Jobu 18 - Tonga Bible 1986

Bildadi wasuska Jobu chifukwa cha kujikuzga kwake, ndi wamunene soka liheni

¹ Ndipo Bildadi muShuhite wangu wamuka wanguti,

² “Kumbi umarenge zuŵanji kupenja mazu? Ghanaghana, nafwe tikarongoronga.

³ Kumbi chifukwa nchine tipimika nge ndi ng'ombe, ndi chifukwa nchine tipimika nge ndi mbazereza mu maso ghako?

⁴ Iwe utijiparuwa wamweni mu ukari wako, kumbi charu chikarekekanga chifukwa chako, pamwenga kuti jarawi likasezgekanga pa malo ghake?

⁵ “Inya, ukweru wa muheni uzimwikenge, ndi mulipu wa moto wake kuti ukaŵalanga cha.

⁶ Ukweru mulivi mu hema lake, nyali yake ya pachanya pake yazimwika.

⁷ Mchapo wake utali wanthazi wafupiskika, ndipo fundu za mweneko zitimupong'a pasi.

⁸ Pakuti wapong'eka mu chirepa ndi marundi gha mweneko, ndipo watenda pachanya pa mbuna.

⁹ Chiphunduru chake chiwira muchiŵana, ndi mtazi utimuguza.

¹⁰ Chingwi chabisikiya iyo pasi pa dongo, chiŵana chamuthyikiya mu nthowa.

¹¹ Chofyo chitumuwiya mu malo ghe ghose, ndi kumchimbizga muvuli mwa vikandilo vyake.

¹² Nthazi zake zangwereruka ndi nja, ndipo masoka ghakumuguŵiska ghakhazga.

¹³ Khungu lake larghika ndi nthenda, mwana wakwamba wa nyifwa waturgha viŵaru vyake.

¹⁴ Wajimphulika kutuwa ku hema lenilo wangugomezga, ndipo watoreke ku karonga wa chofyo.

¹⁵ Mu hema lake muja cho kuti nchake cha; mya ya matarara yawazgika pa chakujamo chake.

¹⁶ Misisi yake yimira kusi, ndi mphanda zake zimira kuchanya.

¹⁷ Kukumbukika kwake kumara mu charu, ndipo kuti wasiya zina cha mu charu.

¹⁸ Wachimbizgika kutuwa ku ukweru kuya ku mdima, ndi wazirimitiya mu charu cha ŵamoyo.

¹⁹ Kuti wasiya mphapu cha mukati mu ŵanthu ŵake, ndipo palive wamoyo wakujapo po wajanga.

²⁰ Ŵaku maserelero gha dazi ŵatuvwa ndi kunangika kwake ndipo ŵazizwa; ŵaku vuma ŵakoreka ndi mantha.

²¹ Kwakuneneska uku ndiku kuja kwa ŵambura kopa Chiuta, yagha ndigho malo gha ŵambura kuziŵa Chiuta.”