Hoseya 8 - Tonga Bible 1986

Ambuya asuska ŵaYisraele chifukwa chakusopa ŵangoza

¹ Ŵika mbata ku mlomo wako, chifukwa khuŵi le pachanya pa nyumba ya Ambuya, chifukwa ŵaswa phanganu langu, ndi ŵajumpha dangu langu.

² Ŵakutiya kwaku ine, kuti Chiuta widu, ifwe ŵaYisraele timuziŵani.

³ Yisraele wataya chamampha; murwani wamurondonge.

⁴ Ŵamika ŵakaronga, kweni ŵakuturiya kwaku ine cha; ŵamika mafumu, kweni kwambura ine kuziŵa. Ŵapanga ŵangoza ndi siliva ndi golide wawo, kujipasuwa.

⁵ Ndazira mwana wa ng'ombe yako, O Samaria. Ukari wangu ukole kumikana nawo. Kuŵenge viyo mpaka zuŵanji, mpaka penipo mulivi kalema mu ŵaYisraele?

⁶ Ichi chapangika ndi mupangi; kuti ndi Chiuta cha. Mwana wa ng'ombe waku Samaria watekenyikenge.

⁷ Chifukwa ŵangupanda mphepo, ndipo ŵavunenge kavuruvuru. Trigu walivi mphonji, kuti wakapasanga vipasi cha. Asani wangupasa, ŵalendo ŵatinge ŵarghenge.

⁸ Yisraele wamezeka; we mukati mu mitundu nge nchiyaŵi chaŵakaŵaka.

⁹ Pakuti ŵakwere ku Asiriya nge ndi mbunda yamu dondo yakuyinga yija; Efraimu walembera ŵakwanjiwa ŵake.

¹⁰ Chingana ŵalembera ŵanthu ŵakulipika mukati mu mitundu, ndiŵawunjikenge sosonukweni. Ndipo ŵarekenge kwanyengo yimanavi kunthonezga mafuta pa karonga ndi mafumu.

¹¹ Chifukwa Efraimu wandaniska majochero ghakwanangiyapo, kwaku iyo ghaŵa majochero ghakwanangiyapo.

¹² Chingana ndingumurembe marangu vikwi chumi (10,000) ghatinge ghapimikenge nge nchinthu cha waka.

¹³ Ŵatanja sembe; ŵapereka sembe ya nyama ndi ŵatiyirgha; kweni Ambuya kuti akondwa nawo cha. Sono wakumbukenge ubendezi wawo ndikuŵaranga chifukwa cha kulakwa kwawo; ŵawerenge so ku Egipiti.

¹⁴ Chifukwa Yisraele waruwa mulengi wake, ndi wazenga nyumba zikuru, ndipo Yuda wandaniska misumba ya malinga; kweni nditumenge moto pa misumba yake, ndipo wamukocha malinga ghake.