Hoseya 7 - Tonga Bible 1986

¹ ndi kuchizga Yisraele, uheni waku Efraimu uvumbukwa ndi so milimu yiheni ya Samaria; pakuti ŵachita kwautesi, munkhungu wasere, ndi wakuphanga waphanga kubwalo.

² Kweni ŵaghanaghana cha kuti ndikumbuka nchitu zawo zose ziheni. Sono milimu yawo yaŵazinga, ye pa maso pangu.

³ Ŵakondweska karonga ndi mauheni ghawo, ndi ŵakondweska mafumu ndi uchenjezi wawo.

⁴ Mbareŵi wose; ŵayana ndi ng'anjo yakufunda, yeniyo wakubikapo wareka kupembako moto, kwamba pakukanya chiŵande mpaka chitukumuke.

⁵ Pa zuŵa la karonga widu, mafumu ghangutama ndi kufunda kwa vinyo; iyo wangutambaruwa janja lake pamoza ndi ŵakuwera.

⁶ Mitima yawo yitocha nge ndi ng'anjo ukari wawo ukole usiku wose, ndi mlenji unyeka nge ndi moto wakulipuka.

⁷ Ŵose mbakocha nge ndi ng'anjo, ndi ŵameza mafumu ghawo. Ŵakaronga ŵawo wose ŵawa; ndipo palivi yumoza yo wasopa ine.

ŴaYisraele ndi mitundu yinyake

⁸ Efraimu watijisazga ndi mitundu yinyake; Efraimu nchiŵande chambura, mang'anamulika.

⁹ Ŵalendo ŵamara nthazi zake, ndipo iyo kuti waziŵa ichi cha; nyivu zayoyoskeka paku iyo, kweni kuti waziŵa ichi cha.

¹⁰ Kujikuzga kwaku Yisraele kuti musimikizga; ndipuuli kuti ŵawere kwa Ambuya Chiuta wawo cha, chingana nkhumupenja.

¹¹ Efraimu wenge ndi nkhunda, yakupusa ndi yambura zeru; wadana ku Egipiti, watiya ku Asiriya.

¹² Ŵachiruta, ndi ŵathyenge ndi chirepa changu; ndiŵasiskiyenge pasi, nge ndi viyuni vya mude; ndiŵalangenge chifukwa cha nchitu zawo ziheni.

¹³ Owe, kwaku iwo; chifukwa ŵapatuka ku kwaku ine! Pharghaniko kwaku iwo chifukwa ŵagaruka kwaku ine! Ndingukhumba kuŵawombo kweni ŵatindikambiya utesi.

¹⁴ Kuti ŵaliya kwaku ine ndi mtima wawo wose cha; kweni ŵatenje pa vita vyawo, ŵawunganirana chifukwa cha trigu ndi vinyo; ŵagaruka kwaku ine.

¹⁵ Chingana ndingusambizga ndikukhomeska manja ghawo, ndipuuli ŵandighanaghaniya chiheni.

¹⁶ Ŵawere kwaku Bala; ŵakozgana ndi uta wakupusika, mafumu ghawo ghazamubayika ndi lipanga chifukwa cha nkhaza za lilimi lawo. Ichi ndicho chamukuŵa chilengesku chawo mu charu cha Egipiti.