Jobu 11 - Tonga Bible 1986

Zophara wachenya Jobu pakujirunjiska kwake ndi watimuchenjezga kuti warapi

¹ Viyo Zophara muNamati wangwamuka:

² “Kumbi mazu ghanandi ghangwenere kumukika cha, ndiso, kumbi munthu wachiwawa watenere kuvikirika?

³ Kumbi kuŵereŵeta kungachetamiska ŵanthu, ndipo pa uwoya, kumbi munthu wangareka kukukhozga soni?

⁴ Pakuti iwe utiti, ‘Chisambizgu changu nchamampha ndipo nde wambura kalema mu maso ghaku Chiuta.’

⁵ Kweni, okwe, kukhumbikwa kuti Chiuta mweneko wakambe, ndi wajuliye milomo yake kwaku iwe,

⁶ ndi kuti wakuneniyenge vinjeru vyamuchindindi! Pakuti ngwakuwamo ukongwa. Mu chifukwa ichi uziŵe kuti Chiuta wakugowokiyako kwananga kwako, kuti wakuchitiya nge ndimo kuliri cha.

⁷ “Kumbi mungavisaniya vinthu vyapandimba vyaku Chiuta? Kumbi ungasaniya chigoti chaku Wanthazizose?

⁸ Chigoti chake che kuchanya ukongwa kuruska kuchanya, nanga nchine cho ungachita. Che pasi ukongwa kuruska ndimba ya miunda, ungaziŵa chine iwe?

⁹ Mweso wake ngutali kuruska charu chapasi, ndi usani wake kuruska nyanja.

¹⁰ Asani wangaporotamo, ndi kujuliya, ndi kutore ku cheruzgu, ndiyane wangamukanizga?

¹¹ Pakuti watuŵaziŵa ŵanthu ŵaŵakaŵaka; pakuwona uheni, kumbi kuti wangaghanaghana nawo cha?

¹² Kweni munthu waŵakaŵaka wangaŵa ndi vinjeru po kana ka mbunda kupapika nge ndi munthu.

¹³ “Asani unganyoroska mtima wako, ukanyoroskanga kwaku iyo manja ghako.

¹⁴ Asani kwananga kwe mu janja lako, utaye kutali kwananga ko, ndipo kwananga kungajanga mu mahema ghinu cha.

¹⁵ Viyo ndipo ukaziŵanga kuyinuska chisku chako kwambura kalema, ukaŵanga wakukhwima ndipo kuti ukawopanga cha.

¹⁶ Ukaruwanga masoka ghako, ukaghakumbukanga nge ndi maji gho ghajumphapo.

¹⁷ Umoyo wako ukaŵalanga kwakuruska msana pakati, mdima wake uŵenge nge ndi mlenji.

¹⁸ Ndipo ukajanga wambura mantha chifukwa chigomezgu chilipo. Ukaŵanga wakuvikiririka ndi ukapumuwanga mu chimangu.

¹⁹ Ugonenge pasi ndi paŵengevi yumoza wakukutenthemeska; ŵanandi ŵakaweyeriyanga kwaku iwe.

²⁰ Kweni maso gha ŵaheni ghakatondekanga nthowa zose zakuphokwe zikasoŵanga kwaku iwo, ndipo chigomezgu chawo nchakuti ŵatute kwakumariya.”