Hoseya 10 - Tonga Bible 1986

Cheruzgu chaku Chiuta paku Yisraele

¹ Yisraele ndi mphereska yakukuwa umampha, yo yipasa vipasi vyake. Mo waliri ndi vipasi vinandi ndimo wazenge majochero ghanandi; mo charu chake chiŵiya chamampha, ndimo wachitiya vikozgo vyamampha.

² Mtima wawo ngutesi, sono ŵatenere kusanirika ndi kafukwa. Ambuya agumuliyenge pasi majochero ghawo, ndi kubwanganduwa vikozgo vyawo.

³ Chifukwa sono ŵakatinge: “Tilive karonga, chifukwa tiŵawopa cha Ambuya, ndipo karonga watichitiyenge kanthu uli?”

⁴ Ŵakamba mazu ghaŵaka; ndi ŵarapa ŵaka pakuchita mapanganu viyo cheruzgu chibuka nge ndi uteka wakuŵaŵa mu migando yamu munda.

⁵ Ŵakuja mu Samaria ŵatenthema chifukwa cha thole laku Betavene. Ŵanthu ŵake ŵamuliriyenge, ndi ŵazukuru ŵake wo ŵasopa ŵangoza ŵamutenjeriyenge, chifukwa cha unkhankhu wake wo watuwapo.

⁶ Inya, chikozgu chitolekiyenge ku Asiriya, kuŵa munthulu ku karonga mukuru. Efraimu walengeskekenge, ndipo Yisraele walengenge soni chifukwa cha ngoza wake.

⁷ Karonga wa Samaria wabwangandukenge, nge nching'ombe pa maji.

⁸ Malo gha pachanya ghaku Avene, ndi kwananga kwaku Yisraele, vyose vimarenge. Minya ndi nthula vikamenga pa majochero ghawo; ndipo ŵakatinge ku mapiri, “Wiyani paku ifwe”; ndi mitunthu, “Tivunikiriyeni.”

Ambuya ateruzga Yisraele

⁹ O! Yisraele wananga kwamba mu mazuŵa ghaku Gibeya; ndipo kwenikuwa ŵarutiriya. Kumbi nkhondo kuti yiŵasaniyenge cha mu Gibeya?

¹⁰ Nkhazanga kumikana ndi ŵanthu ŵakuwere vuli kuŵaranga; ndipo mitundu yiwunjikanenge kumikana nawo po ŵarangika, chifukwa cha kwananga kwawo kuŵi.

¹¹ Efraimu wenga ng'ombe yinthukazi yakusambizgika yo yingwanja kupepeta trigu, ndipo ndengavi kumanga khosi lake lamampha; kweni nkhamumanganga Efraimu mu matangaja, Yuda walimenge, Yakobe wakaswanga mawongolomwa ghake.

¹² Jipandiyeni urunji, vunani chipasi cha lisungu; swani mawongolomwa; chifukwa sono ndi nyengo yakupenje Ambuya, mwakuti ŵaze ndi kung'iska utaski paku imwe.

¹³ Mwalima ubendezi, ndipo mwavuna uwura urunji, mwargha chipasi cha mautesi. Chifukwa mwagomezga mu magareta ghinu, ndi mu unandi wa ŵankhondo ŵinu.

¹⁴ Chifukwa ichi, mphomo ya nkhondo yiyukenge mukati mu ŵanthu ŵinu, ndipo malinga ghinu ghose ghapasulikenge, nge ndimo Shalamani wangupasuliya Betarabele mu zuŵa la nkhondo; ŵanyinawo ŵangutikinyika pamoza ndi ŵana ŵawo.

¹⁵ Viyo ndimo kuchitikiyenge kwaku imwe, ŵanyumba yaku Yisraele, chifukwa cha uheni winu ukuru. Mu chimphunga karonga wa ŵaYisraele wazamudumulika.