Ezra 4 - Tonga Bible 1986

Nchitu yajarizgika

¹ Ŵarwani ŵaku Yuda ndi Benjamini ŵanguvwa kuti wo ŵakuwe ku umkoli ŵazenganga kasopi wa Ambuya, Chiuta waku Yisraele.

² Viyo ŵanguza kwaku Zerubabele ndi ku ŵara ŵa auskeu, ŵanguti, “Tizengenge namwe; chifukwa ifwe nafwe tipenja Chiuta winu nge ndimwe. Tamubayiyanga sembe kwamba mu mazuŵa ghaku Esaradoni karonga wa Asiriya yo wangutituma kunu.”

³ Kweni Zerubabele, Yeshua ndi ŵanyake ŵa ŵara ŵa mafuku ghaku Yisraele, ŵanguti, “Mulivi nafwe kanthu pakuŵazenge nyumba, Ambuya chiuta waku Yisraele. Ifwe tija timuzengiyenge nyumba nge ndimo Sirusi karonga waku Perese wakutilanguliya.”

⁴ Ndipo ŵanthu ŵamu charu ŵangutomboroska manja gha ŵaYuda, ŵanguŵatenthemeska ŵachizenga.

⁵ Ŵangukumba ŵapangi-fundu, kuti ŵasuskani nawo ndi kuŵatimbanizga mu nchitu yawo mu mazuŵa ghose ghaku Sirusi karonga waku Perese, mpaka ku muwusu waku Dariusi karonga waku Perese.

⁶ Po Ahaswerusi wangwamba kuwusa, ŵangulemba kalata wakuŵatundula ŵamu Yuda ndi mu Yerusalemu.

⁷ Ndipo mu mazuŵa ghaku Arataserese, Bishilama, ndi Mitiredata, Tabelele ndi ŵanyake ŵakuŵa nawo ŵangulembe Arataserese karonga waku Perese, kalata wakulembeke mu mazu gha chiArama, ndi ghakung'anamulika.

⁸ Rehumu mumirizi, ndi Simisayi mlembi ŵangulemba kalata kupacha Yerusalemu kwaku Arataserese.

⁹ Viyo wanguremba Rehumu wakurangura, Shimishai mlembi, ndi ŵanyake ŵa pamoza nawo, ŵeruzgi, ŵamirizgi, ŵarongozgi, ŵaPerzia, ŵaEreke, ŵaBabiloni, ŵaSusa, uku ndiku kuti ŵaElamite,

¹⁰ ndipo so ndi ŵamitundu wo karonga Osonapara wanguserezga mu mizi ya Samaria ndi mu vigaŵa vinyake sirgha liya la msinji.

¹¹ Kalata yo ŵangulemba kwaku Arataserese wenga wakuti, “Ŵateŵeti ŵinu ŵamu charu chaku sirgha liya la msinji ŵatumtawuzgani.

¹² Kuziŵike ku karonga kuti ŵaYuda, wo ŵangutuwa ko kwinu kuza kwaku ifwe kunu ŵakuruta ku Yerusalemu. Ŵazenga so msumba uwa wachigaruka ndi wa uheni; ŵamalizga malinga ndi kunozga so viŵanja.

¹³ Kuziŵike sono ku karonga, kuti, asani muzi uwu wazengeka ndi malinga nagho ghazengeka, kuti ŵaperekenge msonkho cha, chingana ndi mthulu, chingana ndi msonkho wa maronda, uku ndiku kuti usambasi wa karonga wanangika.

¹⁴ Sono ifwe ŵakurgha vya ukaronga kuti kutenere cha kuwona myuyu wa karonga; pa chifukwa ichi tatuma ndi kuziŵiska imwe a karonga.

¹⁵ Sono lisandike buku la makani ghakale gha ŵambuyamwe. Mu buku la makani musaniyenge ndi kuwamo nadi kuti muzi uwu ngwachigaruka, wachitiya uheni ŵakaronga ndi vyaru, ndi kuti chigaruka chikuyuskikamo ndi kale. Chifukwa ichi ungupasulika.

¹⁶ Ifwe tiziŵiska karonga kuti asani muzi uwu uzengekenge so, ndi malinga ghake nagho ghazengekenge, imwe muŵengevi muwusu mu charu cha sirgha la msinji.”

¹⁷ Karonga wangwamuka: “Kwaku Rehumu mumirizi, ndi Simisayi mlembi, ndi kwaku wose ŵanyawo ŵamu Samaria, ndi ŵamu charu cha kusirgha kwa msinji, chimangu chiŵi namwe.

¹⁸ Kalata yo mungutuma waŵerengeka umampha paurongo pangu.

¹⁹ Ndingulangula, ndipo kupenjapenja kunguchitika. Kwasanirika kuti muzi wo kale unguyukiya ŵakaronga, ndi kuti chigaruka ndi chiyaghaya vinguchitika mwenimo.

²⁰ Mwenga so ŵakaronga ŵakuru mu Yerusalemu wo ŵausanga vyaru vya kusirgha kwa msinji; ndipo msonkho ndi mthulu, ndi msonkho wa miseu vyaperekekanga kwawo.

²¹ Viyo langulani kuti ŵanthu ŵareke kuzenga, ndipo msumba uwu ureke kuzengeka mpaka po ine ndikalangulanga.

²² Chenjeni mureke kuchita ichi. Kumbi suzgu yikuriyenge kuti karonga wachitikiye uheni?”

²³ Wanguti waŵerengeka kalata wa karonga Arataserese paurongo paku Rehumu ndi Simisayi ndi ŵanyawo, ruŵi ŵanguruta ku Yerusalemu ku ŵaYuda kuŵarekeska ndi janja la nthazi.

²⁴ Ndipo nyumba yaku Chiuta yo yenga mu Yerusalemu yingurekeka; ŵangureka mpaka chirimika cha chiŵi cha muwusu waku Dariusi karonga waku Perese.