Jobu 13 - Tonga Bible 1986

¹ “Wonani, jiso langu, lachiwona chose ichi, gutu langu lachivwa ndi lachiziŵa.

² Vyo muziŵa ine nani ndiviziŵa, kuti nde pasi paku imwe cha.

³ Kweni nkhakambanga ku Wanthazizose, ndinweka kujivikiriya mlando wangu ndi Chiuta.

⁴ Imwe ndimwe mwakumbutiska mautesi, mwe ŵasing'anga ŵaŵakaŵaka mose.

⁵ Okwe! Mphanyi munguja ŵaka cheti, ichi ndicho chatinge chiŵe vinjeru vinu!

⁶ Vwani sono kujivikiriya kwangu, vwani kujikambiya kwa mlomo wangu.

⁷ Kumbi mukakambiyanga Chiuta kwautesi, ndi kurongorore kwakupusika?

⁸ Kumbi mukamiyanga iyo, kumbi mukavikiriyanga mrandu chifukwa chaku Chiuta?

⁹ Kumbi chikaŵanga chamampha kwaku imwe pe wakamubowozganinga? Pamwenga mungaumpusika nge ndimo munthu wapusikiya munyake?

¹⁰ Nadi wakamuchenyaninga, asani mu ubende murongo sankhu pakulonde ŵanthu.

¹¹ Kumbi kuti ukuru wake ukamutenthemeskeninga cha ndi chofyo chake kuŵa paku imwe?

¹² Vikumbusku vinu ndi ntharika za vyoto, kujivikiriya kwinu nkhwa dongo.

¹³ “Muje cheti, ndirekeni ndikambe cho chikhumba kundiziya, chirekeni chize.

¹⁴ Nkhatonga munofo wangu muminyu ghangu, ndi kuŵika umoyo wangu mu manja ghangu.

¹⁵ Ehe, wakandibayanga; ndilive chigomezgu; ndipuuli nkhavikiriyanga nthowa zangu pa maso pake.

¹⁶ Ichi ndicho chikaŵanga utaski wangu mwakuti munthu wambura kuziŵa Chiuta kuti wakazanga pa maso ghake cha.

¹⁷ Tegherezgani ukongwa mazu ghangu, ndipo kukonhoska kwangu kuvwike mu makutu ghinu.

¹⁸ Wonani ndarongoso mlando wangu, ndiziŵa kuti ndirunjiskikenge.

¹⁹ Ndiyani yo wangambana nani? Viyo uku ndije cheti, ndi ndifwe.

²⁰ Ndipaskeni vinthu viŵi pe, viyo kuti nkhabisamanga chakutuwa ku maso ghinu.

²¹ Tuzganiko kwaku ine janja lino, ndipo kofya kwinu kureke kunditenthemeska.

²² Po ndipo danani ndipo ndimwamukeninge. Zomerezgani kuti ndikambe, ndipo mundamuke.

²³ Kumbi kwananga kwangu ndi mauheni ghangu viringa? Ndiziŵiskeni mamphuru ghangu ndi mauheni ghangu.

²⁴ Kumbi chifukwa nchine mubisa chisku chinu ndi kundipima nge nde murwani winu?

²⁵ Kumbi mukatenthemeskanga jani lakuputiskika ndi kurondo phesi lakumira?

²⁶ Pakuti murembe vyakuŵaŵa kumikana ndi ine, ndi kundichitiska kuti ndihare kwananga kwa uhurwa wangu.

²⁷ Muserezga marundi ghangu mumatangaja ndi mulereska nthowa zangu zose, ukuŵika chisimikizgu ku phazi la rundi langu.

²⁸ Munthu wamara nge nchinthu chakuvunda, nge ndi raya lo larghika ndi muswa.