Ezra 1 - Tonga Bible 1986

Chiwere cha ŵamkoli ku Yerusalemu

¹ Mu chirimika chakudanga chaku Sirusi karonga waku Perese, Ambuya angutuma Sirusi karonga waku Perese kuti wawandiske uthenga mu ufumu wake wose ndi kuti waulembe, mwakuti mazu gha Ambuya gho Yeremiya wangunena ghafiskike.

² “Viyo wanguti, Ine Sirusi karonga waku Perese ndititi, Maufumu ghose ghamu charu chapasi Ambuya Chiuta wa kuchanya wakundipaska. Sono wandinene kuti ndimuzenge nyumba mu Yerusalemu waku Yuda.

³ Munthu wako yose yo we mukati mwinu Chiuta wake waŵe nayo, wakwere ku Yerusalemu kwachizenga so nyumba ya Ambuya Chiuta waku Yisraele yo ndi Chiuta waja mu Yerusalemu;

⁴ we yose yo wajako, ŵazengezgani ŵake ŵamovye pakumupaska siliva ndi golide, ndi vyuma ndi vyakuŵeta, pamoza ndi vyawanangwa vyakupereka ku nyumba yaku Chiuta yo yemu Yerusalemu.”

⁵ Ndipo ŵangusoka ŵaraŵara ŵa mafuku gha ŵaYuda, ndi ŵaBenjamini, ndi ŵazukuru ndi ŵaLevi, ndi wose wo ŵangurongozgeka ndi Chiuta kuruta kwachizenga so nyumba yaku Chiuta mu Yerusalemu.

⁶ Ŵazengezgani ŵawo wose ŵanguŵawovya pakuŵapaska viyaŵi vya siliva, ndi golide, ndi vyuma ndi vyakuŵeta, ndi vinthu vya mtengo, pade paku vyose vyo vinguperekeka kwawanangwa.

⁷ Sirusi karonga yo, nayo wanguwezga viyaŵi vya nyumba ya Ambuya vyo Nebukadanezara wanguza navyo kutuwa ku Yerusalemu ndi wanguviŵika mu nyumba ya ŵachiuta ŵake.

⁸ Ivi ndi vyo Sirusi karonga waku Perese wangutuzga mu janja laku Mitiredata mura wakusunga chuma; ndipo iyo wanguviŵerenge kwaku Shesbazara mumirizi waku Yuda.

⁹ Unandi wake wenga viyo: mbali zisani zo golide, chikwi chimoza (1,000), mbali zisani za siliva, chikwi chimoza (1,000) za vyachema, machumi ghaŵi pachanya zinkhonde ndi zinayi (29),

¹⁰ mbali zakufukulika za golide, machumi ghatatu (30) mbali zakufukulika za siliva, vikwi viŵi ndi machumi pe chumi ghanayi, ndi chumi limoza (2,410), ndi viyaŵi vinyake, chikwi chimoza, (1,000).

¹¹ Viyaŵi vyose vya golide ndi vya silivi vyenga, vikwi vinkhonde, ndi machumi pe chumi ghanayi, ndi machumi ghankhonde ndi limoza, pachanya vinkhonde ndi vinayi (5,469). Vyose ivi Shesebazara wanguto ndi kuruta navyo pamoza ndi ŵamikoli ku Yerusalemu kutuwa ku Babiloni.