Ezekiele 42 - Tonga Bible 1986

¹ Sono wangundirongozge mu luluwa la mukati, kulereska ku nkhonde, wanguza nane mu vipinda vyakuthyana ndi bwalo la kasopi ndi kuthyana ndi uzengi ku nkhonde.

² Utali wa uzengi wo wenga kuchiri ku nkhonde wenga mikono machumi pe chumi (100), usani machumi ghankhonde.

³ Kurungizgako mikono machumi ghaŵi yo yenga ya luluwa la mukati, kulereska kanthowa kakuyarikika ndi mya, mwenga kanthowa ka lifyakafyaka kuthyana ndi kanthowa ka lifyakafyaka mu kuyerekana patatu.

⁴ Paurongo pa vipinda penga kanthowa ka mukati, usani mikono chumi, ndi utali mikono machumi pe chumi (100), makhomo ghawo ghe­nga ku nkhonde.

⁵ Vipinda vya muchanya vyenga vifinyiku, pakuti tunthowa twa lifyakafyaka twenga tutali kuruska ivyo, vyenga vifinyi kwakuruska vya musina ndi vya pakati mu nyumba.

⁶ Chifukwa vyenga vya kuyerekana patatu, ndipo vyengavi mizati nge ndi mizati ya luluwa la kubwalo, chifukwa cho vipinda vyapachanya vinguwezgeka kutuwa pasi kwakuruska vya musina ndi vya pakati.

⁷ Ndipo kwenga chiliŵa kubwalo chakulereskana ndi vipinda, kurazga ku luluwa la kubwalo, kuthyana ndi vipinda, mikono machumi ghankhonde (50) utali.

⁸ Pakuti vipinda vyamu luluwa la kubwalo vyenga ndi utali wa mikono machumi ghankhonde (50) penipo vyo vyalereskananga ndi kasopi vyenga ndi utali wa mikono machumi pe chumi (100).

⁹ Musina mwa vipinda ivi mwenga ndi pakuserere kuchiri ku vuma, munthu wangasere mwaku vyo kutuliya ku luluwa la kubwalo,

¹⁰ ko kutamba chiliŵa cha kubwalo. Kuchiri ku malaŵi nako kwenga vipinda, kulereskana ndi baraza ndi kulereskana ndi uzengi,

¹¹ kanthowa kenga panthazi pake; vinguyana waka nge ndi vipinda vya kuchiri ku nkhonde, utali ndi usani vinguyana, vinguyana katuliro, kanozgekero, ndi makhomo.

¹² Ndipo musina mwa vipinda vyaku malaŵi mwenga ndi pakuserere ku vuma, po munthu wanguserere mu kanthowa, kulereskana ndi ivi penga chiliŵa chakugawuwa.

¹³ Sono wangunena nane, “Vipinda vyaku nkhonde ndi vipinda vyaku malaŵi kulereskana ndi baraza ndi vipinda vyakupaturika, mwenimo ndimo ŵazukuru wo ŵandere ku Ambuya ŵakarghiyanga mipasku yakupaturika kwakuruska; ndimo ŵakaŵikanga mipasku yituŵa kwakuruska, mpasku wa ufwa, mpasku wa ulakwi, ndi mpasku wakuparamula, pakuti malo ngakupaturika.

¹⁴ Penipo ŵazukuru ŵasere mu malo ghakupaturika, ŵareke kutuwamo kuruta ku luluwa la kubwalo kwambura kuŵika danga maraya ghawo kwenikuwa gho ŵateŵete, pakuti ghenagha ngakupaturika; ŵavware danga maraya ghanyake ŵenga ŵandandere kufupi ku malo gho ghakugaŵikiya ku ŵanthu.”

Malo gha kuzunguliya kasopi

¹⁵ Sono wanguti wamara kupima mukati mwa kasopi, wanguza nane kubwalo ku likomo lakurazgiya ku vuma, ndipo wangupima malo gha kasopi kwakuzunguliya.

¹⁶ Wangupima kuchiri ku vuma ndi dete lakupimiya, mikono machumi pe chumi ghankhonde (500).

¹⁷ Wangung'anamuka kupima ku nkhonde, mikono machumi pe chumi ghankhonde (500) ndi dete lakupimiya.

¹⁸ Wangung'anamukiya ku malaŵi, mikono machumi pe chumi ghankhonde (500) ndi dete lakupimiya.

¹⁹ Ndipo wangung'anamukiya kuzambwe wangupima ndi dete lakupimiya mikono machumi pe chumi ghankhonde (500).

²⁰ Wangupima vigaŵa vyose vinayi. Chiliŵa chinguzingirizga vigaŵa vyose, utali chenga mikono machumi pe chumi ghankhonde (500) usani machumi pe chumi ghankhonde. Ichi chingupatuwa pakati pa vyakupaturika ndi vyambura kupaturika.