Jobu 16 - Tonga Bible 1986

Jobu wasuska mabwezi ghake kuti mazu ghawo kuti ghamuwovya cha, wakana kuti wengavi kubuda, wangujipereka kwaku Chiuta. Ŵarindizga ŵaka nyifwa

¹ Ndipo Jobu wangwamuka:

² “Ndavwa vinthu vinandi vyaviyo. Mose mwe ŵasangaruski ŵa ŵakaŵaka.

³ Kumbi mazu ghakuwayuwa kuti ghakamaranga cha? Kumbi nchine cho chakusunjizga kuti wamuke viyo?

⁴ Ine nani ndingaziŵa kukamba nge ndiwe, asani wenga mu malo ghangu, ndatinge ndikambenge mazu ghanandi ghakumikana ndi iwe, ndi kupukung'a mutu paku iwe.

⁵ Ndatinge ndikukhwimiskenge ndi mlomo wangu, lisungu la mlomo wangu mphanyi lagowozga chitima chinu.

⁶ “Asani ndirongoro, kuŵaŵa kwangu kuti kugowoka cha, ndipo nanga ndizizipizge kuti kureka kuŵaŵa nanga nkhamanavi cha.

⁷ Kwakuneneska sono Chiuta wandisuzga; wapasuwa mpingu wangu wose.

⁸ Wandifinyikizga, ichi chituŵa nge nchisimikizgu, cha kususkika kwangu, ndipo konda kwangu kwayuka kumikana nani, kuwoneka ku maso kwangu.

⁹ Ukari wake, ndi wanditinkha, wandikukutiya minyu ghake, wamawongo wangu wathwanuliya maso ghake paku ine kumikana nani.

¹⁰ Ŵanthu ŵandiyasamiya milomo yawo, ŵandipamantha pa dakama kwakuyeya, ŵawunjikana pamoza kumikana nani.

¹¹ Chiuta watindipereka kwaku wo ŵapata Chiuta, ndi wandipong'a mu manja gha ŵanthu ŵaheni.

¹² Ndenga wakufwasa ndipo wangundifyo; wangundifinya pa khose ndi wangunditikinya tumanatumana, wangundimika kuŵa chakugunyuwapo chake;

¹³ ŵamauta ŵake ŵandizingirizga kweti. Wacheka sana zangu ndi kuti watizireka cha; wapunguliya nduru yangu.

¹⁴ Watindiswa pafupi-pafupi; watindichimbiriya nge ngwa nkhondo.

¹⁵ Ndajisone saru yasaka pa liŵavu langu, ndi ndagoneka nthazi zangu pa fuvu.

¹⁶ Chisku changu chacheŵera ndi kuriya, ndipo pa nkhope yangu pe mdima ukuru;

¹⁷ chingana mu manja ghangu mulivi nkhaza, ndi rombo langu ndakurunjika.

¹⁸ “Wacharu we ungaundanga ndopa zangu, ndipo ureke kuzomerezga kuriya kwangu kusaniya malo gha chipumulu.

¹⁹ Chingana ndi sono, awonani, kaboni wangu wemu malo ghakuchanya, nkhoswe yangu ye kuchanya.

²⁰ Mabwezi ghangu ghandiyeya, jiso langu lipunguliya masozi kwaku Chiuta,

²¹ kuti mphanyi waŵako yumoza wakuŵeya munthu kwaku Chiuta, nge ndimo munthu warombe mbali wake.

²² Kweni penipo virimika vimanavi vyafika, nkharutanga munthowa yo kuti nkhawengako so cha.