Hagayi 1 - Tonga Bible 1986

Ŵachiskika kuzenga so Kasopi

¹ Mu chirimika cha chiŵi cha karonga Dariusi, mu mwezi wa chinkhonde ndi chimoza pa zuŵa la chimoza la mwezi, mazu gha Ambuya ghanguza kwaku Hagayi mchimi kwaku Zerubabele mwana waku Shealtiele, nduna yikuru ya charu cha Yuda; ndi kwaku Yoswa mwana waku Yehozadaka, mzukuru mura, kuti,

² “Viyo atiti Ambuya ŵa maŵanja: Ŵanthu yaŵa ŵatiti nyengo kuti yafikapo cha yakuzenge so nyumba ya Ambuya.”

³ Viyo mazu gha Ambuya ghanguza kwaku Hagayi mchimi kuti,

⁴ “Kumbi ndi nyengo iyi kwaku imwe kuja mu nyumba zamampha zamathabwa ghakupala, penipo nyumba iyi njakupasuka?

⁵ Chifukwa ichi sono atiti Ambuya ŵa maŵanja: ghanaghanani mo mwajaliya.

⁶ Mwapanda vinandi, kweni mwavuna vimanavi; muturgha, kweni kuti muguta cha; mutumwa kuti mukhorwa cha, muvwala, kweni palivi yumoza yo wafunda; ndipo yo waronde malipiro, waronde malipiro kughaŵika muthumba lakutoroka.

⁷ “Viyo atiti Ambuya ŵa maŵanja: ghanaghanani ndimo mwajaliya.

⁸ Kwerani mu mapiri mukatimu miti ndi muzachizenga nyumba, mwakuti ndikondwe nayo, ndi kuti ndiwoneke mu unkhankhu wangu, atiti Ambuya.

⁹ Mwapenja vinandi, kweni ehe, vinguŵa vimanavi; ndipo po munguza navyo kumuzi, ndinguviputiskiya kutali. Chifukwa nchine? Atiti Ambuya ŵa maŵanja. Nchifukwa cha nyumba yangu yo njakupasuka, kweni mwatangwanika, munthu yose ndi nyumba yake.

¹⁰ Chifukwa ichi, machanya gha pachanya paku imwe ghajara dungwi, ndi charu chapasi chajara vipasi vyake.

¹¹ Ndipo ndadana chilala pa charu ndi pa mapiri, pa trigu, ndi pa vinyo mufya, pa mafuta, paku cho chose charu chipasa, pa ŵanthu ndi pa ng'ombe, ndi pa nchitu zawo zose.”

¹² Viyo Zerubabele mwana waku Shealtiele, ndi Yoswa mwana waku Yehozadaka, mzukuru mura, ndi ŵanthu wose wo ŵangujaliya vuli, ŵanguvwiya mazu gha Ambuya Chiuta wawo, ndi mazu ghaku Hagayi mchimi, nge ndimo Ambuya Chiuta wawo wangumutumiya; ndipo ŵanthu ŵangopa pa maso pa Ambuya.

¹³ Viyo Hagayi thenga la Ambuya, wanguŵanene ŵanthu ndi za uthenga wa Ambuya, wakuti, “Nde namwe, atiti Ambuya.”

¹⁴ Ndipo Ambuya anguyuska mzimu waku Zerubabele mwana waku Shealtiele, nduna yikuru ya charu cha Yuda, ndi mzimu waku Yoswa mwana waku Yehozadaki mzukuru mura ndi mzimu wa ŵanthu wose ŵakujaliya vuli; ndipo ŵanguza ndi ŵangutakataka pa nyumba ya Ambuya ŵa maŵanja,

¹⁵ pa zuŵa la machumi ghaŵi, pachanya ghanayi (24) la mwezi, mu mwezi wa chinkhonde ndi chimoza.