Ezekiele 6 - Tonga Bible 1986

Ambuya asuska visopo vwa ŵangoza

¹ Mazu gha Ambuya ghanguza kwaku ine:

² “Mwana wa munthu, razga chisku chako ku mapiri gha Yisraele, ughachimiyi,

³ unene kuti, Mwa mapiri gha Yisraele, vwani mazu gha Ambuya Chiuta! Viyo atiti Ambuya Chiuta, ku mapiri ndi mitunthu, vinkhwawu ndi madambo: Ehe, ine, inya ine, ndikazanga ndi lipanga paku imwe, nkhapasuwanga malo ghinu gha pachanya.

⁴ Majochero ghinu ghakaŵanga mapopa, majochero ghinu gha vyakusunkhizga ghakafyokanga; ndipo ŵakubayika ŵino ndikaŵapong'anga pasi paurongo pa ŵangoza wino.

⁵ Ndigonekenge viŵanda vya ŵaYisraele paurongo pa ŵangoza ŵawo, ndipo ndiparang'enge viwanga vinu kwakuzunguliya majochero ghinu.

⁶ Kweniko kose muja misumba yinu yikapasukanga, malo ghinu gha pachanya ghazgokenge mapopa, viyo kuti majochero ghinu ghakapasukanga ghakaŵanga mayiyi, ŵangoza ŵinu kufyoka ndi kuparghangika, majochero ghinu gha vyakusunkhizga ghakadumulikiyanga pasi, nchitu zinu zikamaranga.

⁷ Ŵakubayika ŵakawanga mukati mwinu, ndipo mukaziŵanga kuti ine ndine Ambuya.

⁸ “Kweni ndipuuli ndisiyengeko ŵamoyo ŵanyake ŵaku imwe. Po mukaŵanga nawo ŵanyake wo ŵapozomoka ku lipanga mukati mu ŵamitundu, ndi penipo mwaparghanikiya mu vyaru,

⁹ po ndipo ŵakupozomoka mwaku imwe ŵakandikumbukanga mukati mu ŵamitundu ko ŵatoreke umkoli, nditakuti ndaphwanya mtima wawo wa ureŵi wo wapatuka kwaku ine, ndi kujara maso ghawo gho ghang'anamukiya ku ureŵi ndi ŵangoza ŵawo; ndipo ŵachitenge mselu mu maso ghaku iwo ŵeneko pa mauheni gho ŵachita, pa maunyakazi ghawu ghose.

¹⁰ Sono ŵakaziŵanga kuti ine ndine Ambuya; kuti ndikamba ŵaka cha kuti ndikaŵachitiyanga uheni uwu.”

¹¹ Viyo atiti Ambuya Chiuta: “Kuŵanga manja ghako, uku udyaka rundi lako, ndi kuti, Owe! Chifukwa cha uheni wa maunyakazi ghose gha nyumba yaku Yisraele; pakuti ŵakabayikanga ndi lipanga, ndi chilala, ndi chiwowota.

¹² Yo wekutali wakafwanga ndi chiwowota; wa pafupi wakafwanga ndi lipanga; ndipo yo wasiyika ndi kusungika wakafwanga ndi nja. Umu ndimo ndikafiskiyanga ka ndundu kangu paku iwo.

¹³ Ndipo mukaziŵanga kuti ine ndine Ambuya, po ŵakubayika ŵawo ŵagona mukati mu ŵangoza ŵawo, mu majochero ghawo zingirizgi, pa mtunthu we wose, pachanya pa mapiri ghose, musina mu muti wose uŵisi, musina mu muti wose ukuru wa kankhande, penipo pose ŵapereka vya fungu lamampha ku ŵangoza ŵawo wose.

¹⁴ Ndikatambaluriyanga janja langu paku iwo, charu chikaŵanga phasulu ndi mapopa, mu mauja ghawo ghose, kutuwa ku bozwa mpaka ku Ribla. Penipo ndipo ŵakaziŵanga kuti ine ndine Ambuya.”