Jobu 22 - Tonga Bible 1986

Elifazi wamusumuliya Jobu vyakulakwa vinandi, ndi wamunene kuti warapi, Chiuta wamuchitiyenge lisungu

¹ Viyo Elifazi muTemani wangwamuka wanguti:

² “Kumbi munthu wangaziŵa kuŵa waphindu kwaku Chiuta? Kwakuneneska yo ngwazeru ngwaphindu kwaku iyo mweneko.

³ Kumbi kutimkondweska Wanthazizose asani we wakurunjika iwe, pamwenga nchanduwu kwaku iyo asani unozga nthowa zako kuŵa zambura kususkika?

⁴ Kumbi nchifukwa chakumopa kwako iyo, kuti viyo watikuchenya, ndi watikutore ku cheruzgu?

⁵ Kumbi ulakwi wako kuti ngukuru cha? Kwananga kwako nkhwambura chigoti.

⁶ Chifukwa wato chikore ku ŵana ŵanyako kwambura chifukwa, ndi kuŵazuwa ŵakavu vyakuvwara vya wo.

⁷ Ulivi kupaska maji ku ŵakuvuka kuti ŵamwe, ndi wanora kurgha munthu wanja.

⁸ Wanthazi wataniya charu, ndi wakutumbikika ndiyo pe wangujamo.

⁹ Wavituma vyoko kuruta ŵaka kwambura kuvipaska kanthu, ndipo manja gha ŵambura auskeu ghanguphwanyika.

¹⁰ Chifukwa ichi wazingirizgika ndi viŵana, ndipo mantha ghakuko kwamabuchibuchi;

¹¹ ukweru wako wajarika ndi mdima kuti ureke kuwona, ndi kuchapariya kwa maji kwakuvimba.

¹² “Kumbi Chiuta kuti wepachanya mu machanya cha? Wona nyenyezi zo ze kuchanya ukongwa, mo ziliri kutali!

¹³ Ndipo iwe utiti Chiuta waziŵa chine? Kumbi wangaziŵa kweruzga mukati mu mdima wa munkhorwe?

¹⁴ Mitambo yakugatana yitumvunga, kuti wareke kuwona, ndipo watenda mu mtambo muchanya.

¹⁵ Kumbi ukayendanga mu nthowa yakali, mwako yo ŵanthu ŵaheni ŵakanda?

¹⁶ Ŵangukwamphulika nyengo yawo yenga yindafike, chiŵanja chawo chingusisitika.

¹⁷ Ŵanguti kwaku Chiuta, ‘Patukako kwaku ifwe,’ ndipo so, ‘Kumbi Wanthazizose wangachitanji kwaku ifwe?’

¹⁸ Ndipuuli, wanguzaza nyumba zawo ndi vinthu vyamampha; kweni upu wa ŵaheni we kutali ndi ine.

¹⁹ Ŵarunji ŵachiwona ndipo ŵakondwa, ŵambura mrandu ŵati ŵaseka ukongwa,

²⁰ ŵatiti, ‘Nadi ŵakupindikana ŵidu ŵadumulika, ndipo vyo ŵangusiya moto wawocha.’

²¹ “Zomerezgana ndi Chiuta ndipo uŵenge ndi chimangu; mwaku ichi vyamampha vizenge kwaku iwe.

²² Ronde visambizgu kutuliya kumlomo wake, ndi sunga mazu ghake mu mtima wako.

²³ Asani uwere ku Wanthazizose, ndi kujiyuyuwa, asani utuzgapo uheni pa hema lako,

²⁴ asani uŵika golide mu fuvu, ndi golide la Ofiri mu mya yamu msinji,

²⁵ ndi asani Wanthazizose ndiyo golide wako ndi siliva wakuzirwa;

²⁶ Viyo iku ukakondwanga mu Wanthazizose, ndi ukayinuskanga chisku chako kwaku Chiuta.

²⁷ Ukarombanga kwaku iyo, ndi wakakuvwanga; ndi ukarapanga marapu ghako.

²⁸ Ukayeruzganga makani ndipo ghakakhozgekanga, ukweru ukaŵaliskanga nthowa zako.

²⁹ Chifukwa Chiuta wayuyuwa ŵakujikuzga, ndi wataska ŵakujiyuyuwa.

³⁰ Wataska munthu wambura mrandu; ukataskikanga chifukwa cha kuphotoka kwa manja ghako.”