Estere 6 - Tonga Bible 1986

Ahaswerusi wasaniya chifukwa chakuchitiya ulemu Mordikayi

¹ Usiku uwa tulu twa karonga tingukamuka, ndipo wangulangula kuti ŵazi nalo buku la mkoka, ndipo linguŵerengeka paurongo pa karonga.

² Mungusanirika kuti mukulembeka kuti Mordikayi ndiyo wangusumuwa Bigitani ndi Teresi, ŵateŵeti ŵaŵi ŵa karonga, ŵalinda ŵapa likomo, ŵeniwo ŵangukhumba kuŵika janja pa karonga Ahaswerusi.

³ Ndipo karonga wanguti, “Kumbi mbulemu uli pamwenga kuzirwa uli ko Mordikayi wakuronde pa chifukwa chaku ichi?” Ŵateŵeti ŵa karonga wo ŵenga nayo ŵanguti, “Ŵalivi kumchitiya kanthu.”

⁴ Ndipo karonga wanguti, “Ndiyani wemu bwalo?” Sono Hamani wangusere mu luluwa la kubwalo la nyumba ya karonga kuti wakambe ndi karonga kuti Mordikayi wapayikike pa muti wo wangulongoso.

⁵ Viyo ŵateŵeti ŵa karonga ŵanguti, “Hamani wama mu bwalo.” Ndipo karonga wanguti, “Muneniyeni wasere.”

⁶ Viyo Hamani wangusere. Karonga wangufumba, “Kumbi chingamuchitikiya chine munthu yo karonga wakondwa nayo kumtumbika?” Ndipo Hamani wangurunguruka mu mtima wake, “Kumbi wangaŵa so yani yo karonga ngwakukondwa nayo kuti wamchitiye ulemu wakuruska ine?”

⁷ Ndipo Hamani wangwamuka karonga, wanguti, “Munthu yo karonga wakondwa nayo watenere kukankhuskika,

⁸ vitoreke vyakuvwara vya karonga vyo wavwara karonga, ndi kavalo yo karonga wakwerapo, ndi chisoti cha ufumu cho karonga wavwara pa mutu wake;

⁹ ndipo vyakuvwara ndi kavalo viperekeke ku nkhankhu yumoza ya mafumu gha karonga kuti ŵamuvwarike munthu yo karonga wakondwa nayo ku mtumbika, kuza nayo pa kavalo kwenda mu mseu mukati mu msumba, ndi kukambura paurongo pake: ‘Viyo ndimu kumchitikiyenge munthu yo karonga wakondwa nayo kumtumbika.’ ”

¹⁰ Ndipo karonga wanguti kwaku Hamani, “Endeska, ukato chivwaru ndi kavalo ulaka ndimo wakambiya, ndimu uchitiye kwaku Mordikayi mu Yuda, yo waja pa likomo la karonga. Paulevi kanthu paku vyose vyo wakamba kuti kareke kuchitika.”

¹¹ Viyo Hamani wangwachito chivwaro ndi kavalo wanguvwarika Mordikayi ndikuza nayo pa kavalo kwenda mu mseu mukati mu msumba, ndi wangukambura paurongo pake kuti, “Kuchitikiyenge viyo ku munthu mweniyo karonga wakondwa nayo kumtumbika.”

¹² Ndipo Mordikayi wanguza so ku likomo la karonga. Kweni Hamani wangutinthimika kuruta ku nyumba yake wakuliya ndi wakuvunikiriya mutu wake.

¹³ Ndipo Hamani wangukonkhome Zeresi muwoli wake ndi mabwezi ghake ghose vyose vyo vingumuwiya. Viyo ŵanthurumi ŵake ŵazeru ndi muwoli wake Zeresi ŵanguti kwaku iyo, “Asani Mordikayi ngwa mphapu ya ŵaYuda, mweniyo iwe wayamba kusikiya pasi pake, palivi kuti umpundenge, uŵengedi wakugwada, paurongo pake.”

¹⁴ Weche kurongoro nayo mathenga gha karonga ghanguza ghangutinthimika kuza nayo Hamani ku dghera lo Estere wangulongoso.