Jobu 19 - Tonga Bible 1986

Ndimwe ŵabwezi ŵangu! Mundifwiye lisungu

¹ Ndipo Jobu wangwamuka, wanguti,

² “Kumbi mpaka zuŵanji mukandisuzganga, ndi kundivikitavikita ndi mazu?

³ Nyengo izi chumi mwandilengeska; kumbi kuti muchita soni chakumikana nane?

⁴ Nanga nadi ndananga, kwananga kwangu kwe ndindamweni ndija.

⁵ Asani imwe mujikuzgenge kumikana nane, ndi kupanikizga soni zangu,

⁶ iku ziŵani kuti Chiuta ndiyo wandisuska, wandizingirizga ndi chirepa chake.

⁷ Wonani, ndiliya, ‘Kwakuŵaŵa!’ Kweni kuti ndimukika cha; ndidana ukongwa, kweni kuti nditeruzgika kwakurunjika cha.

⁸ Wandizingirizga ndi lisitu kujara nthowa yangu kuti ndireke kujumpha, waŵika mdima pa zinthowa zangu.

⁹ Watuzgapo unkhankhu wangu, ndi wazuwa mphumphu ku mutu wangu.

¹⁰ Watindiwiska pasi kose-kose, ndaruta ine, chigomezgu changu wazuwa nge ndi muti.

¹¹ Wapemba ukari wake kumikana nane, ndi watindipima nge ngwakupindikana wake.

¹² Maliŵanja ghake gha nkhondo ghatuza pamoza; ŵagoŵa nkhondo yawo kumikana nane, ndi ŵakhoma mahema ghawo, zingirizgi hema langu.

¹³ “Wanderezga kutali ŵana ŵanyangu kutuwa kwaku ine, ŵanyangu ŵasanduskika ŵalendo kwaku ine.

¹⁴ Ŵabali ŵangu ŵapafupi ndi mabwezi ghangu ghapa mtima ŵandireka;

¹⁵ ŵalendo mu nyumba yanguŵandiruwa, ŵateŵeti ŵangu ŵanthukazi ŵandisanduska mlendo, ndaŵa mlendo mu maso ghawo.

¹⁶ Ndidana mteŵeti wangu, kweni kuti watindamuka cha; kukhumbikwa kuti ndimuŵeyere ndi mlomo wangu.

¹⁷ Mvuchi wangu ngwachiwawa ku muwoli wangu, ndipo ndinunkha mu mphunu za ŵana ŵaku ndamweni.

¹⁸ Nanga mbana ŵamana ŵatindipepuwa, ndichiyuka ŵakamba kumikana nane.

¹⁹ Mabwezi ghangu ghose gha pamtima ghandiwoya, ndipo wose wo ndingwanja ŵandiyukiya.

²⁰ Viwanga vyangu vikaniriya ku khungu langu ndi ku munofu, ndipo ndaphokwa ndi chavu cha minyu ghangu pe.

²¹ Muŵe nane ndi lisungu, muŵe nane ndi lisungu, O, imwe mwa ŵabwezi ŵangu, chifukwa janja laku Chiuta landikwaska!

²² Chifukwa nchine mutindikweŵeska nge ndi Chiuta? Chifukwa nchine mulivi kukhorwa ndi nyama yangu?

²³ “Owe! Mphanyi mazu ghangu ghangulembeka, Owe! Mphanyi ghangusindikizgika mu buku.

²⁴ Owe! Mphanyi ghangulembeka ndi chakulembe cha chisulo pa jarawi muyaya!

²⁵ Pakuti ndiziŵa kuti wakundiwombo ngwamoyo, ndi pakumariya wakamanga pa charu;

²⁶ pavuli po khungu langu lamara, ndamukumuwona Chiuta mu liŵavu langu,

²⁷ mweniyo ndikamuwonanga kuchiri kwangu, ndipo maso ghangu ghakumuwona, iyo pe, munyake cha. Mtima wangu utufwa chipoyo mwaku ine!

²⁸ Asani mutiti, ‘Timusuzgiyengenji, pakuti chifukwa cha mrandu chasanirika mwaku iyo’;

²⁹ mope lipanga, pakuti ukari utuza ndi chirangu cha lipanga, mwakuti muziŵe kuti chiriko cheruzgu.”