Hoseya 11 - Tonga Bible 1986

Chanju chaku Chiuta pa ŵanthu ŵakumugarukiya

¹ Po Yisraele wenga mwana ndingumwanja, ndipo ndingumudana mwana wangu kutuwa mu Egipiti.

² Mo ndinguŵadaniya, ndimu so ŵangutuwiyako kwaku ine; ŵangurutiriya kupereka sembe ku ŵaBala, ndi kuŵawoche vyakununkhira ŵangoza.

³ Ndipuuli ndine ndingusambizga Efraimu kwenda. Ndinguŵato ndi kuŵavumbatiya mu manja ghangu, kweni kuti ŵanguziŵa cha kuti ndine ndinguŵachizga.

⁴ Ndinguŵaguza ndi vingwe vya lisungu, ndi maruzi gha chanju. Ndinguŵa kwaku iwo, nge ndi munthu yo watuzgamo matangaja mu matakama ghawo, ndipo ndingukotamiya kwaku iwo, ndi kuŵapaska kurgha.

⁵ Ŵakawerenga ku charu cha Egipiti, ndipo Asiriya wakaŵanga karonga wawo, chifukwa ŵakana kuwere kwaku ine.

⁶ Lipanga likaŵanga pa misumba yawo, kudumuwa mipiringizgu ya malikomo ghawo ndi kuŵamara mu malinga ghawo.

⁷ Ŵanthu ŵangu ŵaŵika mitima yawo pakutuwako kwaku ine; viyo ŵarongozgeke ku goŵa, ndipo palivi yumoza walituzgengeko.

⁸ Kumbi ndingakujowo uli Efraimu! Kumbi ndingakupereka uli Yisraele! Kumbi ndingakusanduska uli nge ndi Adama! Kumbi ndingakusanduska uli nge ndi Zeboyimu! Mtima wangu ung'anamuka mukati mwangu, nde nawe ndilisungu likuru.

⁹ Nkhafiskanga cha ukari wangu ukuru, kuti nkhaparghang'anga so Efraimu cha; chifukwa ndine Chiuta munthu cha, Mtuŵa mukati mwinu, ndipo kuti ndizenge kuzachiparghang'a cha.

¹⁰ Ŵakarondonga Ambuya, Ambuya akoromenge nge ndi nkharamu, inya akoromenge, ndipo ŵana ŵake ŵakazanga ndi chitenje kutuwa ku zambwe.

¹¹ Wakazanga ŵakutenthema nge nthuyuni twakutuwa ku Egipiti, nge ndi nkhunda zakutuwa ku Asiriya, ndipo nkhaŵawezgiyanga ku mizi yawo, atiti Ambuya.

¹² Efraimu wandizingirizga ndi mautesi, ndipo nyumba yaku Yisraele ndi chinyengo; kweni Yuda weche kuziŵikwa ndi Chiuta, ndipo ngwamagomezgeka ndi Mtuŵa Yumoza.