Ezekiele 3 - Tonga Bible 1986

¹ Ndipo wangunena nane, “Mwana wa munthu, yirgha chose cho chapaskika kwaku iwe; yirgha buku ili lakuzinga, rutanga kakambe ndi ŵanyumba yaku Yisraele.”

² Viyo ndingujura mlomo wangu, ndipo wangundipaska buku lakuzinga kuti ndirghi.

³ Wanguti, “Mwana wa munthu, yirgha buku lakuzinga ili nditikupaska uzaze nalo nthumbu yako.” Ndingurgha; ndipo mu mlomo wangu lingusamuka nge ndi uchi.

⁴ Ndipo wanguti, “Mwana wa munthu, ruta kasere ku nyumba yaku Yisraele, uŵakambiye mazu ghangu.

⁵ Pakuti kuti utumika ku ŵanthu ŵakakambidu kalendo ndi kanonono cha, kweni ku nyumba yaku Yisraele

⁶ kuti nkhu ŵanthu ŵanandi ŵakakambidu kalendo ndi kanonono cha, wo mazu ghawo kuti ungawamo cha. Kwakuneneska, asani ndingukutuma ku ŵaviyo, mphanyi ŵatinge ŵakakuvwenge.

⁷ Kweni nyumba yaku Yisraele kuti yikakuvwanga cha; chifukwa kuti ŵakhumba kuvwa ine cha; pakuti nyumba yose yaku Yisraele yendi mutu wakulimba ndi mtima unonono.

⁸ Ehe, ndalimbiska chisku chako kumikana ndi visku vyawo, mutu wako kumikana ndi mitu yawo.

⁹ Nge ndimo mwa wa adamati (daimoni) uliri unonono kuruska sangalawe ndimo ndachitiya mutu wako; ungaŵawopanga, nanga nkhugongowa ndi kalereskedu kawo cha, chifukwa mba nyumba ya chigaruka.”

¹⁰ Ndipo so wangunena nane, “Mwana wa munthu, mazu ghangu ghose gho ndikakambanga nawe ugharonde mu mtima wako, ughavwe mu makutu ghako.

¹¹ Rutanga, kasere ku ŵamikoli, ku ŵanthu ŵako, ŵanene kuti, ‘Viyo atiti Ambuya Chiuta’; manyi ŵatuvwa pamwenga ŵakana kuvwa.”

¹² Penipo mzimu ungundisoska, ndipo po unkhankhu wa Ambuya ungusoka kutuwa pa malo ghake, kuvuli kwangu ndinguvwa nge nkhugundakwa chidiririzi chikuru ukongwa;

¹³ kwenga kugunda kwa mapapa gha vyamoyo vyo pakukwaskana chimoza ku chinyake, ndi kugunda kwa mikombelo ya pamoza navyo, ko kungugunda ulaka nchidiririzi chikuru.

¹⁴ Mzimu ungundisoska ndi kunditore kutali, ndinguruta mu kuŵaŵa kwa kufunda kwa mzimu wangu, pakuti janja la Ambuya lingundiŵiya la nthazi;

¹⁵ ndinguza ku ŵamikoli ku Telabibu, wo ŵajanga mu Kebara. Ndipo ndinguja kuwa umamphavi mukati mwawo mazuŵa ghankhonde ndi ghaŵi.

Mlonda wa ŵaYisraele

¹⁶ Pa umari wa mazuŵa ghankhonde: ndi ghaŵi, ghangundiziya mazu gha Ambuya: kuti,

¹⁷ “Mwana wa munthu, ndakuchita uŵe mulonda wa nyumba yaku Yisraele; penipo pose utuvwa mazu ghangu, ukaŵachenjezganga.

¹⁸ Asani ndititi ku muheni, ‘Ndithu ukafwanga,’ ndipo kuti utimchenjezga cha nanga nkhurongoro nayo kumucheŵeska muheni ku nthowa yake yiheni, mwakuti wataske umoyo wake, muheni yuwa wakafwanga mu kwananga kwake; kweni ndopa zake ndikazifumbanga pa janja lako.

¹⁹ Kweni asani wamuchenjezga muheni, ndipo kuti wang'anamukako ku uheni wake cha, pamwenga kunthowa yake yiheni, wakafwanga mu uheni wake; kweni iwe utaskenge umoyo wako.

²⁰ Ndipo so, asani munthu murunji watuwako ku urunji wake ndi wachita uheni, ndipo ine ndaŵika chiguŵisku paurongo pake, wakafwanga chifukwa iwe kuti wamchenjezga cha, wakafwanga pa uheni wake, ndipo nchitu zake za urunji zo wachita kuti zikakumbukikanga cha; kweni ndopa zake ndikazifumbanga pa janja lako.

²¹ Asani wamuchenjezga murunji, kuti reka kulakwa, ndipo kuti walakwa cha, nadi wakaŵanga wamoyo, chifukwa wanguronda kuchenjezgeka, viyo iwe ukataskanga umoyo wako.”

²² Janja la Ambuya lenga paku ine; angunena nane, “Soka, rutanga ku chidika, ndamurongoro nawe kwenikuwa.”

²³ Viyo ndingusoka ndinguruta ku chidika; ndipo, ehe, unkhankhu wa Ambuya unguma kwenikuwa, nge mbunkhanichu wo ndinguwona ku msinji Kebara; ndipo ndinguwa kavunama.

²⁴ Kweni Mzimu ungusere mwaku ine ungundimiska jo; angurongoro nane anguti, “Rutanga, kajijariye mu nyumba yako.

²⁵ Ndipo iwe, mwana wa munthu awona, vingwe vikaŵikikanga paku iwe, ukamangikanga navyo, mwakuti ureke kuruta mukati mu ŵanthu;

²⁶ ndipo ndikabatikiskanga lilime lako kunena kwa mlomo wako, alinga kuti uŵe wa mbuwu ndi wambura kuziŵa kuŵachenya; pakuti mba nyumba ya chigaruka.

²⁷ Kweni pakurongoro nawe, ndikajuranga mlomo wako, ndipo ukambenge nawo, ‘Viyo atiti Ambuya,’ yo wakavwanga, wavwe; ndipo yo wakakananga kuvwa, wakane; chifukwa mba nyumba ya chigaruka.