Ezekiele 25 - Tonga Bible 1986

Cheruzgu cha pa mitundu: ŵaAmoni

¹ Mazu gha Ambuya ghanguza kwaku ine:

² “Mwana wa munthu, urazge chisku chako ku ŵaAmoni, ndipo uchime kwakumikana nawo.

³ Wanene ŵaAmoni, Vwani mazu gha Ambuya Chiuta: Viyo atiti Ambuya Chiuta, Chifukwa iwe watinge, ‘Oho!’ Po ghangufipiskika malo ghangu ghakupaturika, ndi po charu chaku Yisraele chinguŵa mapopa, ndi pa nyumba yaku Yuda po yinguruta ku umkoli;

⁴ chifukwa ichi nditukupereka ku ŵanthu ŵaku vuma kuŵa chihara chawo, ndipo ŵakamikanga nkhondo zawo mukati mwako ndi kuŵa ndi uja wawo mwaku iwe; ŵakarghanga vipasi vyako, ndi kumwa mkaka wako.

⁵ Ndikachitanga Raba waŵe chipozwa cha ŵagamila ndi misumba ya ŵaAmoni liŵe khola la vyakuŵeta. Po ndipo ukaziŵanga kuti ndine Ambuya.

⁶ Pakuti viyo atiti Ambuya Chiuta: Chifukwa wachitanga kumba manja, kuthiniska pasi marundi ghako, kwangara ndi kunyoza kose ko kwenga mwaku iwe pa charu chaku Yisraele,

⁷ chifukwa cho, ehe, ndanyoroska janja langu pakumikana ndi iwe, ndikakuperekanga ku mitundu nge nchakuskowa, ndipo ndikakundumuwangako ku ŵanthu ndi kukutuzga mu vyaro; ndikakuparghang'anga. Sono ndipo ukaziŵanga kuti ine ndine Ambuya.

ŴaMoabu

⁸ “Ambuya Chiuta atiti: Chifukwa Moabu watinge, Awonani, nyumba yaku Yuda, yayana nge ndi mitundu yose yinyake,

⁹ chifukwa ichi ndikajuranga kurwandi kwaku Moabu kutuwa mu mizi ya mumphepeti mwake, unkhankhu wa charu, Betejeshimoto, Balaneno, ndi Kiriataimu.

¹⁰ Ndikawuperekanga pamoza ndi ŵaAmoni ku ŵanthu ŵaku vuma nge nchihara chawo, mwakuti ureke kukumbukika so mukati mu mitundu,

¹¹ ndikaperekanga vyeruzgu paku Moabu. Penipo ndipo ŵakaziŵanga kuti Ine ndine Ambuya.

ŴaEdomu

¹² “Viyo atiti Ambuya Chiuta: Chifukwa Edomu wanguwezge thayu pa nyumba yaku Yuda ndipo wakulakwa kwakufikapo pakuŵawezge thayu,

¹³ chifukwa cho atiti Ambuya Chiuta, ndinyoroskiyenge janja langu pa kumikana ndi Edomu, ndikadumuwangamo mwaku wo munthu ndi nyama; ndikawuchitanga mapopa; kutuwa ku Temani mpaka ku Dedani ŵakawanga ndi lipanga.

¹⁴ Ndikagonekanga thayu langu paku Edomu ndi janja la ŵanthu ŵangu ŵaYisraele; ŵakachitanga mu Edomu kwakulingana ndi kukara kwangu ndi kwakulingana ndi ukari wangu; ndipo ŵakaziŵanga thayu langu, atiti Ambuya Chiuta.

ŴaFilisti

¹⁵ “Viyo atiti Ambuya Chiuta: Chifukwa ŵaFilisti ŵanguchita mwa thayu, ŵanguwezge thayu ndi kunyoza kwa mtima kuti ŵaparghang'e mu kutinkha kwambura kumara;

¹⁶ chifukwa ichi Ambuya Chiuta atiti, Awona, ndikatambaluriyanga janja langu pa ŵaFilisti, ndikadumuwanga ŵaKereti, ndi kubwanganduwa ŵakujako ŵa mumphepeti mwa nyanja.

¹⁷ Ndikachitanga thayu likuru paku iwo ndi ukari wakuŵalanga. Penipo ndipo ŵakaziŵanga kuti ine ndine Ambuya, asani ndiŵika thayu langu paku iwo.”