Hoseya 14 - Tonga Bible 1986

Hoseya wapemberezga ŵaYisraele

¹ Yisraele uwere kwa Ambuya, Chiuta wako, pakuti waguŵa chifukwa cha ubendezi wako.

² Uwere kwa Ambuya, uze ndi mazu ukambe kwaku iwo ghakuti; “Mutuzgeko ubendezi wose; muzomerezge cho nchamampha, ndipo tiperekenge vipasi vya milomo yidu.

³ Asiriya kuti watitaskenge cha, kuti tikwerenge pa ŵakavalo cha. Ndipo tinenenge so cha kuti, ‘Chiuta widu,’ ku nchitu ya manja ghidu. Mwaku imwe mranda wasaniya lisungu.”

Ambuya apangana umoyo ufya pa ŵaYisraele

⁴ Nkhachizganga kuwere vuli kwawo, nkhaŵanjanga kwawanangwa, chifukwa ukari wangu waweko kwaku iwo.

⁵ Ndiŵenge nge ndi dungwi kwaku Yisraele, wakaŵanga ndi maluŵa nge ndi lombo; ndi kuthaza misisi yake nge ndi mukongwe.

⁶ Mphanda zake zitambarukenge; kutowa kwake kuŵenge nge nkhwa maolivi, ndi kununkhira kwake nge ndi Lebanoni.

⁷ Wakawenga ndi kuja mu muduzi wangu, watipitiyenge umampha nge ndi munda, wamenge maluŵa nge ndi mphereska, kununkhira kwawo kuŵenge nge ndi vinyo waku Lebanoni.

⁸ Efraimu, kumbi ŵangoza nde nawo ndi nchitu uli? Ndine yo wamuka ndi kukuphwere. Nde nge ndi muti wa mung'ona wakubiliŵira nyengo yose, vipasi vyako vituliya kwaku ine.

⁹ We yose yo ngwazeru, wawemo vinthu ivi, we yose yo ngwakuchenje waziŵi ivi, chifukwa nthowa za Ambuya zakunyoroka ndipo wakurunjika watenda mwakuzo, kweni ŵabudi ŵaguŵamo.