Hoseya 9 - Tonga Bible 1986

Hoseya waziŵiska za chirango pa ŵa Yisraele

¹ Ungasakeriyanga cha, Yisraele! Ungajikuzgana nge mba mitundu chifukwa wachita ureŵi, pakusiya Chiuta wako. Wanja mphoto ya munthukazi mureŵi pa chitanthali chose cha trigu.

² Chitanthali ndi mbuli wa mphereska kuti viŵarerenge cha, ndi vinyo mufya nayo waŵakwanenge cha.

³ Kuti ŵakajanga mu charu cha Ambuya cha; kweni Efraimu wakawerenga, ku Egipiti, ndipo ŵamukurgha kurgha kuheni mu Asiriya.

⁴ Kuti ŵamupaska sembe za vinyo cha kwa Ambuya; ndipo kuti ŵakumukondweska iyo cha ndi sembe zawo. Chiŵande chawo chikaŵanga nge nchiŵande cha ŵakutenje; wose wo ŵakachirghanga ŵakakazuzgikanga chifukwa chiŵande chawo chiŵenge cha nja yawo pe; kuti chikaserenga mu nyumba ya Ambuya cha.

⁵ Mukachitanga chine pa zuŵa lakusankhika lakukondwere ndi pa zuŵa la dghera la Ambuya?

⁶ Chifukwa ehe, ŵaruta ku Asiriya; Egipiti waŵawunjikenge, Mefisi waŵaŵikenge mu masano. Ukasi ukataŵanga pachanya pa vyakuzirwa vyawo vya siliva, minga yiŵenge mu mahema ghawo.

⁷ Mazuŵa ghakurangikiya ghafika, mazuŵa ghakuwezge thayu ghafika. Yisraele wakaghaziŵanga. Mchimi ngwakupusa, munthu wa mzimu wafuntha, chifukwa cha ubendezi winu ndi kutinkha kukuru.

⁸ Mchimi ndi mlonda waku Efraimu, ŵanthu ŵaku Chiuta wangu, kweni chiŵana cha wakuthya che mu nthoŵa zake zose, ndi kutinkha mu nyumba yaku Chiuta wake.

⁹ Ŵajivundiska ukongwa nge ndi mu mazuŵa ghaku Gibeya. Wakumbukenge ubendezi wawo; waŵarengenge chifukwa cha maulakwi ghawo.

Ulakwi wa ŵaYisraele ndi kurangika kwawo

¹⁰ Ndingumusaniya Yisraele nge ndi mphereska mu mapopa. Nge nchipasi chakudanga cha mkuyu, pa nyengo yake yakwamba, ndinguŵawona auskemwe. Kweni ŵanguza ku Bala-peori, ndi ŵangujipatuliya kwaku Bala, ŵanguŵa ŵakutinkhika nge nchinthu cho ŵangwanja.

¹¹ Unkhankhu waku Efraimu uphururukiyenge kutali nge nkhayuni, kuŵengevi kubala nthumbu, ndi kuŵengevi kuzuuka!

¹² Chingana ŵangalera ŵana, kweni ndiŵabayenge pakuti paŵengevi yumoza wakuja ndi umoyo, chitima kwaku iwo po nkhapatukangako kwaku iwo!

¹³ Ŵana ŵaku Efraimu mo ndaŵawone ine, ŵanozgeke kwachiŵa ŵakuskoŵeska. Efraimu watenere kurongozga ŵana ŵake ku kubayika.

¹⁴ Ambuya apaskeni, kumbi muŵapaskenge chine? Muŵapaske nthumbu yakutuzga mphapu ndi maŵe ghakumira.

¹⁵ Uheni wawo wose wemu Gilgala; kwenikuwa ndiko ndingudanga chaŵatinkha. Chifukwa cha uheni wa milimu yawo, nkhaŵatuzganga mu nyumba yangu. Ndiŵanjenge so cha; mafumu ghawo ghose ghandigaruka.

¹⁶ Efraimu wapumika, musisi wawo wamira, kuti ŵapasenge vipasi cha. Chingana ŵangapapa, kweni ndibayenge ŵana ŵawo ŵakwanjiwa.

¹⁷ Chiuta wangu waŵatayenge, chifukwa ŵalivi kumuvwiya; ŵaŵenge ŵakuyinga mukati mu mitundu.