Jobu 1 - Tonga Bible 1986

Jobu wasuzgika, kweni walimbikira kuthamika Ambuya

¹ Kwenga munthu mu charu cha Uzu, yo zina lake lenga Jobu; munthu uyu wenga murunji ndi wakaunyoloka, wangopa Chiuta ndi wangutinkha uheni.

² Kungupapika kwaku iyo ŵana ŵanthurumi ŵankhonde ndi ŵaŵi ndi ŵana ŵanthukazi ŵatatu.

³ Wenga ndi mberere, vikwi vinkhonde ndi viŵi (7,000) ŵagamila vikwi vitatu (3,000) magori gha ng'ombe machumi pe chumi ghankhonde (500), ndi mbunda zinthukazi, machumi pe chumi ghankhonde (500) ndi ŵateŵeti ŵanandi ukongwa, viyo munthu uyu wenga wakuzirwa ukongwa kuruska ŵanthu wose kuvuma.

⁴ Ŵana ŵake ŵanthurumi ŵanguziŵiriya kuruta kuŵa ndi dghera mu nyumba yaku we yose waku wo, pa zuŵa lake watumanga thenga kwachidana ŵazichi ŵawo ŵatatu kuzachirgha ndi kumwa pamoza nawo.

⁵ Ndipo ghanguti ghamara mazuŵa gha dghera, Jobu wanguziŵiriya kutuma ndi kuŵapatuwa mukuŵatoweska, wayukanga ndi mlenjilenje kwachipereka sembe zakocha kwakuyana ndi unandi wawo, pakuti Jobu wanguti, “Vinu ŵana ŵangu ŵananga ndi kutemba Chiuta mu mitima yawo.” Viyo ndimo Jobu wanguchitiya mazuŵa ghose.

⁶ Ndipo linguŵapo zuŵa po ŵana ŵaku Chiuta ŵanguza kuzachijirongo pa maso gha Ambuya, ndipo Satana nayo wanguza mwaku wo.

⁷ Ambuya anguti kwaku Satana, “Kumbi watuliya nunkhu?” Satana wangwamuka Ambuya, “Ndatuwa mukuyingayinga mu charu ndi mukwendayenda mwaku cho.”

⁸ Ndipo Ambuya anguti kwaku Satana, “Kumbi wamsanda muteŵeti wangu Jobu kuti mulive mu charu wakuŵa nge ndiyo, munthu wambura kalema, ndi murunji yo watopa Chiuta ndi wakupatukako ku uheni?”

⁹ Viyo Satana wangwamuka Ambuya, kuti, “Kumbi Jobu watopa Ambuya ŵaka viyo?

¹⁰ Asi mukumuzingizga ndi lisitu, ndi nyumba yake ndi vyose vyo mwe navyo? Mwatumbika mlimu wa manja ghake ndipo viŵetu vyake vyandana mu charu.

¹¹ Kweni tambasuwani janja linu sono ndi kukwaska vyose vyo we navyo, ndipo mukawonanga kuti wakamutukaninga pa maso pinu.”

¹² Ndipo Ambuya anguti kwaku Satana, “Wona, vinthu vyose vyo Jobu we navyo vye munthazi yako, kweni paku iyo mweneko ungaŵikangapo janja lako cha.” Viyo Satana wangutuwapo pa maso gha Ambuya.

¹³ Pa zuŵa linyake po ŵana ŵake ŵanthurumi ndi ŵana ŵake ŵanthukazi ŵarghanga ndi ŵamwanga vinyo mu nyumba ya muku wawo munthurumi,

¹⁴ kunguza thenga kwaku Jobu ndipo linguti, “Nkhambako zalimanga ndi mbunda zarghanga pafupi ndi izo;

¹⁵ ndipo ŵaSabiya ŵanguzivumbatiya, ŵanguzito ndi kuruta nazo, ŵangubaya ŵaliska ndi lipanga, ine pe ndija ndine ndapozomoka kuzachikunene.”

¹⁶ Weche kukamba, wanguza munyake yo wanguti, “Moto waku Chiuta ungusika kuchanya ndi ungocha mberere ndi ŵaliska ndi kuŵamara, ndipo ine ndija ndine ndapozomoka kuzachikunene.”

¹⁷ Weche kukamba, kunguza munyake yo wanguti, “ŴaKaldiya ŵagaŵikana mipingu yitatu ŵawiya chivwamba pa ŵagamila ndi kuŵato ndi kuŵabaya ŵaliska ndi lipanga, ndipo ine ndija ndine ndapozomoka kuzachikunene.”

¹⁸ Weche kukamba, kunguza munyake yo wanguti, “Ŵana ŵako ŵanthurumi ndi ŵana ŵako ŵanthukazi ŵarghanga ndi ŵamwanga vinyo, mu nyumba ya muku wawo munthurumi,

¹⁹ ndipo awonani, kunguza mphepu vikuru kutuliya ku mapopa ridi yingubumizga visongo vinayi vya nyumba yo, ndipo yinguwiya pa ŵana ndi ŵafwa, ine ndija ndine ndapozomoka kuzachukunene.”

²⁰ Penipo Jobu wangusoka ndi wanguparuwa munjirira wake ndi wangumeta sisi la mutu wake, ndi kuwa pasi ndi kuromba,

²¹ Wanguti, “Ndinguza wankhuli kutuwa mu nthumbo ya ama ndipo wankhuli nkhawenga, Ambuya angundipaska, ndipo Ambuya alonda, litumbikike zina la Ambuya.”

²² Mwaku vyose ivi Jobu kuti wangunanga cha pamwenga ku mutonyora Chiuta.