Habakuku 1 - Tonga Bible 1986

Chiuta wamuka Habakuku

¹ Uvumbuzi waku Chiuta wo Habakuku mchimi wanguwona.

² Ambuya, ndi bongonge mpaka zuŵanji chifukwa cha chovyo, kuti imwe mureke kuvwa? Pamwenga ndidanirizge kwinu “Nkhaza!” Ndipo murekenge kutaska?

³ Mutindirongoriyanji maubendezi, ndi kundiwoneska suzgu? Phasulu ndi nkhaza vye paurongo pangu, mphindanu ndikulimbana viyuka.

⁴ Dangu lagowoka, cheruzgu kuti chitenda umampha cha. Chifukwa ŵaheni ŵazinga ŵarunji, viyo cheruzgu chirutiriya kubendezgeka.

⁵ Lereskani mukati mu mitundu, ndi wonani; muzizwenge ndi kutondwa. Chifukwa ndichita mlimu mu mazuŵa ghinu weniwo kuti muvwanenge nawo cha chingana ungakonkhomeka kwinu.

⁶ Chifukwa wonani; ndiyuska ŵaKaldiya, mtundu ukari ndi upusu, wo wendenge mu usani wa charu, kwachironda malo ghakujamo gho kuti ngawo cha;

⁷ mbakofya ndi ŵakutenthemeska; cheruzgu chawo ndi ulemu wawo vituwa kuŵeneko.

⁸ Ŵakavalo ŵawo mbapusu kuruska ŵanyalubwe, mbakari kuruska mphumphi zamazulo; ŵapakavalo ŵawo ŵajituntha, ŵapakavalo ŵatuwiya kutali, ŵawuruka nge ndi nombo yakuchimbiriya kurgha.

⁹ Wose ŵaziya nkhaza; mantha ghadanjiya kunthazi kwawo. Ŵawunjika ŵamikoli, nge ndi mchenga.

¹⁰ Ŵaseka ŵakaronga, ndipo mafumu ŵaghanyoza. Ŵaseka pa malinga ghose, chifukwa ŵarunda ndundu ya dongo ndi ŵayito.

¹¹ Penipo ŵajumpha ndi kurutiriya nge ndi mphepo, ŵaheni wo nthazi zawo ndi chiuta wawo!

¹² Asi ndimwe wamuyaya, Ambuya Chiuta wangu, Mtuŵa wangu? Kuti tifwenge cha. Ambuya mwaŵamika nge ncheruzgu; ndipo imwe, Jarawe, mwaŵaŵika kuti ŵalangike.

¹³ Imwe mwe ndi maso ghatuŵa gho kuti ghalereska uheni cha, ndipo kuti mulereska pa ubudi cha, kumbi mulereskiyanji pa ŵanthu ŵambura chigomezgu, ndikuja ŵaka chete asani muheni wanyenga munthu murunji yo waruska iyo?

¹⁴ Chifukwa musanduska ŵanthu kuŵa nge ndi somba zamu nyanja, nge ndi vyakukwaŵa vyo virivi fumu.

¹⁵ Waŵeja vyose ndi mbeja, wativituzga ndi mukwawo wake, waviwunjika mu chirepa chake; viyo wakondwa ndi kusekere.

¹⁶ Chifukwa ichi wachitiya chirepa chake sembe, ndi kocha vyachema mu chirepa chake, chifukwa mŵaku ivi ndimo wasakata; ndi vyakurgha vyake vyamampha.

¹⁷ Kumbi wapong'enge mukwawo kaŵikaŵi, kubaya ŵamitundu kwambura lisungu muyaya?