁹ Chiuta wandipong'a mu maurambwe, ndipo ndaŵa nge ndi fuvu ndi choto.

²⁰ Ndiliriya kwaku imwe kweni kuti mutindamuka cha; ndituma kweni kuti mundiphwere cha.

²¹ Mwaŵa ŵakari kwaku ine, ndi janja linu lanthazi kuti mundiŵemba cha.

²² Mutindinyamuliya pa mphepu, mwakuti ndikwerepo, ndipo mutindinyukuzga-nyukuzga mukuuruma kwa chimphunga.

²³ Inya ndiziŵa kuti mukanditoriyanga ku nyifwa, ndi ku nyumba yakumikikiya ŵamoyo wose.

²⁴ “Kumbi munthu yo wemu ndundu ya vyakugumuka kuti watambaruwa janja lake cha, ndi mu suzgu yake kuti waliriya chovyo cha?

²⁵ Kumbi kuti ndingumuliriya cha yo wanguŵa mu suzgu? Kumbi kuti mzimu wangu wenga wachitima cha ndi mukavu?

²⁶ Kweni penipo ndingupenja umampha, uheni unguza; ndipo penipo ndingurindizga ukweru, mdima unguza.

²⁷ Mtima wangu urumpha-rumpha, ndipo kuti upumuwa cha; mazuŵa gha suzgu ghatuza kuzachikumana nane.

²⁸ Nditenda-tenda wakufipiskika, kweni ndi lumwe cha; ndituma mu ungano, wakuliriya chovyo.

²⁹ Nde mbali wa ŵakambwe, ndi mubwezi wa zingaru.

³⁰ Khungu langu lisanduka lifipa, ndi lindithaŵa, ndipo viwanga vyangu vitufya ndi kufunda.

³¹ Bangwe wangu wasanduka wakutenjere, ndipo fyoliro wangu watumba nge ndi mazu gha wakuriya.