Hoseya 12 - Tonga Bible 1986

ŴaYisraele ŵagaruka ndipo Chiuta watiŵaranga

¹ Efraimu wakhwema mphepo; wandondoloska mphepo yaku vuma zuŵa lose, watandaniska mautesi ndi nkhaza; wapangana phanganu la maronda ndi Asiriya, ndipo mafuta ghapingikiya ku Egipiti.

² Ambuya ŵe ndi mlando ndi Yuda; amupaniskenge Yakobe kwakulingana ndi nthowa zake, ndi kumuwezge kwakuyana ndi milimu yake.

³ Mu nthumbu wanguko chitende cha mbali wake; ndipo wanguti waŵa mura wangulimbana ndi Chiuta.

⁴ Wangulimbana ndi mungelo ndipo wangupunda, wanguliya ndi wanguŵeyere wezi wake. Ŵangukumana ndi Chiuta pa Betele, ndipo Chiuta wangukamba nayo kwenikuwa.

⁵ Ambuya Chiuta wa maliŵanja, Ambuya ndi zina lawo:

⁶ “Viyo iwe, ndi chivyo chaku Chiuta wako, were vuli; sungiska lisungu ndi cheruzgu ndipo rutiriya kulindizga Chiuta wako.”

⁷ Wamaronda, yo mu manja ghake mwe myeso yakupusika, watanja kusuzga.

⁸ Efraimu wanguti, “Ehe, nde musambasi, ndajanduliya usambasi”; kweni usambasi wake wose kuti ungaziŵa cha kutozga uheni wo wachita.

⁹ Ndine Ambuya Chiuta wako, kutuwa ku charu cha Egipiti; nkhakujarikanga so mu mahema nge ndi mu mazuŵa gha madghera ghakumikika.

¹⁰ Ndingukamba ndi ŵamchimi kuti, ndine ndingwandaniska viwona, ndipo ndingupereka vyakweruzgiyapo mu manja gha ŵamchimi.

¹¹ Asani mwe utimbanizi mu Gileada, nadi ŵaŵenge ŵaŵakaŵaka; asani mu Gilgala wapereka sembe ya zinkhuzi, majochero ghawo ghaŵenge nge ndi ndundu ya mya mu migandu ya munda.

¹² Yakobe wanguthaŵiya ku charu cha Aramu, Yisraele wanguteŵeta kwenikuwa chifukwa cha munthukazi, ndipo wanguliska mberere chifukwa cha munthukazi.

¹³ Ndi mchimi Ambuya angutuzga Yisraele mu charu cha Egipiti, ndipo ndi mchimi wangusungika.

¹⁴ Efraimu wangumukaripiska ukongwa; viyo Ambuya ŵake asiyenge mlando wa ndopa paku iyo, ndipo Ambuya awezgiyenge paku iyo chilengesko.