Biblia Todo Logo
Bìoball air-loidhne

- Sanasan -

Ezekiele 26 - Tonga Bible 1986


ŴaTuro

1 Pa zuŵa la kwamba la mwezi, mu chirimika cha chumi ndi chimoza, ghangundiziya mazu gha Ambuya:

2 “Mwana wa munthu, Turo pakukamba gha Yerusalemu wanguti, ‘Aha! Likomo la ŵanthu lafyoka, lajurika le mwazi kwaku ine; sono ndikagutiskikanga pakuti wapasuka,’

3 chifukwa cho Ambuya Chiuta atiti: Ehe, ndimikana nawe, owe Turo, ndikatoriyanga paku iwe mitundu yinandi, nge ndimo nyanja yitore mayigha ghake.

4 Ŵakapasuwanga malinga gha Turo, ndi kubwanganduwa vitanthali vyake; ndikaparanga nyata yake, mwakuti liŵe jarawi la waka.

5 Wakaŵanga mukati mwa nyanja malo ghakupong'apo mikwau; ndimu ndakambiya, atiti Ambuya Chiuta; wakazgokanga chakuskowa ku mitundu;

6 ndipo ŵana ŵake ŵanthukazi wo ŵe ku mtunda ŵakabayikanga ndi lipanga. Sono ndipo ŵakaziŵanga kuti Ine ndine Ambuya.

7 “Pakuti viyo atiti Ambuya Chiuta: Awonani, ndikatoriyanga paku Turo Nebukadanezara karonga waku Babiloni kutuliya ku nkhonde, karonga wa ŵakaronga, ŵakavalo ndi magareta, ndi ŵakukwera pa ŵaKavalo pamoza ndi mzinda wa ŵasilikari ŵa nkhondo.

8 Ku mtunda wakabayanga ŵana ŵako ŵanthukazi ndi lipanga; wakakuzengiyanga linga, ndi kuwunjika chimbumira paku iwe, ndi kusoska mtenje wa zinguru paku iwe.

9 Wakamikanga visulo vya nkhondo pa malinga ghako, ndipo ndi mbavi zake waphwanyiyenge pasi vitanthali vyako.

10 Ŵakavalo ŵake ŵakaŵanga ŵanandi mwakuti fuvu lake likakuburumutizganga; malinga ghako ghakasunkhunikanga chifukwa cha chiwawa cha ŵakukwera pa ŵakavalo ndi magareta gha katundu ndi magareta gha nkhondo wachisere pa malikome ghako nge njumoza wakusere mu msumba wo wazingika ndi nkhondo.

11 Ndi vitende vya ŵakavalo ŵake wakapondanga-pondanga mu miseu yako yose; wakabayanga ŵanthu ŵako ndi lipanga; ndipo mizati yako yanthazi yikawanga pasi.

12 Ŵakaskowanga usambasi wako ndi kurgha vya maronda ghako; ŵakawiskiyanga pasi malinga ghako ndi kubwanganduwa nyumba zako zakunozga; mya, miti, ndi nyata yako ŵakavipong'anga mukati mu maji.

13 Ndikarekeskanga kumba kwa sumu zako, kumba kwa ŵabangwi ŵako kuti kukavwikanga so cha.

14 Ndikakusanduskanga jarawi la mteteti; ukaŵanga malo gha kutambikapo mukwau; kuti ukazengekanga so ng'o; chifukwa ine Ambuya ndakamba, atiti Ambuya Chiuta.

15 “Viyo atiti Ambuya Chiuta kwaku iwe Turo: Kumbi malikumba gha nyanja kuti ghakayaghayikanga cha pa chiwawa cha kuwa kwako, ŵachita mantha ŵakupwetekeka, kuchichitika kubayika mukati mwako?

16 Penipo mafumu ghose ghakunyanja gha kasikiyanga pasi kutuwa pa vitengo vyawo, ŵakazuwanga minjitira yawo, ndi kukhoropo maraya ghawo gha maŵanga-maŵanga; ŵakajivwarikanga kunjenjeme, wakajanga pasi pa ŵaka ŵakumbwambwanthiya nyengo yose, ndi ŵambura nthazi paku iwe.

17 Ŵakasoskanga chitenje paku iwe, ŵakatinge, ‘Waparghang'ika uli kutuwa muzinyanja, owe msumba wa lumbiri, wo wenga wanthazi pa nyanja, iwe pamoza ndi ŵakujamo ŵako, wo ŵaserezga mantha ghako paku wose ŵakuja pa mtunda!

18 Sono virwa vimbwambwanthiya pa zuŵa la kuwa kwako; inya, virwa vyo vye mu nyanja vya chitenthe pa kuruta kwako.’

19 “Pakuti viyo atiti Ambuya Chiuta. Po nditakuti ndakusanduska msumba wa mapopa, nge ndi misumba yo mulivi ŵanthu ŵakujamo, po ndikatoriyanga ndimba ya nyanja pachanya pako, ndi maji ghanandi kuti ghakuburumutizge,

20 penipo ndipo ndikakukosoliyanga pasi pamoza ndi wo ŵasikiya ku zenje, ku ŵanthu ŵa mwaka, ndipo ndikakujarikanga mu charu chapasi ukongwa, mukati mumalo ghakupasuka kale, pamoza ndi wo ŵasikiya ku zenje, mwakuti ureke kuŵa so chakujamo cha ŵanthu pamwenga kuŵa ndi malo mu charu cha ŵamoyo.

21 Ndikakutoriyanga ku umari wakofya, ndipo kuti ukaŵangapo so cha; nanga ŵangakupenja-penja, kuti ukasanirikanga cha, atiti Ambuya Chiuta.”

Bible Society of Malawi

Bible Society of Malawi
Lean sinn:



Sanasan