Ezekiele 9 - Tonga Bible 1986

Yerusalemu walangika

¹ Penipo wangudanirizga mu makutu ghangu ndi mazu ghakuru, wakuti, “Ndereni kufupi, mwa ŵakubaya msumba, yose wenga ndi chidya chaku bayiya mu janja lake.”

² Ndipo ehe, ŵanthu ŵankhonde ndi yumoza wanguza kutuliya ku likomo la pachanya, lo lilereska ku nkhonde, munthu yose wenga ndi chidya chakubayiya mu janja lake, munthu munyake wakuvwara saru ya bafuta, wakuŵa ndi kathumba ka chakulembe, wenga pamoza nawo. Ŵanguruta mukati, ŵanguma pafupi ndi jochero la mkuŵa.

³ Sono unkhankhu wa Ambuya Chiuta waku Yisraele ungukwera kutuwa pa makerubi po unguja, kuruta pa chiwundu cha nyumba; ndipo wangudana ku munthu yo wanguvwara saru ya bafuta, yo wenga ndi kathumba ka chakulembe mu janja lake.

⁴ Ndipo Ambuya angunena nayo, “Ruta mu msumba, porota mu Yerusalemu, ulembe chisimikizgu pa visku vya ŵanthu wo ŵaliya ndikufwifwinthiya pa maunyakazi ghose gho ghachitika mukati mwake.”

⁵ Ndipo kuŵanyake ndinguvwa kuti, “Porotani mu msumba pavuli pake, ndipo mukoso; jiso linu lireke kusiyako, ndipo mureke kurongo lisungu;

⁶ kosoni ŵanthu, ŵara, ŵanyamata, ŵamwali, ŵana ndi ŵanthukazi, kweni rekani kukwaska nanga njumoza wa ŵakuŵa ndi chisimikizgu wo. Ndipo mwambe pa malo ghangu ghakupaturika.” Viyo ŵangwamba pa ŵaraŵara wo ŵenga pa khomo la nyumba.

⁷ Wangunena nawo, “Kazuzgani nyumba, zazani mu luluwa ndi ŵakubayika. Rutani.” Wanguruta, ŵangubaya mu msumba.

⁸ Ndipo po ŵabayanga, ine ndingusiyika ndija, ndinguwa kavunama, ndinguliya, “A! Ambuya Chiuta! Muchipunguliya ukari winu pa Yerusalemu kumbi mubayenge wose wo ŵakujapo mu Yisraele?”

⁹ Iyo wangunena nane, “Uheni wa nyumba yaku Yisraele ndi Yuda ngukuru ukongwa; charu chazaza ndopa, msumba wazaza ukazuzi, pakuti ŵatiti, ‘Ambuya achipata charu, ndipo Ambuya kuti alereska cha.’

¹⁰ Ine nane, jiso langu kuti likasiyangako kanthu cha, nanga nkhuti ndiŵi ndi lisungu naku so cha, kweni nkhawezgiyanga nchitu zawo pa muti yawo.”

¹¹ Ndipo awonani, munthu wakuvwara bafuta, yuwa wanguŵa ndi kathumba ka chakulembe parwa ndi lake, wanguwezga mazu, ghakuti, “Ndachita nge ndimo mungundilanguliya.”