Jobu 2 - Tonga Bible 1986

¹ Panguŵa so zuŵa linyake po ŵana ŵaku Chiuta ŵanguza kujirongo pa maso gha Ambuya, ndipo Satana nayo wanguza mukati mwawo kuzachijirongo pa maso gha Ambuya.

² Ambuya anguti kwaku Satana, “Watuliya nunkhu?” Satana wanguŵamuka Ambuya, “Ndatuliya mukuyingayinga mu charu, ndi mukwendayenda mwaku cho.”

³ Ndipo Ambuya anguti kwaku Satana, “Wamuteska mteŵeti wangu Jobu kuti palive wakuyana nayo mu charu, munthu wambura kalema, ndimurunji, yo watopa Chiuta ndi wakupatukako ku uheni? Weche kungangamika pa urunji wake, chingana ungunena kuti ndimuparghang'e kwambura kafukwa.”

⁴ Satana wangwamuka Ambuya wanguti, “Khungu ku khungu! Vyose vyo munthu we navyo wakapaskanga kutaska umoyo wake.

⁵ Kweni tambasuwani janja linu sono ndi kwaskani chiwanga chake ndi nyama yake, ndipo wakamutonyoraninga pa maso pinu.”

⁶ Ndipo Ambuya anguti kwaku Satana, “Ehe, we mu nthazi yako, kweni umoyo wake pe ndiwo uwureke.”

⁷ Viyo Satana wangutuwapo pa maso pa Ambuya, ndi wangumupweteka Jobu ndi vironda vyakutupa kutuwa ku phazi la rundi lake kwachifika pa liwombo la mutu wake.

⁸ Ndipo wanguto zinga kujikwanthiya nalo, ndipo wanguja mu vyoto.

⁹ Viyo muwoli wake wanguti kwaku iyo, “Kumbi weche kungangamikiya pa urunji wako? Umunyozi Chiuta mwakuti ufwe.”

¹⁰ Kweni iyo wanguti kwaku iyo, “Ukamba kwakulingana nge yumoza wa ŵanthukazi ŵakupusa wangakambiya. Kumbi tikarondiyanga umampha kutuwa ku janja laku Chiuta, kumbi kuti tikarondiyanga uheni cha?” Mwaku chose ichi Jobu kuti wangunanga cha mukurongoro kwake.

Ŵabwezi ŵake ŵatatu ŵaza kuzachichezga nayo

¹¹ Sono penipo ŵabwezi ŵaku Jobu ŵatutu ŵanguvwa ndi uheni wose uwu ungumuwiya, ŵanguza we yose kutuwa ku malo ghake, Elifazi muTemani, Bildadi muShuhite, ndi Zophara muNamati. Ŵangupangana kuzachitenje nayo ndi kumusangaruska.

¹² Ndipo ŵanguti wamuwona patali kuti ŵangumziŵa cha, ŵangukwezga mazu ghawo ndi ŵanguliya; ŵanguparuwa minijirira yawo, ndi kuthibuwa fuvu kuchanya kuwiya pa mitu yawo.

¹³ Ŵanguja nayo pasi mazuŵa ghankhonde ndi ghaŵi ndipo panguŵavi yumoza wangukamba nayo, chifukwa ŵanguwona kuti kukomwa kwake kwenga kukuru.