Jobu 23 - Tonga Bible 1986

Jobu wakana mbwenu kuti walivi kunanga, Chiuta kwambura kuziŵikwa wachita khumbo lake. Panandi wakulakwa watenere kurangika mwakuti waje umampha mu umoyo wanu

¹ Jobu wangwamuka, wanguti:

² “Chingana ndi msana uno, maniniziku ghangu ngakuŵaŵa, janja lake ndi zitu nanga ndibuwura.

³ Owe! Asani ndinguziŵa ko ndingamsaniya, mphanyi ndinguza ku chitengo chake!

⁴ Ndatinge ndikonkhoske mrando pa maso pake, ndi kuzaza mlomo wangu ndi zifundu.

⁵ Mphanyi ndatinge ndiziŵenge cho watinge wandimuke, ndi kuwamo cho watinge wakambenge kwangu.

⁶ Kumbi watinge wambanenge nane ndi nthazi zake zikuru? Awa, kweni watinge wandichenjezgenge ŵaka,

⁷ kwanikuwa munthu murunji wasuskanenge nayo, ndipo mphanyi ndatinge ndisanirikenge wambura mrando ndi mweruzgi wangu.

⁸ “Wonani, ndirutiriya kunthazi, kweni iyo kuti waliko cha; ndi so kuvuli, kweni kuti ndimuwona cha;

⁹ ku janja la maze, ndimpenja, kweni kuti ndimuwona cha; nding'anamukiya ku janja la marghe, kweni kuti ndimuwona cha.

¹⁰ Kweni waziŵa nthowa yo nditendamo; po watindesa, nkhaŵanga nge ndi golide.

¹¹ Phazi langu lakaniriya ku michapu yake; ndandondoroska nthowa yake ndipo ndilive kupatukiya kumphepete.

¹² Ndilive kupatukako ku marangu ghatuŵa gha mumilomo yake, ndaronga mu chifuŵa changu mazu ghamu mlomo wake.

¹³ Kweni iyo ngwa mtima umoza, ndiyani wangaziŵa kumunyongo pa wama? Cho wakhumba, ndicho wachita.

¹⁴ Pakuti wakafiskanga cho wandisankhiya, ndipo vinthu vyose vya viyo vye mu mtima wake.

¹⁵ Mu chifukwa ichi, nditenthema pa maso pake; po ndighanaghana, nditumopa.

¹⁶ Chiuta wachita mtima wangu kufwa chipoyo;

¹⁷ Wanthazizose wanditenthemeska; chifukwa ndijarizgika ndi mdima, ndipo mdima wa munkhorwe wajarachisku changu.